Kaciaryna Andrejeva naviedała pakaz filma, źniataha pa jejnaj z mužam historyi kachańnia
U Varšavie adbyŭsia admysłovy pakaz filmu Mary Tamkovič «Pad šerym niebam», padčas jakoha prajšła i sustreča z žurnalistkaj Kaciarynaj Andrejevaj. Historyja byłoj palitźniavolenaj i jejnaha muža Ihara Iljaša i stała natchnieńniem dla stvareńnia kinakarciny, nahadvaje «Biełsat».
Pakaz prajšoŭ u kinateatry Elektronik U zale byli siabroŭki Kaciaryny — inšyja palitźniavolenyja, razam ź jakimi jana znachodziłasia za kratami, žurnalistka Darja Čulcova, jakaja zdymała toj samy strym z Płoščy Pieramienaŭ. Prysutničali taksama Śviatłana Cichanoŭskaja i inšyja pradstaŭniki jejnaj kamandy, akciory i čalcy zdymačnaj hrupy filma.
Andrejeva raspaviała, što pakazanyja emocyi ŭ scenie sa strymam na 80% supadajuć z tymi, što pieražyła jana nasamreč. Ale dadała, što ich pieršaje z mužam spatkańnie ŭ źniavoleńni było bolš pazityŭnym, čym pakazana ŭ filmie.
«Usio prachodziła vielmi žyćciaradasna, i majo staŭleńnie da hetaha dośviedu było bolš žyćciaradasnym, bolš viasiołym i aptymistyčnym. Prosta tamu, što ja taki čałaviek. My na hetych karotkich spatkańniach, navat nie zvažajučy na achovu, śpiavali pieśni».
Sa sceny žurnalistka taksama padzialiłasia, jakija momanty filma joj dalisia emacyjna niaprosta. I raspaviała, što nie adrazu pahadziłasia pryjści na pakaz.
«Spačatku mnie padavałasia, što ja nie zmahu i nie zdoleju [pryjści]. Što budu płakać mocna, što ja nie zmahu strymać svaje emocyi — i navošta heta na publiku pakazvać. I saromiełasia, moža, svajoj mahčymaj reakcyi, — ščyra adkazała jana na pytańnie z zały i ŭzhadała niekatoryja kadry.
— Było vielmi baluča hladzieć na kvateru paśla vobšuku. I kali byli kadry zatrymańnia Ihara, ja prosta adviarnułasia, tamu što nie mahła hladzieć. Mnie, praŭda, baluča vielmi».
Na mierapryjemstvie šmat havaryli pra žurnalista Ihara Iljaša, za jakoha ciapier, paśla vychadu na volu, zmahajecca Andrejeva.
«Ja budu sapraŭdy volnaj tolki tady, kali vyzvalać Ihara. Dla mianie vielmi važna skarystacca takoj mahčymaściu mienavita ciapier, kali rychtujecca čarhovaje vyzvaleńnie palitviaźniaŭ», — skazała Kaciaryna.
Na scenie niadaŭna vyzvalenaja žurnalistka trymała fotazdymak muža, jaki paśla pieradała lidarcy demsiłaŭ Śviatłanie Cichanoŭskaj z prośbaj nahadvać pra vyzvaleńnie jaho i inšych źniavolenych žurnalistaŭ na mižnarodnych sustrečach.
Kamientary