Biełaruskaje telebačańnie pakaža vielikodnyja katalickija nabaženstvy
Biełaruskija kataliki zmohuć pahladzieć vielikodnyja nabaženstvy pa telebačańni 4 i 5 krasavika.
4 krasavika ŭviečary pa kanałach «Biełaruś 1» i «Biełaruś 24» a 23:20 pakažuć Paschalnuju vihiliju — hałoŭnuju liturhiju hoda ŭ katalikoŭ. Jana budzie prachodzić u minskim archikafiedralnym kaściole Najśviaciejšaj Panny Maryi, a słužbu ŭznačalić mitrapalit Iosif Stanieŭski.
Taksama ŭ hety ž dzień a 21:00 kanały «Biełaruś 4 Viciebsk» i «Viciebsk» buduć tranślavać vihiliju z kaścioła Śviatoha Kazimira ŭ Lepieli.
Paschalnaja vihilija — heta centralnaje bohasłužeńnie Vialikaj suboty. Jana pačynajecca ź liturhii śviatła, kali aśviačajuć ahoń i vialikuju śviečku (Paschał), što simvalizuje Chrysta. Zatym hučyć staražytny himn pra ŭvaskresieńnie, paśla čaho idzie liturhija chryščeńnia z aśviačeńniem vady.
5 krasavika a 08:40 na kanale «Biełaruś 1» budzie pakazana śviatočnaje vinšavańnie ź Vialikadniem ad mitrapalita Iosifa Stanieŭskaha.
A 16:20 na «Biełaruś 3» možna budzie pahladzieć tranślacyju z Vatykana — vielikodnaje pasłańnie i dabrasłavieńnie Papy Rymskaha «Horadu i śvietu».
Kamientary