Dzicia ŭ labiryncie pačvaraŭ
Hišpanija, 1944 hod. Dziesiacihadovaja Afelija razam ź ciažarnaju maci pryjaždžaje ŭ lahier ajčyma — kapitana Vidala. Kapitan viadzie biaźlitasnuju vajnu ź miascovymi partyzanami
Labirynt Faŭna (Laberinto del Fauno)
Meksika – Hišpanija – ZŠA, 2006, kalarovy, 119 chv.
Režyser: Hiljerma Del Tora
Roli vykonvajuć: Aryjadna Chil, Ivana Bakiera, Sierchi Łopiez, Marybel Verdu
Žanr: strašnaja kazka, historyka-partyzanskaja drama-prypavieść
Adznaka: 9 (z 10)
Hišpanija, 1944 hod. 10-hadovaja Afelija razam ź ciažarnaju maci pryjaždžaje ŭ lahier ajčyma – kapitana Vidala. Kapitan – zły j fanaberysty čałaviek, jaki viadzie biaźlitasnuju vajnu ź miascovymi partyzanami. U zakinutym labiryncie letuciennaja Afelija sustrakaje Faŭna, jaki paviedamlaje dziaŭčyncy, što jana – dačka padziemnaha karala. I, kab viarnucca da baćki, joj treba prajści mahičnyja vyprabavańni.
Realnaja vajna śplatajecca z kašmarami labiryntu – i što zdolnaje supraćpastavić złu biaźvinnaje dzicia?
Hiljerma Del Tora – adzin z najlepšych siońniašnich režyseraŭ, pieršy kazačnik-realist novaha stahodździa. Navat jahonyja kamercyjnyja stužki (“Mimikryja”, “Błejd-2”) vyłučajucca vykštałconaj kulturaj kadru, biezdakornymi admysłovymi efektami j mahijaj kinaekranu.
Del Tora raspracoŭvaje novy žanr strašnaha kazačnaha realizmu, dzie fantazii śplatajucca z realnaściu, historyja nieadłučanaja ad mistyki, a hieroi (zvyčajna, dzieci) dajuć boj sacyjalnamu j metafizyčnamu złu. Pieršaja sproba takoha žanru – ałchimika-vampiryčnaja prypavieść “Chronas”, druhaja – šedeŭr “Chrybiet djabła” pra hramadzianskuju vajnu ŭ Hišpanii vačyma chłopčyka.
“Labirynt Faŭna” praciahvaje tradycyi “Chrybta”. Meksikaniec Del Tora pazyčaje j vynachodki j Karłasa Saŭry časoŭ frankiskaje dyktatury, čyje kinaprypavieści pra dziaciej nasyčalisia metafizyčnym stracham.
Ale šče adna krynica Del Tora – klasyčny hišpanski žyvapis. Vietliva-drapiežny Faŭn, ślapaja pačvara z vačyma na dałoniach, ciomnyja labirynty ad aperatara Hiljerma Navary – nahadajuć kašmary poźniaha Hoi j baročnuju mistyku.
Złučvo atrymałasia biezdakornaje: fantazii jość metafaraj sacyjalnych zakałotaŭ, a dziciačyja kazki nasyčajucca tryvohaj i niespakojem.
Biaźvinnaść maje ŭładu, zło nia zdolnaje fantaziravać. Ale dopuskam u śviet fantazij stanovicca ŭłasnaja kroŭ – a kazka stanovicca nastolki strašnaj, što dzieciam lepiej jaje nie hladzieć.
Karcina – dla ŭdumlivych hledačoŭ. Heta sapraŭdnaje śviata kinematohrafu; iberyjski šedeŭr, jaki rezka vyłučajecca svajoju admietnaściu.
"Labirynt Faŭna" naminavany na "Oskara" za 2006 h.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary