Jon byŭ adnoj ź lehiendaŭ minskaj Płoščy ŭ sakaviku 2006.
Jon byŭ adnoj ź lehiendaŭ minskaj Płoščy ŭ sakaviku 2006. Kažuć, što mienavita kučaravy viciablanin Dzianis Dzianisaŭ pastaviŭ na Kastryčnickaj pieršy namiot. Potym chłopca asudzili na 15 sutak. Niejki čas proźvišča Dzianisava było jašče na słychu.
Praz hod jon pravioŭ niekalki miesiacaŭ u SIZA pa abvinavačańni ŭ arhanizacyi hrupavych dziejańniaŭ, jakija parušajuć hramadski paradak. U toj samy 2006-y aktyvisty BUNTa na dzień naradžeńnia Vasila Bykava vyviesili ŭ Viciebsku dziasiatki bieł-čyrvona-biełych ściahoŭ. Heta i było «parušeńniem paradku».
Pa vyzvaleńni ź izalatara Dzianisaŭ źnik. Nam udałosia adšukać jaho ŭ rodnym Viciebsku. Chłopiec byŭ na pachavańni byłoj kiraŭnicy abłasnoha AHP Aleny Zaleskaj. Ciapier Dzianisaŭ karotka padstryžany, a vałasy ŭziała sivizna. Dzianisavu ŭžo za tryccać.
«Naša Niva»: Kudy prapali?
Dzianis Dzianisaŭ: Dy nikudy ja nie prapadaŭ. Vučusia pa Prahramie Kalinoŭskaha ŭ polskaj Łodzi ŭ mahistratury pa śpiecyjalnaści «Palitałohija. Stratehija biaśpieki». Taksama zajmajusia pierakładami na rasijskuju, polskuju, anhlijskuju. Zamovy ŭ asnoŭnym robiać handlovyja firmy. Zajmacca niejkaj dziejnaściu ŭ Polščy niama sensu. Dyj redka chto źviartajecca. Časam byvaje, što arhanizoŭvajem prahlady filmaŭ.
«NN»: A kali sioleta budzie novaja Płošča, pryjedziecie?
DD: Naŭrad ci. Mnie zdajecca, što ciapier situacyja trochu inšaja. Šmat ludziej na Płoščy nie budzie. Treba, kab ludziej niechta pavioŭ za saboj. Toj, za kaho jany hałasavali. A chto paviadzie? Sańnikaŭ, Ramančuk? Nie, jany nie paviaduć.
«NN»: U 2006 hodzie kandydaty byli macniejšymi?
DD: Na minułych vybarach byŭ adziny kandydat. A heta niejak abjadnoŭvała. Ciapier čym bolš budzie kandydataŭ, tym bolš heta budzie lehitymizavać siońniašniuju ŭładu. Chacia nie skažu, što kandydaty słabyja. U Niaklajeva dobraja kampanija, jakaja znachodzić vodhuki ŭ ludziej. U Ramančuka dobry analityčny rozum, jasnaja stratehija. Ale ci zdolny jon jaje danieści? Ź Milinkievičam vybarcy ŭžo znajomyja, u jaho jość elektaralnaja baza.
«NN: Dyk treba znoŭ adziny?
DD: Treba adzinstva ŭnutry ŭsich apazicyjnych siłaŭ. Peŭnaja ŭnutranaja kansalidacyja. Minimalnaje supolnaje bačańnie svaich płanaŭ i stratehii. Biez hetaha nam nie dasiahnuć pieramohi. Ciapier usie hadajuć, ci padtrymaje Rasija inšaha kandydata. Zdajecca, u rasijskim kiraŭnictvie zrazumieli, što im patrebnaja inšaja kiroŭnaja elita ŭ Biełarusi. Ale dla hetaha treba čas. Dumaju, što na hetych vybarach takaja taktyka ničoha nie daść. Adnak kali jana praciahniecca, u čym ja mocna sumniajusia, to vynik moža być.
«NN»: Dyk a žadańnia viarnucca ŭ palityku niama?
DD: Pahladzim. Pakul na mnie visić mahistratura. Mahčymaści svajho viartańnia ŭ Biełaruś, viadoma, nie adkidvaju.
Kamientary