Smartfony faktyčna pierapisali etykiet vizitaŭ, prynamsi dla moładzi. Kali raniej prychod u hości pačynaŭsia sa zvanka ŭ dźviery abo stuku ŭ ich, to ciapier — z paviedamleńnia ŭ miesiendžary ci telefanavańnia.
Zvyčajnaje dla mnohich ludziej dziejańnie — pazvanić u dźviery abo pastukać, kali prychodziš u hości, — pastupova stračvaje papularnaść siarod pradstaŭnikoŭ pakaleńnia Z. Zamiest hetaha maładyja ludzi ŭsio čaściej dasyłajuć paviedamleńnie abo telefanujuć haspadaru doma, kab paviedamić pra svoj prychod.
Pra heta śviedčyć apytańnie, praviedzienaje ŭ Vialikabrytanii kampanijaj Uswitch.com, na jakoje źviartaje ŭvahu Daily Mail. U daśledavańni ŭdzielničali 2000 čałaviek. U siarednim 14% apytanych zajavili, što addajuć pieravahu telefanavańniu abo paviedamleńniu zamiest vykarystańnia dźviarnoha zvanka.
Adnak pavodziny istotna zaležać ad uzrostu. Siarod pradstaŭnikoŭ pakaleńnia Z, jakija naradzilisia prykładna pamiž siaredzinaj 1990‑ch i pačatkam 2010‑ch hadoŭ, tak robić užo tracina apytanych (33%). Siarod milenijałaŭ hety pakazčyk składaje 23%.
U ramkach apytańnia daśledčyki taksama spytali respandentaŭ ab pryčynie ich vybaru.
Dla mnohich maładych ludziej paviedamleńnie ŭ telefonie zdajecca mienš nazojlivym sposabam paviedamić pra svoj prychod. Amal čatyry ź dziesiaci (39%) pradstaŭnikoŭ pakaleńnia Z, jakija pišuć tekstavyja paviedamleńni abo telefanujuć, a nie karystajucca zvankom u dźviery, adznačyli, što tak jany mienš turbujuć haspadaroŭ. Jašče kala piataj častki (19%) ličać, što zvanok u dźviery vyhladaje zanadta aficyjnym.
Niekatoryja ŭdzielniki apytańnia taksama adznačyli praktyčny bok pytańnia. Amal čverć maładych ludziej (23%) zajaviła, što siabry chutčej zaŭvažać paviedamleńnie abo pačujuć telefonny zvanok, čym stuk u dźviery.
Ekśpierty źviazvajuć hetuju tendencyju z tym, što smartfony stali centralnym instrumientam sacyjalnych znosin. Kali raniej karotkija rytuały sustrečy adbyvalisia niepasredna kala ŭvachodnych dźviarej, to ciapier značnaja častka takoj kamunikacyi pieramiaściłasia ŭ mabilnyja prahramy i miesiendžary.
no one knocks anymore
Heta stvaraje paradaksalnuju situacyju ŭ śfiery technałohij: u toj čas jak pryłady dla ŭvachodnych dźviarej stanoviacca ŭsio bolš daskanałymi — z kamierami, dostupam da Wi-Fi i sistemami hałasavoj suviazi — ludzi karystajucca imi ŭsio radziej.
Kamientary
I tradycyjna pnu za hučnuju, ale ciemrašalskuju antynavukovuju teoryju pakaleńniaŭ, hulniu na stereatypizacyi ludziej. Zvyčki nie źviazany tolki z dataj naradžeńnia, a raspaŭsiudžvajucca pamiž ludziej roznych pakaleńniaŭ. U moładzi efiekt zvyčajna macniej, bo im nie treba pieravučvacca sa starych zvyčak.