Jak raskazali ŭ kampanii «Iterabiełstroj», jakaja źjaŭlajecca zabudoŭščykam ambicyjnaha prajekta ŭ Minsku, nie vyklučana, što častka pavierchaŭ žyłoha chmaračosa «Vietraź» budzie addadziena pad apartamient-hatel.
— Pieršapačatkova my razhladali ideju pra toje, kab pad hatel addać adzin z dvuch padjezdaŭ «Vietrazia». Ale ŭzvažyŭšy pierśpiektyvy i mahčymyja niazručnaści, jakija vykliča častkovaje pieraprafilavańnie žyłoha doma ŭ kamiercyjny abjekt, my ad hetaj idei admovilisia. Siońnia źjaviŭsia inšy varyjant — ź niekalkich pavierchaŭ chmaračosa zrabić apart-hatel, — kaža Ihar Rusakievič, pieršy namieśnik hienieralnaha dyrektara ZTAA «ITERA-Bieł».
Apart-hateli, abo apartamient-hateli, — novy farmat hatelnaj nieruchomaści, što apošnim časam nabiraje papularnaść va ŭsim śviecie. Asnoŭnaje jaho adroźnieńnie ad hatelaŭ u tym, što zamiest standartnych varyjantaŭ raźmiaščeńnia ŭ numarach pastajalcam prapanujucca kvatery. Takim čynam u žycharoŭ apartamientaŭ źjaŭlajecca mahčymaść sumiaščać chatni kamfort z dastupnaściu hatelnaha servisu. Jak praviła, za miažoj apart-hateli raźmiaščajucca na vierchnich pavierchach hatelnych i šmatfunkcyjanalnych kompleksaŭ, raźmieščanych u prestyžnych rajonach horada.
— Kali budzie pryniataje kančatkovaje rašeńnie z nahody raźmiaščeńnia apart-hatela ŭ «Vietrazi» — pakul skazać składana. Mahčyma, heta zdarycca ŭžo ŭ studzieni. Siońnia ŭ kampanii jość i prychilniki hetaj idei, i tyja, što sumniajucca. Ale ŭ lubym vypadku jak kamiercyjny prajekt hetaja ideja całkam moža mieć pośpiech u Minsku, — ličyć Ihar Rusakievič.
Nahadajem, jašče ŭ kastryčniku 2011 hoda budaŭnictva žyłoha doma biznes-kłasa «Vietraź» pierasiahnuła stomietrovuju vyšyniu, a ŭ listapadzie vialisia raboty pa ŭźviadzieńni manalitnaha pierakryćcia nad 31-m paviercham (pientchaŭz). Razam sa špilem budynak 32-paviarchovaha chmaračosa ŭ centry Minska budzie mieć vyšyniu 133 mietry.
Kamientary