Pasoł ZŠA ŭ Izraili: Było b narmalna, kali b Izrail kantralavaŭ ziemli ad Niła da Jeŭfrata

Padčas razmovy surazmoŭcy zakranuli łozunh «ad raki da mora» — tak nazyvajuć terytoryju pamiž rakoj Iardan i Mižziemnym moram, dzie siońnia znachodziacca Izrail i paleścinskija terytoryi. Abmiarkoŭvajučy hety łozunh, Karłsan zhadaŭ biblejskuju temu «abiacanaj ziamli», apisanaj u Knizie Byćcia. (Chakabi, pierš čym stać palitykam i pasłom, nahadajem, byŭ baptysckim prapaviednikam.) Voś frahmient hetaj razmovy.

Takier Karłsan: Vy źviartajeciesia da Knihi Byćcia. U 15‑j hłavie havorycca pra Aŭrama (heta jašče da taho, jak jon staŭ Aŭraamam). Aŭram atrymlivaje ad Boha viestku, što jaho naščadki atrymajuć u spadčynu hetuju ziamlu. I papraŭcie mianie jak teołaha, kali ja pamylajusia. Ale tam havorycca: ad Jeŭfrata da Niła. Zdajecca, tak. Heta ŭklučała b, pa sutnaści, uvieś Blizki Uschod. Heta byŭ by Levant — Izrail, Iardanija, Siryja, Livan. Taksama vialikija častki Saudaŭskaj Aravii i Iraka.

Chakabi: Ja nie ŭpeŭnieny, što heta zachodzić tak daloka.

Karłsan: To-bok heta była b vialikaja terytoryja, dzie znachodziacca inšyja krainy.

Chakabi: Ale mienavita hety kankretny rehijon, pra jaki my ciapier havorym. Izrail — heta ziamla, jakuju Boh daŭ praz Aŭraama narodu, jaki jon abraŭ. Heta byŭ narod, miesca i meta. Možna tak na heta hladzieć. […]

Karłsan: Vy trojčy kazali, što Boh daŭ hetuju ziamlu hetamu narodu. I tamu całkam spraviadliva z majho boku z pavahaj spytać: pra jakuju ziamlu vy kažacie? Tamu što ja tolki što pieračytaŭ 15‑iu hłavu Knihi Byćcia. I tam, nakolki ja razumieju, skazana — ad Niła da Jeŭfrata. Što, znoŭ ža, faktyčna ŭvieś Blizki Uschod. Takim čynam, Boh daŭ hetuju ziamlu svajmu narodu, habrejam, abo nie daŭ. Vy kažacie, što jon heta zrabiŭ. Što heta značyć? Ci maje Izrail prava na hetuju ziamlu? Tamu što vy spasyłajeciesia na Knihu Byćcia. Vy kažacie, što heta pieršapačatkovy dakumient ab pravie ŭłasnaści.

Chakabi: Było b narmalna, kali b jany zabrali jaje ŭsiu. Ale ja nie dumaju, što heta toje, pra što my siońnia havorym. […]

Karłsan: Vy kažacie, što ciapierašni ŭrad Izraila maje maralnaje prava zachoplivać toje, što ciapier źjaŭlajecca krainami inšych ludziej.

Chakabi: Nie, ja hetaha nie kazaŭ.

Karłsan: Tady što vy kažacie?

Chakabi: Ja prosta kažu, što ludzi, jakija žyvuć u Izraili, majuć prava na biaśpieku, na abaronu. Jany majuć prava žyć na hetaj ziamli, ź jakoj jany źviazanyja.

Jak piša Politico, vykazvańni pasła ZŠA ŭ Izraili vyklikali nieadkładnuju reakcyju z boku susiednich Jehipta i Iardanii, a taksama Saudaŭskaj Aravii, Kuviejta, Amana, Pakistana, Indaniezii, Turcyi, Arhanizacyi isłamskaha supracoŭnictva i Lihi arabskich dziaržaŭ.

Ministerstva zamiežnych spraŭ Saudaŭskaj Aravii nazvała vykazvańni Chakabi «ekstremisckaj rytorykaj» i «nieprymalnymi» i zaklikała Dziaržaŭny departamient udakładnić svaju pazicyju adnosna ich.

U MZS Jehipta zajavili, što hetyja vykazvańni źjaŭlajucca «vidavočnym parušeńniem» mižnarodnaha prava, padkreśliŭšy, što «Izrail nie maje suvierenitetu nad akupavanaj paleścinskaj terytoryjaj abo inšymi arabskimi ziemlami».

Liha arabskich dziaržaŭ u svaju čarhu adznačyła, što «zajavy takoha charaktaru — ekstremisckija i nie majuć pad saboj padstaŭ — słužać tolki raspalvańniu nastrojaŭ i ŭzbudžeńniu relihijnych i nacyjanalnych pačućciaŭ».

• 2
• 0
• 4
• 5
• 0
• 0
• 1
• 0