Jak Narviehija amal całkam admoviłasia ad bienzinavych aŭto i ź jakimi prablemami sutyknułasia paśla
U Narviehii ŭžo 98,6% novych aŭtamabilaŭ — elektramabili. Dla bolšaści jeŭrapiejskich krain takaja ličba pakul vyhladaje niedasiažnaj metaj. Adnak dośvied krainy pakazvaje nie tolki pieravahi amal poŭnaj admovy ad bienzinavych i dyzielnych mašyn, ale i novyja prablemy. Z padrabiaznaściami znajomić Die Welt.
Praces admovy ad ruchavikoŭ unutranaha zharańnia ŭ Narviehii nie byŭ vypadkovym — heta vynik paśladoŭnaj dziaržaŭnaj palityki, jakaja pačałasia jašče ŭ 2001 hodzie. Na toj momant, kali elektramabili jašče nie vypuskalisia masava, urad krainy vyzvaliŭ ich pakupnikoŭ ad 25‑pracentnaha PDV i vysokaha rehistracyjnaha padatku, što tradycyjna robić novyja aŭtamabili vielmi darahimi.
Uładalniki elektrakara atrymali i šerah inšych pieravah: ilhotnyja ŭmovy apłaty płatnych daroh i biaspłatnyja parkoŭki, a taksama mahčymaść karystacca pałosami dla hramadskaha transpartu.
Adnak u pieršyja hady heta nie pryniesła vialikaha efiektu. Rynak prapanoŭvaŭ vielmi mała madelaŭ, a sietka zaradnych stancyj zastavałasia niedastatkovaj. Situacyja pačała źmianiacca tolki ŭ 2010‑ch hadach, kali dziaržava i pryvatnyja kampanii pačali maštabna inviestavać u infrastrukturu. Vynikam stała razhalinavanaja sietka z 10 000 stancyj chutkaj zaradki.
Akramia hetaha, u 2017 hodzie na zakanadaŭčym uzroŭni było zamacavana prava žycharoŭ šmatkvaternych damoŭ na ŭstanoŭku zaradnych punktaŭ. Heta dapamahło likvidavać adnu z hałoŭnych pieraškod dla pierachodu na elektratranspart.
Ale klučavym faktaram pierachodu stała sistema «padatkaabkładańnia pavodle škody». Paralelna ź ilhotami na elektrakary ŭrad rezka pavyšaŭ padatki na aŭtamabili z ruchavikami ŭnutranaha zharańnia, zychodziačy z abjomaŭ ich vykidaŭ CO₂. U vyniku kupla tradycyjnaha aŭto stała ekanamična niavyhadnaj, asabliva z ulikam tannaj elektraenierhii, jakuju Narviehija atrymlivaje z ułasnych hidraelektrastancyj.
Narviehija zachoŭvała adziny kurs niezaležna ad źmieny ŭradaŭ. Hetamu spryjała adsutnaść ułasnaj aŭtamabilnaj pramysłovaści, jakuju treba było b abaraniać, i najaŭnaść finansavych reziervaŭ dziaržaŭnaha naftavaha fondu.
Praŭda, ciapier, kali dola elektramabilaŭ na rynku novych aŭto nabliziłasia da sta pracentaŭ, ułady pačali pastupova zhortvać častku lhot. Z 2023 hoda dla elektramabilaŭ znoŭ uviedzieny rehistracyjny padatak, choć i značna mienšy, čym dla tradycyjnych aŭtamabilaŭ.
Vyzvaleńnie ad PDV dziejničaje tolki na sumu da 25 500 jeŭra (u ekvivalencie) i pavinna całkam źniknuć da 2028 hoda. Inšyja pryvilei taksama byli skasavanyja abo abmiežavanyja — naprykład, karystańnie pałosami dla aŭtobusaŭ, bo heta pačało stvarać prablemy dla ruchu hramadskaha transpartu.
Pierachod narviežcaŭ na elektramabili akazaŭ stanoŭčy ŭpłyŭ na ekałohiju. U paraŭnańni z 2010‑mi hadami vykidy vuhlakisłaha hazu ad aŭtamabilnaha transpartu ŭ krainie źnizilisia prykładna na tracinu. Adnačasova palepšyłasia jakaść pavietra ŭ haradach: skaracilisia vykidy aksidaŭ azotu i kolkaść drobnych ćviordych čaścinak.
Prablemy pierachodu
Tym nie mienš masavy pierachod na elektryčnaść stvaryŭ novyja prablemy. Pieršaj ź ich stała nahruzka na enierhasietki ŭ pikavyja hadziny, što prymusiła apierataraŭ uvodzić hnutkija načnyja taryfy. Druhi faktar — klimatyčny: u surovych umovach poŭnačy elektramabili stračvajuć častku zapasu chodu, što patrabuje jašče bolš ščylnaj sietki zaradnych stancyj.
Akramia taho, ahulnaje spažyvańnie elektryčnaści ŭ krainie da 2040 hoda moža vyraści na 60%. Pry hetym mahčymaści dla dalejšaha raźvićcia hidraenierhietyki amal vyčarpanyja, a budaŭnictva naziemnych vietranych elektrastancyj sutykajecca z supracivam častki hramadstva. U vyniku ŭ krainie ŭžo pačalisia dyskusii pra mahčymy ŭvachod u atamnuju enierhietyku.
Niekatoryja ekśpierty taksama źviartajuć uvahu na pytańni biaśpieki. Poŭnaja zaležnaść transpartu ad elektrasietki moža stać prablemaj u vypadku kryzisaŭ abo vajennych pahroz. Tamu navat prychilniki elektryfikacyi dapuskajuć, što asobnyja śfiery, naprykład armija abo palicyja, mohuć zachavać inšyja typy ruchavikoŭ.
Asobnym vyklikam zastajecca vytvorčaść batarej. Jeŭrapiejskija krainy pakul nie stvaryli dastatkova mahutnaha i niezaležnaha łancužka pastavak. Tamu zaležnaść ad azijackich vytvorcaŭ, pieradusim ad Kitaja, zastajecca vielmi vysokaj. Adnačasova raście i prysutnaść kitajskich aŭtamabilnych brendaŭ na narviežskim rynku.
Dyskusii vyklikajuć i pytańni kibierbiaśpieki. Niekatoryja daśledavańni pakazali, što asobnyja transpartnyja srodki kitajskaj vytvorčaści mohuć mieć uraźlivaści, jakija dazvalajuć dystancyjnaje ŭmiašańnie ŭ ich pracu. Nie mienš aktualnaj zastajecca i prablema pierapracoŭki vykarystanych akumulataraŭ, dla jakoj pakul niama idealnaha rašeńnia.
Niahledziačy na hetyja składanaści, Narviehija nie źbirajecca viartacca da bienzinavych i dyzielnych aŭtamabilaŭ. Naadvarot, kraina rychtujecca raspaŭsiudzić elektryfikacyju na inšyja vidy transpartu. U najbližejšyja hady ŭłady płanujuć aktyŭna pieravodzić na elektraruchaviki i bijapaliva hruzavyja pieravozki. Dla hruzavikoŭ užo budujecca śpiecyjalizavanaja sietka zaradnych stancyj. Značnaja častka paromaŭ taksama pierajšła na elektryčnuju ciahu. Pakul što składaniej vyhladaje situacyja ź vialikimi kantejniernymi sudnami. Dla ich daviadziecca šukać inšyja typy ruchavikoŭ.
Ciapier čytajuć
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu8
«Ja staŭ ščaślivy». Praca na budoŭli prynosić dobryja hrošy, a hramadskaja aktyŭnaść — maralnuju siłu. Były kalinoviec Kuś raskazaŭ pra toje, jak viarnuŭ unutranuju raŭnavahu
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary
Šmat koniej - šmat mietanu, parnikovy efiekt i paciapleńnie klimatu.
Šmat aŭsa - šmat traktaroŭ u poli i dalej łancužok paciapleńnia klimatu .
Šmat aharodaŭ - šmat datacyj i nasieńnia, šmat datacyj i nasieńnia - šmat dadatkovaha enierhaspažyvańnia i dalej łancužok paciapleńnia klimatu.
))