Što takoha adbyvajecca ŭ ekanomicy, što Łukašenka to aščadžaje na elektryčnaści, to choča skaracić čynoŭnikaŭ?
Na praciahu lutaha Alaksandr Łukašenka ŭžo nie raz skardziŭsia na prablemy ŭ ekanomicy, zahadvaŭ vyklučać vuličnaje aśviatleńnie i navat zapatrabavaŭ nieadkładna skaracić lišnija dziaržaŭnyja struktury, jakija nazvaŭ «biudžetnymi prysoskami». Spytali ŭ ekśpierta, što ž ciapier z ekanomikaj.
Ścipłyja pakazčyki na fonie rostu 2024 hoda
Ekśpiert BEROC Nastaśsia Łuzhina ličyć, što ničoha niečakanaha ŭ ekanomicy Biełarusi nie adbyvajecca.
«Kali pahladzieć na pakazčyki studzienia, to my ŭbačym, što nijakich novych tendencyj nie nazirajecca. My bačym tyja ž faktary, što stali vyjaŭlacca jašče ź pieršaj pałovy 2025 hoda, kali tempy ekanamičnaha rostu stali źnižacca», — tłumačyć ekśpiert.
U studzień VUP skaraciŭsia na 1,2% u paraŭnańni sa studzieniem 2025-ha.
«Z adnaho boku, na biełaruskuju ekanomiku paŭpłyvała značnaje zapavoleńnie rostu rasijskaj ekanomiki. A ź inšaha — toj faktar, što ŭžo da kanca 2024 hoda było dasiahnuta značnaje pašyreńnie vytvorčaści, u vyniku čaho dalejšaje aktyŭnaje naroščvańnie abjemaŭ vypusku stanaviłasia prablematyčnym».
Ekanamist padkreślivaje, što najbolš važnym momantam źjaŭlajucca abmiežavanyja mahčymaści zbytu, pra što havaryłasia nie tolki na niadaŭniaj naradzie ŭ Łukašenki.
«Za 2025 hod uzros pakazčyk miesiačnaha abjomu hatovaj pradukcyi na składach pradpryjemstvaŭ, heta aznačaje, što tavar vyrablajecca, a abjomaŭ realizacyi niedastatkova. Źviazana heta ŭ pieršuju čarhu ź situacyjaj na źniešnich rynkach, pierš za ŭsio rasijskim».
Akramia taho, ekśpiert źviartaje ŭvahu na vysokuju kankurencyju, jakuju biełaruskija tavary nie zaŭsiody vytrymlivajuć praz suadnosiny koštu i jakaści.
«Na kitajskim napramku biełaruski ekspart taksama skaraciŭsia. Kali kazać pra toj ža kalij, to ŭ Kitai nam kankurencyju składaje ŭ tym liku rasijski «Urałkalij»».
Pry hetym nielha kazać pra padzieńnie pa ŭsich pazicyjach.
Naprykład, spažyviecki ekspart za studzień-listapad 2025 hoda ŭ adnosinach da anałahičnaha pieryjadu 2024 hoda vyras na 11,3%. A pastaŭki charčavańnia — na 15,9%.
Adnak impart charčavańnia ŭ Biełaruś pavialičyŭsia na 25,5% — z pavieličeńniem dachodaŭ biełarusy addajuć pieravahu tavaram impartnaj vytvorčaści, a nie ajčynnaj.
Inviestycyjny impart u toj ža čas taksama ros, choć i pavolniej. Usio heta ŭ vyniku pryvodzić da paharšeńnia salda źniešniaha handlu.
Pramysłovaść z drajviera stała tormazam
Na hetym fonie zapłanavany rost VUP na 2,8% vyhladaje małarealistyčnym.
«Da takich pakazčykaŭ vielmi daloka. Pakul, naadvarot, nazirajecca tolki tendencyja da paharšeńnia. U pramysłovaści ŭ nas źnižeńnie na 3,4% za studzień.
Asobna pa apracoŭčaj — minus 7,5%, što źjaŭlajecca istotnym, pakolki heta važnaja halina, jakaja składaje kala 20% VUP. Atrymlivajecca, taja halina ekanomiki, jakaja była drajvieram u 2024 hodzie, ciapier ciahnie ŭsie pakazčyki ŭniz», — kaža Anastasija Łuzhina.
Pry hetym abjektyŭnych pieradumoŭ, jakija mahli b pazityŭna paŭpłyvać na situacyju, na dumku ekśpierta, nie hetak šmat.
«Vialikuju rolu budzie adyhryvać toje, što budzie adbyvacca ŭ rasijskaj ekanomicy, ale heta ŭžo źniešni faktar, jaki ad Biełarusi nie zaležyć.
Unutry krainy, chutčej za ŭsio, ułady buduć staracca stymulavać ekanomiku: inviestycyi, kredytavańnie ajčynnych tavaraŭ. Ale pakul my bačym, što ŭsie hetyja dziejańni davali chutčej kaśmietyčny efiekt, pakolki, niahledziačy na ich, ekanomika zapavolvałasia i praciahvaje heta rabić», — adznačaje ekśpiert.
Kamientary