Łukašenka atrymaŭ ad Rasii jašče adzin padarunak
Pieršaja batareja zienitna-rakietnaha kompleksu «Tor-M2» prybyła ŭ Biełaruś.
Pieršaja batareja zienitna-rakietnaha kompleksu «Tor-M2» prybyła ŭ Biełaruś, paviedamili ŭ Ministerstvie abarony.
«Zienitny rakietny kompleks pastupiŭ na ŭzbrajeńnie 120-j zienitnaj rakietnaj bryhady Zachodniaha apieratyŭna-taktyčnaha kamandavańnia. Asabisty skład bryhady prajšoŭ navučańnie i pierapadrychtoŭku na hety kompleks u Rasijskaj Fiederacyi, — rastłumačyli ŭ ministerstvie. — Pieraŭzbrajeńnie złučeńnia na novuju zienitnuju rakietnuju techniku SPA dazvolić značna pašyryć bajavyja mahčymaści VPS i vojskaŭ SPA Uzbrojenych Sił Biełarusi pa supraćpavietranaj abaronie i jość jarkim prykładam plonnaha supracoŭnictva Biełarusi i Rasii».
Rasija — asnoŭny partnior Biełarusi ŭ pytańniach što da pastavak pradukcyi vajennaha pryznačeńnia (uzbrajeńnie i vajennaja technika, zapasnyja častki da ich, a taksama ramont i madernizacyja) dla patreb Uzbrojenych Sił, u tym liku na lhotnych dla biełaruskaha boku ŭmovach.
Usiaho z 2005 hoda na lhotnych umovach było zaklučana kala 50 kantraktaŭ na pastaŭku, ramont i madernizacyju dla patreb Uzbrojenych Sił Biełarusi zienitnaha rakietnaha ŭzbrajeńnia, srodkaŭ suviazi i radyjoelektronnaj baraćby, strałkovaha i artyleryjskaha ŭzbrajeńnia, bojeprypasaŭ, avijacyjna-techničnaj majomaści. «Supracoŭnictva ažyćciaŭlajecca na ŭzajemavyhadnaj partniorskaj asnovie i ŭklučaje sumiesnuju dziejnaść pa zachavańni i raźvićci kaapieracyi abaronna-pramysłovych kompleksaŭ suvierennych dziaržavaŭ pry raspracoŭcy i vytvorčaści kankurentazdolnaj pradukcyi vajennaha i dvajnoha pryznačeńnia, a taksama jaje ŭzajemnyja pastaŭki», — padkreślili ŭ ministerstvie.
Tor-M2 — pradstaŭnik novaha pakaleńnia bajavych srodkaŭ SPA małoj dalokaści. Zienitny rakietny kompleks «Tor-M2» zabiaśpiečvaje efiektyŭnuju procipavietranuju abaronu vajennych i hramadzianskich abjektaŭ. Jon źjaŭlajecca efiektyŭnym srodkam parazy samalotaŭ, viertalotaŭ, aeradynamičnych bieśpiłotnych lotnych aparataŭ, kiravanych rakiet i inšych elemientaŭ vysokadakładnaj zbroi, jakija laciać na siarednich, małych i hranična małych vyšyniach u składanaj abstanoŭcy. ZRS vyłučajecca pavyšanaj efiektyŭnaściu adbićcia masiravanych nalotaŭ sučasnych srodkaŭ pavietranaha napadu va ŭmovach ahniavoha i radyjoelektronnaha procidziejańnia. Kompleks zdolny vykonvać bajavyja zadačy ŭ lubych klimatyčnych umovach.
Batareja ZRK «Tor-M2» u składzie čatyroch bajavych mašyn zdolnaja adnačasova źbić 16 met, jakija laciać ź lubych napramkaŭ z chutkaściu da 700 m/s na dalokaści da 12 km i vyšyni da 10 km u lubych umovach nadvorja dniom i nočču. Vysokaja bajavaja efiektyŭnaść taksama dasiahajecca za košt całkam novaha ałharytmu ŭzajemadziejańnia pamiž mašynami, jakija pracujuć u pary. Jany aktyŭna abmieńvajucca bajavoj infarmacyjaj, sami raźmiarkoŭvajuć mety pamiž saboj. Sistemy całkam aŭtamatyzavanyja, udzieł čałavieka źviedzieny da minimumu.
Kamientary