Ź Biełarusi vysyłajuć bolš za dziesiać polskich śviataroŭ. U Mahilovie ŭžo raźvitalisia z probaščam — i z prajektam novaha kaścioła
Niahledziačy na publičnyja sustrečy z katalickimi ijerarchami i dekłaracyi ab «uzajemarazumieńni i zhodzie», u Biełarusi ŭsio čaściej nie praciahvajuć dazvoły na relihijnuju dziejnaść zamiežnym śviataram. Ułady Minska-Mahiloŭskaj archidyjacezii źviarnulisia z prośbaj da Alaksandra Łukašenki.
Jak paviedamlaje kanał «Chryścijanskaja vizija», piaci katalickim śviataram i adnamu manachu ŭ Minska-Mahiloŭskaj archidyjacezii, jakija majuć polskaje hramadzianstva, admovili ŭ praciahu dazvołu na słužeńnie ŭ Biełarusi. Pavodle infarmacyi kanała, ułady nie ŭzhadnili dalejšuju dziejnaść probašča parafii ŭ Iviancy ajca Lecha Bachaneka, dekana Staŭbcoŭskaha dekanata ksiandza Marjana Šeršania, dekana Miadzielskaha dekanata ksiandza Bahusłava Madžejeŭskaha, probašča parafii ŭ Naračy ajca Paŭła Lality, probašča parafii ŭ Salihorsku ajca Sabiesłava Tamały i manacha-kapucyna brata Vojciecha Urubleŭskaha.
Taksama raniej paviedamlałasia pra admovy ŭ dazvołach trom polskim śviataram u Viciebskaj i dvum u Pinskaj dyjacezijach.
15 žniŭnia padčas śviatoj Imšy ŭ mahiloŭskaj katedry parafijanie raźvitalisia z polskim śviatarom-daminikancam ajcom Ramanam Šulcam. Jon taksama nie atrymaŭ dazvoł na dalejšuju dziejnaść u Biełarusi i pavinien pakinuć krainu. Ajciec Raman Šulc słužyŭ u Biełarusi z 2007 hoda, z 2012‑ha byŭ administrataram parafii śviatoha Kazimira i śviatoj Jadvihi ŭ Mahilovie. Jon viadomy jak zasnavalnik i arhanizatar štohadovaha Ružancovaha kanhresa.
U raźvitalnaj Imšy pryniali ŭdzieł Apostalski nuncyj u Biełarusi arcybiskup Ińjacya Čefalja, mitrapalit Minska-Mahiloŭski arcybiskup Juzaf Stanieŭski i hienieralny vikaryj dyjacezii biskup Alaksandr Jašeŭski.
Jaho vyjezd, jak paviedamlaje katolik.life, stavić pad pytańnie dalejšaje isnavańnie supolnaści daminikanaŭ u horadzie. Dla praciahu dziejnaści ordenu nieabchodna mieć jak minimum dvuch manachaŭ, što va ŭmovach vostraha niedachopu śviataroŭ stanovicca niemahčymym. Prajekt budaŭnictva novaha kaścioła i klaštara daminikanaŭ u mahiloŭskim mikrarajonie «Kazimiraŭka», pra jaki stała viadoma vosieńniu 2025 hoda, ciapier budzie prypynieny.
Jak paviedamlaje «Chryścijanskaja vizija», u suviazi z masavymi niepraciahnieńniami dazvołaŭ mitrapalit Juzaf Stanieŭski nakiravaŭ prašeńnie na imia Alaksandra Łukašenki.
Napiaredadni raźvitalnaj imšy, 14 žniŭnia, Apostalski nuncyj i biełaruskija katalickija ijerarchi praviali aficyjnuju sustreču z uładami Mahiloŭskaj vobłaści i horada Mahilova. Jak paviedamlaje partał Catholic.by, padčas kruhłaha stała abmiarkoŭvalisia pytańni «ŭmacavańnia miru i zhody, mižkanfiesijnaha dyjałohu, zachavańnia histaryčnaj pamiaci».
Kiraŭnica ŭpraŭleńnia ideałahičnaj raboty Mahiloŭskaha abłvykankama Natalla Daškova ŭ svaim vystupleńni adznačyła, što Kaścioł źjaŭlajecca «nadziejnym partnioram» uładaŭ u spravie patryjatyčnaha vychavańnia i ŭmacavańnia tradycyjnych kaštoŭnaściaŭ. Pytańnie niepraciahnieńnia dazvołu na słužeńnie zamiežnym śviataram u aficyjnych paviedamleńniach ab sustrečy nie zhadvałasia.
«Naša Niva» — bastyjon biełaruščyny
PADTRYMAĆCiapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1515
Kamientary