Kyrhyzstan źviarnuŭsia da šaści dziaržaŭ z prośbaj pra zatrymańnie Bakijeva i jaho svajakoŭ

Hienieralnaja prakuratura Kyrhyzstana nakiravała šerahu krain mižnarodnyja śledčyja daručeńni ab praviadzieńni vyšukovych mierapryjemstvaŭ i zatrymańni eks-prezidenta krainy Kurmanbieka Bakijeva, a taksama jaho svajakoŭ i ludziej ź blizkaha atačeńnia ŭ ramkach kryminalnych spraŭ, jakija rasśledujucca. Pra heta paviedamlaje pres-słužba Hienprakuratury Kyrhyzstana.

Śledčyja daručeńni ab zatrymańni Kurmanbieka Bakijeva, jaho synoŭ Marata i Maksima i brata Žanybieka, a taksama eks-kiraŭnika Dziaržsłužby nacbiaśpieki Murata Sutalinava, eks-premjera Danijara Usienava i jašče 14 asob pieradadzieny ŭ pravaachoŭnyja orhany Rasii, Kazachstana, Biełarusi, Vialikabrytanii, Ukrainy i Uźbiekistana.

«U adpaviednaści z patrabavańniami Minskaj i Kišynioŭskaj kanviencyj „Ab akazańni pravavoj dapamohi pa hramadzianskich, siamiejnych i kryminalnych spravach“ daručeńni nakiravanyja ŭ ramkach rasśledavańnia kryminalnych spraŭ, raspačatych pa faktach masavaha zabojstva, jakoje mieła miesca 7 krasavika 2010 hoda na płoščy Ała-Toa, a taksama ekanamičnych i słužbovych złačynstvaŭ u dačynieńni da šerahu asob. Pa ŭsich vyšejzhadanych abvinavačvanych MUS respubliki zaviedzieny vyšukovyja spravy, jany abvieščanyja ŭ miždziaržaŭny i mižnarodny vyšuk. Jany taksama ličacca ŭ mižnarodnym vyšuku pa linii Interpoła», — cytuje RIA Novosti paviedamleńnie pres-słužby.

Jak paviedamiŭ 30 vieraśnia na pres-kanfierencyi ŭ Biškieku vice-premjer kirhizskaha ŭrada Azimbiek Bieknazaraŭ, kryminalnaja sprava ŭ dačynieńni da Bakijeva rasśledavana i znachodzicca na stadyi pieradačy ŭ sud. «Dekretami časovaha ŭrada pazbaŭlenyja niedatykalnaści byłyja prezidenty Akajeŭ i Bakijeŭ. Siońnia ŭ dačynieńni da ich pravaachoŭnymi orhanami pravodzicca rasśledavańnie i stvorana pravavoje pole dla zavočnaha pryciahnieńnia ich da sudovaj adkaznaści. Bakijevu zavočna pradjaŭleny abvinavačańni za parušeńnie Kanstytucyi. Kryminalnaja sprava ŭ dačynieńni da jaho znachodzicca na stadyi pieradačy ŭ sud», — skazaŭ Bieknazaraŭ.

Jon taksama paviedamiŭ, što kryminalnyja spravy ŭ dačynieńni da Askara Akajeva ciapier adnaŭlajucca, bo jany zhareli padčas pažaru ŭ hienprakuratury.

«Na stadyi zaviaršeńnia taksama znachodziacca dziasiatki kryminalnych spraŭ u dačynieńni da svajakoŭ i najbližejšaha atačeńnia byłych prezidentaŭ», — adznačyŭ Bieknazaraŭ.

Jon padkreśliŭ, što zakanadaŭstva Kirhizii praduhledžvaje mahčymaść vyniasieńnia zavočnych pryhavoraŭ.

***

Nahadajem, skinuty prezident Kurmanbiek Bakijeŭ ź nieaficyjnaj žonkaj i dvuma dziećmi znachodzicca ŭ Biełarusi z 19 krasavika pa zaprašeńni Alaksandra Łukašenki. Na radzimie ŭ dačynieńni da jaho raspačata kryminalnaja sprava: Bakijeŭ abvinavačvajecca ŭ arhanizacyi zabojstvaŭ i złoŭžyvańni słužbovym stanoviščam.

Novyja ŭłady Kyrhyzstana dvojčy źviartalisia ŭ Hienieralnuju prakuraturu Biełarusi z prośbaj ab vydačy Bakijeva i dvojčy atrymali admovu. Jak zajaviŭ žurnalistam hienprakuror Biełarusi Ryhor Vasilevič, biełaruski bok nie znajšoŭ pravavych padstaŭ dla zadavalnieńnia prośby ab vydačy Bakijeva.

• 0
• 0
• 0
• 0
• 0
• 0
• 0
• 0