Darunki danajcaŭ

Kaniešnie, łaščyć słych śviatočnaja zajava pra toje, što ekanomika Biełarusi akryjała ad naftahazavaha ŭdaru. Ale ž abyvatal aryjentujecca nie na pijar i navat nie na makraekanamičnyja abstrakcyi kštałtu rostu VUP. Jon aryjentujecca na svoj kašalok.

A kašalok za čatyry miesiacy schudnieŭ na 6% (nastolki ŭpali realnyja zarobki). Ź inšaha boku, zaŭvažna padvysilisia žyllova-kamunalnyja taryfy i mnohija košty ŭ kramach.

Tezy śviežaha artykułu ekanamista Leanida Zaiki taksama kantrastujuć z aficyjnym aptymizmam. Voś dajdžest dla tych, chto nia lubić študavać doŭhija teksty dy błytacca ŭ pavucińni dyjahramaŭ:

— letaś roznaha kštałtu datacyi z boku Rasiei skłali 8,3 miljardu dalaraŭ, što i stvarała pazytyŭny vobraz ekanamičnaj palityki;

— pačatak 2007 hodu pakazaŭ intelektualny dy systemny paralič uradu;

— brać zamiežnyja kredyty aznačaje finansavać palityčnuju elitu za košt budučych pakaleńniaŭ, pradavać "familnaje srebra" aznačaje ratavać jaje ž za košt pakaleńniaŭ ciapierašnich. Asabliva niebiaśpiečna pazyčać u Rasiei — heta budzie "pieradprodažnaj padrychtoŭkaj Biełarusi", zaciahvańniem krainy ŭ pastku Maskvy. Možna abyścisia i biaz tych niebiaśpiečnych zachadaŭ, kali systemna źmianić ekanamičnuju dy sacyjalnuju palityku.

Asobna varta padkresllić nastupnuju vysnovu ekanamista: "U Biełarusi ciaham apošnich hadoŭ realnyja dachody nasielnictva adarvalisia ad vynikaŭ ekanomiki. U 2006 hodzie, naprykład, VUP vyras amal što na 10%, a dachody — na 17,3%. Strana dzielić i spažyvaje niezaroblenaje".

Tut, musić, bolej darečy byŭ by minuły čas, bo spryjała najpierš naftahazavaja renta.

Fakt toje, što, na dumku Leanida Zaiki, u biełarusaŭ sfarmavalisia vysokija spažyvieckija zapyty — kštałtu tych, što byli ŭ amerykancaŭ padčas bumu 60-ch. I kali daviadziecca tracić hrošy najpierš na charčavańnie dy kamunałku, raźvitvajučysia z kvaterna-aŭtamabilnymi marami — heta moža być uspryniata nadta chvaravita.

Taki trend hramadzkaha samaadčuvańnia užo fiksujuć sacyjolahi. Napeŭna, adpaviednyja analityčnyja matarjały kładucca i na stały najvyšejšaha kiraŭnictva. Ci nie tamu pajšła takaja chvala supakajalnaha pijaru: usio narmalova, ni ekanomika, ni palityčnaje kiraŭnictva nie pachisnulisia!

Praŭda, z prośbami ab pazykach pa ŭsich azimutach heta nia nadta stasujecca. Tym bolej što raniej ajčynnaje načalstva padkreślena hanaryłasia małym zamiežnym doŭham.

Darečy, pavodle prahnozu "BiełPartyzana", na vialikaj presavaj kanferencyi ŭ čaćvier aficyjny kiraŭnik budzie najpierš pracavać na ŭschodni vektar.

• 0
• 0
• 0
• 0
• 0
• 0
• 0
• 0