«My ŭ šoku i razhublenaści». Što adbyvajecca na miescy pažaru ŭ domie ŭ centry Minska
Učora ŭviečary ŭ žyłym domie na Lenina, 9 adbyŭsia pažar. Zaharelisia haryšča i dach. Patušyć ahoń udałosia tolki nočču. Što adbyvajecca na miescy pažaru z samaj ranicy i što kažuć miascovyja žychary, piša Realt.by.
Vonkava z boku darohi zdajecca, što kvatery nie paciarpieli, ale z ulikam taho, što pažar tušyli vadoj bolš za 8 hadzin, ramontnyja raboty, vidać, spatrebiacca. Učastak aharodžany i ŭ dvary, puskajuć nie ŭsich — tolki žycharoŭ, ale nie ŭ padjezdy i kvatery. Paśla nočy zastałasia pałatka Čyrvonaha Kryža.
— Ja vyjšaŭ prahulacca, a viarnuŭšysia, užo zastaŭ pažar. Z taho momantu ŭ kvatery nie byŭ, — dzielicca chłopiec, jaki žyvie ŭ tarcy doma.
Praz 10 chvilin jaho ŭ supravadžeńni ratavalnikaŭ i milicyi ŭsio ž praviali da kvatery. Kaža, što žyllo nie paciarpieła, ale zastavacca nie dazvalajuć. Z saboj uziaŭ niekalki rečaŭ i parason.
— Dzie budziecie žyć?
— Dzieści…
Miascovaja žycharka ŭ hadach nie moža strymać śloz.
— Maja kvatera ŭ druhim padjeździe na apošnim paviersie. Nie mahu nie pieražyvać. Tam usio zalita.
Kacia ŭčora kala 18:40 vyjšła z domu na prahułku. Kali abiarnułasia, ubačyła dym z dachu i mužčynu z susiedniaha padjezda, jaki vyklikaŭ pažarnych.
— Pačali ź im razmaŭlać, jon skazaŭ, što adčuŭ niepryjemny pach i vyjšaŭ na vulicu. My nie čakali, što heta abierniecca takim pažaram, paśpieli tolki zabrać sabaku z domu i adklučyć elektraprybory. Adrazu ž paśla hetaha pryjechała pažarnaja, i vielmi chutka ŭsia dachavaja kanstrukcyja mocna zaharełasia, i ahoń pačaŭ pierakidvacca z padjezda ŭ padjezd. Kacia była na miescy da druhoj nočy, bo miesca nad nami ŭvieś hety čas praciahvała hareć. Potym dziaŭčyna pajšła načavać da siabroŭki.
Jana žyvie na 6 paviersie adrazu pad mansardaj.
— My pakul što ŭ šoku i razhublenaści, u nas usio zastałosia ŭ kvatery: darahaja technika, ježa, jakuju niadaŭna zakupili na doŭhi pieryjad, usie dakumienty. Razumiejem, vady vylili šmat.
Jašče adna žančyna tolki vyjšła sa svajoj kvatery na čaćviortym paviersie, kudy jaje supravadžali MNS i milicyja.
— Na padłozie vada, jak u basiejnie. Špalery ŭsio visiać. Nie ŭjaŭlaju, jak u ludziej na šostym uzroŭni.
Pavodle jaje słoŭ, ahoń pačaŭsia na mansardzie 6‑ha paviercha. Jany z mužam adčuli pach dymu, ubačyli spačatku adnu pažarnuju mašynu, potym druhuju.
— Pierakryćci draŭlanyja, tamu ahoń raspaŭsiudžvaŭsia imhnienna. Muž paśpieŭ schapić sabaku, chutka vybiehli z padjezda. Ale ŭ mianie ŭ kvatery zastavaŭsia kot, jon dzieści schavaŭsia. Ja tak kryčała, prasiła mianie puścić za im. Vialiki dziakuj chłopcu z MNS — jon mnie jaho vyratavaŭ.
Kali dazvolać viarnucca ŭ dom, nieviadoma. Ludzi biaruć dakumienty i iduć da svajakoŭ.
Žančyna z doma №37 taksama čakaje čarhi zajści ŭ kvateru. Kaža, što ačah byŭ u majsterni pad arkaj.
— Kamunikacyi staryja, usio — pad zamienu. Nam jakraz pavinny byli mianiać dach, navat materyjał zakupili — lažyć u dvary. Zdajecca, što sprava ciapier pojdzie chutčej.
U dvary pracujuć nie tolki ratavalniki i milicyja, ale i aktyŭna prybirajuć supracoŭniki ŽES.
Z-za likvidacyi pažaru pakul niama vady ŭ čatyroch damach — na Marksa, 37 i 39, a taksama na Lenina, 7 i 9. Mašyna ź pitnoj vadoj užo staić u dvary.
Ciapier čytajuć
Ź psichbalnicy źbieh były načalnik Hancavickaj milicyi13
Ź psichbalnicy źbieh były načalnik Hancavickaj milicyi
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary