U histaryčnym domie ŭ centry Minska zalivaje kvatery: «Za sutki vynies 30 viodraŭ vady»
Adliha ŭ kancy studzienia pryniesła žycharam kvater histaryčnaha doma na Rakaŭskaj, 20 zalityja stoli i ścieny. Ludzi ratujuć meblu, pierajazdžajuć u adzin pakoj i dziažurać sutkami napralot, kab źlić vadu z viodraŭ.
Kamunalniki pryjazdžali, akty skłali, ale paškodžańniaŭ stanovicca bolš. A ramont dachu adkłali da plusavoj tempieratury, piša Realt.by.
«Mienš čym za sutaki vynies 30 viodraŭ vady»
Dziakujučy svajmu jaskravamu cahlanamu fasadu i doŭhaj historyi dom na Rakaŭskaj, 20 staŭ adnoj ź vizitovak Minska. Dvuchpaviarchovy budynak kanca 19 stahodździa ŭsio jašče žyły. Tut 13 kvater, praŭda, niekatoryja ź ich pieraviedzieny ŭ kamiercyju.
Śniežnaja i maroznaja zima sioleta dadała niamała kłopataŭ kamunalnikam. Ale prablemy ŭ žycharoŭ histaryčnaha budynka pačalisia z-za banalnaha źbivańnia ledziašoŭ. Paśla čarhovych takich rabot u kvaterach pačało lić sa stoli.
U Realt napisaŭ i paviedamiŭ ab prablemach ułaśnik kvatery na druhim paviersie. Zaraz jaho adnapakajoŭku aranduje pijanist Dźmitryj. Muzyka zaśpieŭ u kvatery «doždž» 7 lutaha. Mužčyna momantam adreahavaŭ: paviedamiŭ u 115, paśla kupiŭ belki, plonku i zbudavaŭ navies, kab źbierahčy draŭlanuju padłohu 19 stahodździa. Usia vada ciapier ściakaje ŭ viodry.
— U tu noč ja nie spaŭ da 5 ranicy. Mienš čym za sutki vynies 30 viodraŭ vady. Kamunalnikaŭ čakaŭ niekalki hadzin, ale nichto nie pryjazdžaŭ. Potym pravieryŭ status svajoj zajaŭki i ŭbačyŭ, što jaje adznačyli, jak adpracavanuju. Adrazu ž patelefanavaŭ u słužbu sa skarhaj. Praz čas da mianie ŭsio-taki dabralisia i skłali akt. Paŭtorny vizit naniasuć 23 lutaha. Tam užo buduć aceńvać škodu. Ale pytańnie ŭ tym, što z kožnym razam u kvatery stanovicca ŭsio horš, bo nichto nie vyrašyŭ prablemu.
U adnapakajoŭcy sapraŭdy nie ścichaje patok kropiel. Jany sočacca ŭžo ź niekalkich raskolin. Paškodžany ścieny ź niekalkich bakoŭ, z-za vilhotnaści nabrakli elektronnaje pijanina Yamaha i akustyčnaja sistema. Dźmitryju daviałosia addavać u ramont i noŭtbuk.
— Hetyja akty tyčacca tolki nastupnych pytańniaŭ ramontu, ale mienavita ciapier tut ni žyć, ni pracavać niemahčyma. Uviečary adčuvaješ siabie jak u łaźni, — zaŭvažaje mužčyna. Navat dniom, kali śviecić sonca, znachodzicca ŭ pakoi ciažka. — Nam skazali, što ramontam dachu zojmucca, kali sydzie śnieh i minusavaja tempieratura. Ujaŭlajecie, što za hety čas tut budzie z kvaterami i budynkam u cełym?
«U pakoi navat śviatło nie ŭklučajem»
Vada dajšła i da pieršaha paviercha, u kaviarniu «Piataja kvatera». Jaje nad naciažnoj stollu zaŭvažyli 14 lutaha. Supracoŭnikam udałosia samastojna źlić vadu. Z taho času za situacyjaj pilna nazirajuć, ale kałapsaŭ nie zaŭvažajuć.
Kapramont u domie byŭ skončany ŭ 2007-m. Pa słovach miascovych žycharoŭ, jany i raniej sutykalisia z zalivami stoli, ale jašče nikoli situacyja nie była nastolki krytyčnaj. Bolš za ŭsio kvater paciarpieła z boku vulicy. Tam ledziašy źbivali bolš aktyŭna. Miascovyja miarkujuć, što razłomy adbylisia z-za mocnych udaraŭ. Kamunalniki bili nie pa samich ledziašach, a pa falcavym dachu, miarkujuć žychary. Voś jon i złamaŭsia.
Kvatera Aleha paciarpieła adna z samych pieršych. Zaraz siamja tulicca ŭ adnym pakoi.
— Usio pačałosia try tydni tamu sa stoli ŭ zale. My adrazu ž paviedamili ab zalivie słužbam. Da nas pryjechali, taksama skłali akt, ale za hety čas vada pierakačavała ŭ spalniu. Lustra pačała treskacca, u lampačcy źjaviłasia vada. My pieranieśli meblu, pierajechali ŭ adzin pakoj, a ŭ tym navat śviatło nie ŭklučajem. Chutka pavinny pryjści składać druhi akt. Chto viedaje, kolki jašče śniehu budzie. Sonca źjaŭlajecca — usio rastaje i ściakaje da nas.
U domie jość haryšča. Bolš za ŭsio zalivaje z dachu nad kvateraj Dźmitryja. Tam kropli ściakajuć pa fasadu na padłohu. Nad stollu Aleha lažyć čornaja plonka.
— Kali padymaŭsia ziać, skazaŭ, što ŭ nas pa pierymietry złamany dach. Niama i paraizalacyjnaj plonki (uciaplalnika dachu ad vilhaci). U piatnicu pryjazdžali alpinisty. Jany skinuli z dachu śnieh, ale ŭ žołabie sabraŭsia lod, jaho jakraz i nie ŭdajecca prybrać.
Kvatera Michaiła amal kožny hod pa viaśnie cierpić z-za lišniaj vilhotnaści paŭnočnaj ściany. Kala akna znachodzicca vadaściokavaja truba, jakaja ŭ marozy zamiarzaje. Tady vada z dachu pačynaje ściakać pa fasadu i traplaje pa raskolinach u kvateru mužčyny. U hety raz usio pačałosia ŭ kancy studzienia, ale ŭžo pa inšaj pryčynie.
— Pravieryli trubu — jana, byccam, čystaja. Telefanavali ŭ ŽES. Chłopcy pryjšli na nastupny dzień, pabłukali pa dachu i skazali, što tam 15 kvadrataŭ dachu pad zamienu. Miesca, kudy kapaje vada, kropkava nakryli plonkaj. Paśla hetaha vada pierajšła ŭ susiedni pakoj, dzie pačaŭ pramakać pa švach hipsakardon na stoli. Nas užo nie zalivaje, ale niezrazumieła heta z-za hetaj plonki abo tamu što marazy znoŭ schapilisia.
«Ramont pačniem jak tolki na vulicy budzie plusavaja tempieratura»
— Zaraz u ŽEU rajona hety dom na kantroli. Na techpaviersie pakłali plonku nad miescami, kudy kapaje vada. Rabotniki ačyścili dach ad śniehu. Ramontnyja raboty pačniem pravodzić adrazu ž paśla taho, jak na vulicy budzie plusavaja tempieratura. Tady jašče raz pravierym, u jakich miescach i što praciakaje, zakupim abstalavańnie, materyjały i prystupim da adnaŭleńnia, — tłumačyć Juryj Radziecki, namieśnik dyrektara pa sacyjalnych pytańniach i pracy z nasielnictvam ŽKH Centralnaha rajona.
Jak patłumačyŭ pradstaŭnik ŽKH, dapamahčy domu inšym sposabam pakul niama mahčymaści z-za nadvorja.
— Śpiecyjalisty ŽEU znajšli ŭ adnym miescy vialikaje skopišča lodu. Kali jany pačnuć pa im bić, to jašče macniej paškodziać dach.
Kamientary