Siaredni ŭzrost — 44 hady, časta šukaje padpracoŭku — siaredniestatyčny partret biełaruskaj žančyny
Biełstat na pres-kanfierencyi ŭ Nacyjanalnym pres-centr prezientavaŭ statystyčny partret biełaruskaj žančyny.
«Heta biełaruska. Jana žyvie ŭ horadzie. Joj u siarednim 44 hady. Jana dobra adukavanaja, maje vyšejšuju abo siaredniuju adukacyju. Pieršy raz vychodzić zamuž u 27 hadoŭ i prykładna praz hod naradžaje dzicia. U cełym pa vynikach 2024 hoda na terytoryi našaj krainy pražyvała 4,9 młn žančyn, abo 54% ad ahulnaj kolkaści nasielnictva. Pry hetym pieravažnaja bolšaść ź ich pražyvała ŭ haradskoj miascovaści — heta amal 80%», — raskazała namieśnik staršyni Nacyjanalnaha statystyčnaha kamiteta Natalla Tarasiuk.
U siarednim na 1000 mužčyn u krainie prychodzicca 1167 žančyn. Adnak hiendarny bałans pa-roznamu vyhladaje ŭ roznych uzrostavych katehoryjach. Kali ŭ maładym uzroście na 1000 junakoŭ prychodzicca 957 dziaŭčat, to ŭ bolš stałym uzroście žančyn užo ŭ dva razy bolš, čym mužčyn.
Za 2025 hod u krainie było zaklučana 52 tys. šlubaŭ.
«Siaredni ŭzrost žančyn pry ŭstupleńni ŭ pieršy šlub skłaŭ, jak ja ŭžo kazała, 27 hadoŭ. Adnak uzrost nie źjaŭlajecca pieraškodaj dla stvareńnia siamiejnaha sajuza, i ŭ apošnija hady zaŭvažnaja cikavaja tendencyja. Žančyny 65 hadoŭ i starejšyja ŭsio čaściej stvarajuć siemji. Tak, za 2025 hod 713 žančyn ustupili ŭ šlub, što amal na 13% bolš, čym u papiarednim hodzie. Pryčym 44 žančyny ŭstupili ŭ šlub upieršyniu», — dadała Tarasiuk.
Pa jaje słovach, uzrovień žanočaj zaniataści ŭ Biełarusi vyšejšy, čym mužčynski. Jon składaje 65%, a ŭ pracazdolnym uzroście — 86%.
Kamientary