Bresckaja milicyja «nie paznała» svajho supracoŭnika, jaki prasłaviŭsia na «maŭklivaj» akcyi + fota i videa

Na fota i videa bačna, jak małady čałaviek załomvaje ruki pratestoŭcu i zryvaje bejdž z žurnalista.

Supracoŭniki milicyi pakul nie zmahli vyśvietlić asobu hramadzianina ŭ cyvilnym, jaki 6 lipienia dapamahaŭ zatrymlivać udzielnikaŭ niesankcyjanavanaj «maŭklivaj» akcyi ŭ Breście, piša «Briestskaja hazieta».

Małady čałaviek prasłaviŭsia tym, što na vuł. Puškinskaj sarvaŭ u karespandenta «BH» žurnaliscki bejdž. Heta zafiksavali na kamiery dva vidavočcy. Adzin ź ich, Uładzimir A., zajaviŭ, što jahonyja dziejańni vyklikaŭ hnieŭ nieviadomaha i jon pryhraziŭ jamu fizičnym hvałtam. Uładzimira napisaŭ skarhu ŭ milicyju, padrabiazna apisaŭšy padziei sierady 6 lipienia. Pry hetym jon dadaŭ da zajavy fotazdymki nieviadomaha i navat mierkavanyja imia i proźvišča čałavieka ŭ cyvilnym, jakija jamu padkazali karystalniki internetu paśla źjaŭleńnia fotazdymkaŭ «hieroja» ŭ siecivie.

U sacyjalnych sietkach i na forumach sajtaŭ hetaha čałavieka nibyta apaznali, jak supracoŭnika adnaho z rajadździełaŭ bresckaj milicyi Vasilija K., vypusknika škoły № 22 Bresta. Byŭ apublikavany adras jahonaj staronki Vkontaktie, adnak paśla hetaha jana vielmi chutka stała niedasiažnaj.

Varta adznačyć taksama, što na na fotazdymku, zroblenym reparcioram haziety «Briestskij kuŕjer», bačna, što ŭ momant zatrymańnia adnaho z udzielnikaŭ akcyi ŭ nieviadomaha ŭ cyvilnym z rukava kurtki vysunuŭsia mikrafon. Takoj harnituraj na akcyjach apazicyi šyroka karystajucca supracoŭniki milicyi i śpiecsłužbaŭ. Uvohule na zdymkach bačna, jak jon na vačach supracoŭnikaŭ u formie razam ź inšymi milicyjantami ŭ cyvilnym vykručvaje ruki zatrymanym udzielnikam akcyi.

Paźniej 26 lipienia na Uładzimir A. atrymaŭ adkaz za podpisam načalnika adździeła ŭnutranych spraŭ administracyi Leninskaha rajona h. Bresta Valeryja Uhlanicy. Jaho tekst pryvodzić «Briestskaja hazieta»: «Fakty vykładzienyja ŭ Vašaj zajavie paćvierdzilisia. Nieviadomaha maładoha čałavieka, ź jakim u Vas adbyŭsia kanflikt 2011.07.06 hoda pa vuł. Puškinskaj ŭ h. Breście vyśvietlić nie atrymałasia. Na praciahu dvuch miesiacaŭ buduć praviedzieny pošukavyja mierapryjemstvy z metaj vyśviatleńnia asoby maładoha čałavieka ź jakim u Vas adbyŭsia kanflikt».

Jak bačym, Valer Uhlanica nie patłumačyŭ u svaim adkazie ni taho, chto dazvoliŭ nieviadomamu čałavieku dapamahać milicyjantam u časie zatrymańniaŭ udzielnikaŭ akcyi, ni toj fakt, čamu hety nieviadomy karystajecca techničnymi srodkami śpiecsłužbaŭ.

• 0
• 0
• 0
• 0
• 0
• 0
• 0
• 0