Novaja lidarka Vieniesueły pad kantrolem Biełaha doma praviała čystki va ŭładzie paśla źviaržeńnia Madura

Jak piša The New York Times u svaim rasśledavańni, u Vieniesuele pačałosia samaje maštabnaje za apošnija dziesiacihodździ pieraraźmierkavańnie ŭłady.

Ale hety praces nie maje ničoha ahulnaha z demakratyzacyjaj. Naadvarot, byłaja paplečnica Madura, jakaja jašče niadaŭna vystupała z pałymianymi antyimpieryjalistyčnymi pramovami, ciapier pieratvaryłasia ŭ partniora administracyi Trampa i mietadyčna źniščaje tych, chto jašče ŭčora trymaŭ jaje režym na płavu.

Źniščeńnie spadčyny Madura

Madura vyvieźli ŭ ńju-jorkskuju turmu publična i z pakazalnaj žorstkaściu. Jahonych ža paplečnikaŭ prybirajuć pastupova i bieź lišniaha šumu.

Za apošnija try miesiacy Dełsi Radryhies źmianiła 17 ministraŭ, zamianiła vajennaje kiraŭnictva i pryznačyła novych dypłamataŭ. Pad jaje kiraŭnictvam byli zatrymanyja jak minimum try aliharchi, ciesna źviazanyja ź siamjoj Madura, a bolšaść jahonych svajakoŭ byli adchilenyja ad naftavych kantraktaŭ i pazbaŭlenyja dostupu da dziaržaŭnych ŚMI.

Na ich miescy Radryhies pryznačaje ŭłasnych łajalistaŭ abo padtrymlivaje biznesmienaŭ, jakija abaviazanyja svaim pośpiecham asabista joj. Adnačasova jana šyroka adčyniła dźviery dla amierykanskich inviestaraŭ u naftavuju i hornazdabyŭnuju haliny.

Vieniesuelskaja apazicyja zajaŭlaje, što zamiest viartańnia da demakratyi, Radryhies prosta ŭmacoŭvaje ŭłasnuju ŭładu. I robić jana heta nie stolki pa ŭłasnaj voli, kolki pad źniešnim ciskam.

Kiravańnie pad dułam pistaleta

Niekalki vysokapastaŭlenych vieniesuelskich čynoŭnikaŭ u razmovie z The New York Times paraŭnali kiravańnie Dełsi Radryhies z «pracaj ź pistaletam la skroni». Paśla demanstratyŭnaha zachopu Madura Bieły dom nieadnarazova pahražaŭ Karakasu novym uvarvańniem, kali novyja lidary admoviacca ad supracoŭnictva.

Ciapier Radryhies vykarystoŭvaje hetuju pahrozu jak instrumient dla raspravy z unutranymi kankurentami, jakija raniej ličylisia niedatykalnymi. Heta akazałasia biasprojhryšnaj kambinacyjaj dla abodvuch bakoŭ: administracyja Trampa zvodzić rachunki z vorahami, jakija hadami kidali joj vyklik, a Radryhies cemientuje svaju ŭładu, pazbaŭlajučysia ad staroj hvardyi.

U Biełym domie nie chavajuć svajho zadavalnieńnia. «My vydatna supracoŭničajem z prezidentkaj Dełsi Radryhies, — zajaviła pres-sakratarka Hanna Keli. — Nafta pačynaje pastupać, i vialikija hrošy, jakich nie bačyli šmat hadoŭ, chutka pačnuć vielmi dapamahać narodu Vieniesueły».

Pieratvareńnie Vieniesueły z hałoŭnaha voraha ZŠA ŭ pratektarat adbyłosia nastolki imkliva, što bolšaść vieniesuelcaŭ dahetul nie mohuć u heta pavieryć. Apytańni pakazvajuć, što bolšaść vitaje kaniec 13‑hadovaj dyktatury Madura, ale z takoj ža padazronaściu stavicca da samoj Radryhies, jakaja nikoli nie zajmała vybarnych pasad. Dla asiarodździa ž zrynutaha prezidenta nastupili časy strachu i niavyznačanaści. Niekatoryja byłyja paplečniki Madura ŭžo trapili pad nahlad śpiecsłužbaŭ, inšyja imknucca nie źjaŭlacca ŭ stalicy i razhladajuć mahčymaść uciokaŭ z krainy.

Novyja haspadary i staryja vorahi

Siarod tych, chto prajhraŭ ad padzieńnia Madura, nie tolki jaho svajaki i aliharchi, ale i zakaraniełyja čavisty — vieterany sacyjalistyčnaha ruchu, stvoranaha Uha Čaviesam u 1990-ja.

Adnym ź niamnohich, chto advažyŭsia publična krytykavać Radryhies, staŭ prapahandyst Marya Silva. Jaho dziaržaŭnuju teleprahramu zakryli, a jon sam ciapier vymušany viaščać na marhinalnych radyjochvalach.

«Čort, praciahvajcie vykonvać zahady hrynha, davajcie! — aburaŭsia Silva ŭ efiry. — Prosta lažcie pierad imi i skončycie z hetym».

Asiarodździe Madura poŭnicca čutkami pra zdradu. Lohkaść, ź jakoj amierykancy vykrali prezidenta z dobra achoŭvajemaj vajennaj bazy, sparadziła padazreńni, što jaho prosta «zdali» tyja, chto atrymaŭ vyhadu ad padzieńnia. Choć pramych dokazaŭ udziełu Radryhies u zmovie niama, toj fakt, što administracyja Trampa razhladała jaje jak pierajemnicu jašče z 2025 hoda i mieła ź joj niepramyja kantakty, tolki padahravaje hetyja padazreńni.

Čystka pačałasia amal adrazu paśla zachopu ŭłady. Samy blizki da Madura ministr, hienierał Uładzimir Padryna Łopies, byŭ zvolnieny z pasady ministra abarony. Syn Madura i pasynak byli adchilenyja ad naftavych ździełak. Hienieralny prakuror Tarek Uiljam Saab byŭ zvolnieny dvojčy.

Pieršaj achviaraj ź liku biznes-elity staŭ kałumbijski aliharch Aleks Saab, jaki zarabiŭ miljardy na charčovych i naftavych kantraktach z režymam. Ciapier jaho los, uklučajučy mahčymuju ekstradycyju ŭ ZŠA, vyrašajecca ŭ pieramovach pamiž Radryhies i Vašynhtonam. Padobnaja dola napatkała i inšych blizkich da siamji Madura biznesmienaŭ — Raula Horyna i Uiłmiera Rupierci.

Niepataplalny Dyjasdada Kabielja

Adnak jość čałaviek, jakoha čystki abyšli bokam. Heta ministr unutranych spraŭ Dyjasdada Kabielja, jaki faktyčna kiravaŭ usim represiŭnym aparatam kirujučaj partyi.

Jon znachodzicca ŭ vyšuku ŭ ZŠA pa abvinavačvańni ŭ narkahandli, i ŭ minułym nieadnarazova kanfliktavaŭ z Radryhies. Ale jaho suviazi z uzbrojenymi praŭładnymi hrupoŭkami robiać jaho adnačasova i kaštoŭnym sajuźnikam, i niebiaśpiečnaj mišeńniu.

Kabielja zrabiŭ svoj vybar. Zamiest taho, kab kinuć vyklik novaj uładzie, jon chutka pierafarmatavaŭsia z «partyjnaha buldoha» ŭ «patryjatyčnaha haranta stabilnaści». Na adnym ź mitynhaŭ jon publična zaklikaŭ «supravadžać našu siastru Dełsi» i «całkam davierycca zdolnaściam, pracavitaści i sumleńniu tavaryša Dełsi».

Takaja adaptacyja pryniesła plon. Jaho svajaki zachavali svaje pasady na čale śpiecsłužbaŭ i padatkovaj słužby, a dačka navat stała novym ministram turyzmu.

Bolšaść ža inšych čynoŭnikaŭ prosta vykinuli svoj zajaŭleny antyimpieryjalizm na śmietnik historyi dziela šancu zastacca va ŭładzie.

• 1
• 0
• 16
• 3
• 0
• 0
• 1
• 1