Fatohraf Andrej Lankievič vydaŭ knihu pra biełaruskaje pahanstva.
Fatohraf Andrej Lankievič vydaŭ knihu pra biełaruskaje pahanstva.
Pamiž pieršaj fotavystavaj, pryśviečanaj biełaruskamu pahanstvu, i vypuskam fotaalboma prajšło bolš za dva hady. U pradmovie da pieršaj vystavy pra pracu fatohrafa havaryłasia: «Žyvučy ŭ chryścijanskaj tradycyi, my nie zaŭsiody razumiejem, što jana źjaviłasia paśla dvaccaci tysiačahodździaŭ pahanskich vieravańniaŭ i tabu. Chryścijanstva ž upłyvała na cyvilizacyju tolki apošnija dźvie tysiačy hadoŭ. Pahanstva prysutničaje ŭ žyćci sučasnaha hramadstva: chto nie hladzić u lusterka, kali viartajecca pa zabytyja rečy, chto nie padumaje niekalki razoŭ, ci varta praciahnuć vandroŭku, sustreŭšy čornaha kata. U vioskach — bolš. I ciapier babulki razmaŭlajuć z karovami viasnoju pierad pieršym vychadam u pole, vierać, što žaba-rapucha — heta viadźmarka. Andrej Lankievič pry dapamozie fatahrafii pakazvaje pahanskija tradycyi i zvyčai, jakija da hetaha času isnujuć u Biełarusi. Bolšaść tradycyjaŭ źnikaje albo ŭžo źnikła ŭ 60—70-ja hady minułaha stahodździa. U niekatorych vioskach ich pamiataje tolki adna, najstarejšaja žycharka».
Kniha «Pahanstva» była nadrukavanaja ŭ litoŭskim vydaviectvie «Arx baltica», pry padtrymcy polskaha vydaviectva Fundacja Villa Sokrates i Niamieckaha Fondu Maršała.
Niezadoŭha da vydańnia knihi fotapracy Lankieviča ź sieryi «Biełaruskaje Pahanstva» adznačyli na štohadovym mižnarodnym fotafiestyvali ŭ Kaŭnasie (Litva) Kaunas Photo STAR. Uznaharoda — piersanalnaja vystava ŭ FOTO KVARTALS gallery (Ryga, Latvia) u 2011 h.
«U bližejšy čas budu ładzić prezientacyi novaj knihi», — padzialiŭsia svaimi płanami Andrej Lankievič. Heta svojeasablivaje padviadzieńnie rysy pad manumientalnaj pracaj fatohrafa. Nastupnym etapam budzie vydańnie novaj knihi. «Heta zadumy na nastupny hod. Dumaju vypuścić knihaj partrety biełarusaŭ, što žyvuć u Polščy», — kaža Andrej Lankievič. Hety prajekt fatohraf realizavaŭ u časie pad stypiendyi ad polskaha Narodowe Centrum Kultury.
***
Prezientacyi:
Viena — 7 kastryčnika, 19.00, Anzenbergergallery.
Vilnia — u ramkach vystavy 22—28 listapada ŭ Jeŭrapiejskim humanitarnym univiersitecie (vuł. Taŭra, 12).
U Biełarusi prezientacyja maje adbycca ŭ Minsku ŭ Instytucie imia Hiote (vuł. Viery Charužaj, 25/3). Data praviadzieńnia pakul nie vyznačanaja.
U płanach taksama praviadzieńnie prezientacyi ŭ Bierlinie. Adbudziecca jana praź miesiac, miesca pakul nia vyznačanaje.
Kamientary