«Rasijanie chočuć zamianić mianie». Zialenski vykazaŭsia pra vybary i pieramirje
Prezident Ukrainy zajaviŭ, što kali budzie chacia b dvuchmiesiačnaje pieramirje, jon hatovy pravieści vybary prezidenta, ale Rasija choča jaho zamianić. Pra heta Uładzimir Zialenski vykazaŭsia brytanskamu žurnalistu Pirsu Morhanu, piša RBK-Ukraina.
«Dumaju, našy partniory pavinny adkazać na adno pytańnie: čaho jany chočuć? Jany chočuć vybaraŭ ci prosta chočuć zamianić mianie? Bo, jak ja dumaju, ruskija prosta chočuć zamianić mianie. I tady jany vykarystoŭvajuć toje, pra što vy kazali raniej — fizičnaja likvidacyja abo inšyja kroki», — skazaŭ prezident.
Zialenski padkreśliŭ, što nikoli nie budzie adkidvać prapanovy ZŠA, kali jany mohuć prynieści Ukrainie mir. Tamu kali budzie navat dvuchmiesiačnaje pieramirje, jon hatovy havaryć z parłamientam i padšturchnuć da rašeńnia, jakoje ciapier deputaty nie padtrymlivajuć.
«I navat ludzi nie padtrymlivajuć praviadzieńnie vybaraŭ padčas vajny. Bo navat kali ŭ vas budzie dvuchmiesiačnaje pieramirje, heta nie aznačaje zakančeńnia vajny. Ale navat u takim vypadku — kali pieramirje budzie tolki na dva miesiacy — mahčyma, možna budzie padpisać niejkija dakumienty abo pravieści refierendum, i ludzi prymuć mir. Ja zrablu ŭsio mahčymaje, ja pahavaru z parłamientam. Jany źmieniać zakon, spadziajusia», — zajaviŭ kiraŭnik dziaržavy.
Taksama jon raspavioŭ, što rasijanie padčas razmovy z amierykancami kažuć, što na ich dumku, vybary va Ukrainie možna pravieści za tydzień-dva. Adnak u RF zabyvajuć, «što my nie Rasija».
U Viarchoŭnaj Radzie jość roznyja partyi, ale navat padčas vajny ŭ ich roznyja pazicyi nakont mnohich zakonaŭ i mnostva pytańniaŭ. Tamu niemahčyma prosta «nacisnuć» i nielha «złamać» parłamient. Treba kazać i mieć realnyja padstavy, čamu vybary treba pravodzić prosta ciapier.
Reziumujučy Zialenski dadaŭ, što paprasiŭ ZŠA spynić Uładzimira Pucina na niekalki miesiacaŭ dziela vybaraŭ. Kali heta budzie, tady jon zhodny pravieści vybary.
Kamientary