Chto ź ministraŭ u kadravaj karusieli Łukašenki moža nie chvalavacca
U toj čas jak kiraŭniki ekanamičnych viedamstvaŭ źmianiajucca ledź nie kožny hod, asnoŭny kaściak siłavoha błoku zastajecca niaźmiennym užo bolš za piać hadoŭ.
9 krasavika Łukašenka pravioŭ novyja pryznačeńni čynoŭnikaŭ. Vice-premjeram, adkaznym va ŭradzie za budaŭnictva, staŭ Alaksandar Cierachaŭ, ministram kultury — Marat Markaŭ (raniej byŭ ministram infarmacyi). Novym ministram infarmacyi staŭ Dźmitry Žuk, da hetaha jon uznačalvaŭ vydaviecki dom «Biełaruś siehodnia», to bok vypuskaŭ asnoŭnuju dziaržaŭnuju hazetu.
U Biełarusi niekatorych profilnych čynoŭnikaŭ mianiajuć ledź nie kožny hod, a inšyja zachoŭvajuć svaje pasady daŭžej, čym adzin prezydencki termin — 5 hadoŭ. «Svaboda» pahladzieła, chto ź ciapierašnich ministraŭ i kiraŭnikoŭ upłyvovych dziaržaŭnych ustanovaŭ — asnoŭnyja «doŭhažychary» na svajoj pasadzie.
Niaźmienny siłavy blok i ministar sportu
Były vajskoviec i supracoŭnik słužby biaśpieki Łukašenki Siarhiej Kavalčuk zajmaje svaju pasadu najdaŭžej z usich dziejnych ministraŭ — bolš za 8 hadoŭ. Jaho pryznačyli jašče ŭ sakaviku 2018-ha, kali Biełaruś biez usialakich prablem mahła vystupać na mižnarodnych spabornictvach pa ŭsim śviecie. Uvodzili sankcyi, biełaruskija spartoŭcy ŭsio radziej mahli jeździć vystupać u zachodnija krainy, a były siłavik Kavalčuk zastavaŭsia ministram. Jahonaje imia ŭniesienaje ŭ sankcyjnyja śpisy Litvy, Łatvii, Estonii i Ŭkrainy.
Usie inšyja kiraŭniki ministerstvaŭ i ŭpłyvovych viedamstvaŭ, jakija zachoŭvajuć svaje pasady 5 hadoŭ i bolej, — heta siłavy blok.
Viktara Chrenina Łukašenka pryznačyŭ ministram abarony ŭ studzieni 2020 hodu, na pasadzie jon 6 hadoŭ i 3 miesiacy.
Vajskoŭcaŭ pry ministry Chreninie aktyŭna załučali ŭ zadušeńnie pratestaŭ u 2020 hodzie. Jany achoŭvali abjekty padčas masavych pratestaŭ i ŭdzielničali ŭ «začystkach». Naprykład, 11 žniŭnia 2020 hodu ad ahniastrelnaha ranieńnia zahinuŭ Hienadź Šutaŭ. Paśla jaho paśmiarotna asudzili, a paciarpiełymi ŭ spravie prachodzili vajskoŭcy siłaŭ specyjalnych aperacyjaŭ praparščyk Halicyn i kapitan Haŭryłaŭ. Sa słovaŭ siabra Šutava, Alaksandra Kardziukova, jakraz hetyja vajskoŭcy stralali ŭ ich, u vyniku čaho zahinuŭ Hienadź. Alaksandra Kardziukova asudzili na 10 hadoŭ kalonii, jon dahetul za kratami.
Staršynia KDB Ivan Cierciel zachoŭvaje svaju pasadu 5 hadoŭ i 7 miesiacaŭ, jaho pryznačyli kiravać u vieraśni 2020 hodu. Da pryznačeńnia Cierciel zajmaŭ roznyja kiroŭnyja pasady ŭ KDB, a taksama niepraciahły čas uznačalvaŭ Kamitet dziaržaŭnaha kantrolu.
Ivan Kubrakoŭ uznačalvaje MUS z kanca kastryčnika 2020 hodu, zajmaje pasadu 5 hadoŭ i 5 miesiacaŭ. Kubrakova pryznačyli na zamienu Juryju Karajevu, jaki pabyŭ ministram 1 hod i 4 miesiacy. Čamu Łukašenka zamianiŭ Karajeva prosta padčas pratestaŭ, dahetul nie zusim zrazumieła. Ale ŭ vyniku mienavita Ivana Kubrakova nazyvajuć architektaram systemy zadušeńnia pratestaŭ u Miensku. Da pryznačeńnia ministram jon kiravaŭ staličnymi siłavikami.
Uładam mianiać jaho ciapier niavyhadna, miarkuje pradstaŭnik abjadnańnia byłych siłavikoŭ BelPol Uładzimier Žyhar.
«Jon kiravaŭ zadušeńniem pratestaŭ u Miensku z kastryčnika 2020 hodu. Da taho kiravali inšyja ludzi, adnak ich efektyŭnaść ułady aceńvali jak nizkuju. Kali pryznačyli Kubrakova, mnohaje z taho, što jon dahetul realizoŭvaŭ u Miensku, pačało ažyćciaŭlacca ŭ inšych miescach. Jon padklučaŭ taki žyviolny entuzijazm, sprabavaŭ prymianiać niejkuju kreatyŭnaść u takich umovach, i, viadoma ž, heta zadavalniała Łukašenku», — havoryć Žyhar.
Jašče adzin «doŭhažychar» na adkaznaj pasadzie — dziaržaŭny sakratar Savietu Biaśpieki Alaksandar Valfovič. Jaho pryznačyli ŭ studzieni 2021 hodu, hetuju pasadu były pieršy namieśnik ministra abarony zajmaje 5 hadoŭ i 2 miesiacy.
Taksama bolš za 5 hadoŭ svaje pasady zajmajuć staršynia Śledčaha kamitetu Dźmitry Hara (5 hadoŭ i 1 miesiac) i kiraŭnik Ministerstva nadzvyčajnych sytuacyjaŭ Vadzim Siniaŭski (5 hadoŭ i 1 miesiac).
Paśla 2020 hodu pamianialisia 5 ministraŭ sielskaj haspadarki i 5 ministraŭ pramysłovaści, 4 ministry infarmacyi, 3 ministry kultury i 3 kiraŭniki MZS.
Čamu kiraŭnictva siłavoha bloku tak doŭha nie mianiajuć
Pradstaŭniki siłavoha bloku tak doŭha zachoŭvajuć svaje pasady, bo ŭ 2020 hodzie jany dapamahli Łukašenku zachavać uładu i jon na ich trymajecca, kaža namieśnik kiraŭnicy Abjadnanaha pierachodnaha kabinetu, były ministar kultury Pavał Łatuška.
«Heta padmurak Łukašenki, jaki ŭratavaŭ jaho ad straty ŭłady ŭ 2020 hodzie. Siłaviki harantujuć jamu dalejšuju adnosnuju biaśpieku na ŭzurpavanaj pasadzie. Jon nie ryzykuje iści tut na źmieny ŭžo praciahły čas, bo heta destabilizuje sytuacyju ŭ siłavym bloku. Ale paśla padziejaŭ 2020 hodu jon nakiravaŭ u adstaŭku staršyniu KDB Valera Vakulčyka, źniaŭ dziaržaŭnaha sakratara Andreja Raŭkova, jaki vykazaŭ dumku ab niemetazhodnaści ŭžyvańnia siły da pratestoŭcaŭ, u 2021 hodzie źniaŭ staršyniu Śledčaha kamitetu Ivana Naskieviča, bo toj prapanoŭvaŭ raspačać spravy suprać siłavikoŭ — udzielnikaŭ represijaŭ. Adpraviŭ u adstaŭku kiraŭnika MUS Juryja Karajeva, bo jon byŭ vielmi taksyčny. Ale im znajšli inšyja pasady — u cyvilnych strukturach, daŭšy prava na druhoje žyćcio ŭ hetych strukturach», — pryhadvaje Pavał Łatuška.
Pavodle pradstaŭnika BelPol Uładzimiera Žyhara, z hledzišča ŭładaŭ siłavy blok dobra pracuje, bo nikoha nie davodzicca pieraŭpeŭnivać spynić represii.
«Da toj častki pracy, jakaja daručanaja i Kubrakovu, i Ciercielu, u Łukašenki minimum pytańniaŭ. Nichto nie prychodzić z prapanovaj adpuścić hajki, represii tolki ŭzmacniajucca. Režym nia choča budaražyć hetuju systemu novymi pryznačeńniami. Novy čałaviek budzie niešta rabić pa-inšamu, mohuć być kadravyja źmieny — systemie heta nia treba. Inšych ministraŭ mianiajuć, bo tam nizkaja efektyŭnaść. A tut z hledzišča systemy zadača vykonvajecca, arhanizoŭvajecca biaśpieka režymu. Adnak heta kali kazać pra palityčnyja spravy i palityčny aspekt, nie pra złačynnaść ahułam. Bo tam jakraz sytuacyja paharšajecca ŭ šerahu kirunkaŭ», — zaznačaje Žyhar.
Ciapier čytajuć
Stvaralnica sietki kafe Myloverberry raspaviała, jak razam z mužam zahnała paśpiachovy biznes u daŭhi1
Kamientary