Alaksandar Milinkievič prajšoŭ medyčny ahlad. Palityk adčuvaŭ boli ŭ vobłaści chrybta, u jaho taksama była paškodžanaja ruka. Traŭmy jon atrymaŭ 25 Sakavika, u šarpaninie ź milicyjantami.
U paniadziełak Alaksandar Milinkievič prajšoŭ medyčny ahlad. Palityk mieŭ paškodžańni na levaj ruce i adčuvaŭ boli ŭ śpinie, u vobłaści chrybta. Traŭmy jon atrymaŭ 25 Sakavika ŭ šarpaninie ź milicyjantami. Jon uznačalvaŭ adnu z hrupaŭ manifestantaŭ, što vyjšli na śviatkavańnie Dnia Voli. Milinkievič u atačeńni hrupy najbližejšych paplečnikaŭ prykryvaŭ adychod demanstrantaŭ, vioŭ pieramovy ź milicyjaj i adbivaŭ zatrymanych. Kali ludziej vyciskali z vulicy Internacyjanalnaj, Milinkieviča specnazaŭcy šturchnuli tak, što jon upaŭ.
Specnazaŭcy taksama da kryvi paškodzili ruku žonki Milinkieviča Iny Kulej, jakaja ŭvieś čas była popleč z mužam.
Paśla incydentu palityk išoŭ z kalonaj manifestantaŭ na Niamizie i praspekcie Mašerava, a paśla pierajechaŭ u rajon płoščy Jakuba Kołasa, dzie ŭznačaliŭ tych demanstrantaŭ, što pierabralisia na praspekt Skaryny z rajonu Niamihi.
Pa słovach pres‑sakratara Milinkieviča Paŭła Mažejki, vyniki medahladu dazvalajuć spadziavacca, što ŭžo naprykancy tydnia palityk budzie pačuvacca dobra. Pierałomaŭ nia vyjaŭlena. Ciapier A. Milinkievič prachodzić kurs medyčnaj reabilitacyi.
Stan zdaroŭja žonki A.Milinkieviča taksama narmalny.
Kamientary