Biełarus zasnavaŭ u Varšavie muzyčnuju škołu i pamior. Ciapier škoła pad pahrozaj
U Varšavie ŭ śniežni 2025 hoda raptoŭna pamior biełarus Alaksandr Kavalčuk — zasnavalnik škoły ŭdarnych instrumientaŭ Hit&Beat. Jon pozna daviedaŭsia pra ciažki dyjahnaz — rak straŭnika — i spadziavaŭsia prajści lačeńnie, tamu nie paśpieŭ pieradać nikomu dostup da rachunkaŭ, dakumientaŭ i važnaj infarmacyi. Ciapier škoła vymušanaja ŭ śpiešcy adnaŭlać dakumientacyju i ŭžo sutyknułasia z pahrozaj vysieleńnia: arendadaŭca skasavaŭ damovu i znajšoŭ novaha najmalnika pamiaškańnia, piša Most.
Alaksandr Kavalčuk, viadomy ŭ muzyčnym asiarodździ jak Aleks Chit, pryjechaŭ u Polšču ŭ 2018 hodzie. Spačatku jon dapamahaŭ pradprymalnikam-emihrantam asvojvacca ŭ novaj krainie, pravodziŭ navučalnyja sustrečy, a prykładna praz dva hady adkryŭ škołu barabanaŭ.
Z časam heta škoła stała nie prosta adukacyjnym prajektam, a tvorčaj supolnaściu, jakaja abjadnała darosłych i dziaciej, palakaŭ i emihrantaŭ. Dla mnohich pierasialencaŭ škoła stała miescam chutčejšaj adaptacyi. Tut taksama zajmalisia ludzi z aŭtyzmam i niekalki vučniaŭ ź sindromam Daŭna. Akramia zasnavalnika, u škole pracavali jašče dvoje vykładčykaŭ.
U listapadzie 2025 hoda Alaksandr pačaŭ adčuvać mocnaje niedamahańnie, chutka schudnieŭ. Spačatku jon dumaŭ, što heta zvyčajnyja prablemy sa straŭnikam, ale abśledavańnie pakazała ankałahičnaje zachvorvańnie. Jaho špitalizavali, praviali pieršyja pracedury i nienadoŭha adpuścili dadomu. Paźniej mužčyna znoŭ viarnuŭsia ŭ kliniku, adnak chvaroba ŭžo była ŭ ciažkaj stadyi. 18 śniežnia 2025 hoda Alaksandr pamior va ŭzroście 39 hadoŭ.
Napiaredadni jon razmaŭlaŭ z bratam, jaki žyvie ŭ Biełarusi i źjaŭlajecca saŭładalnikam adnoj ź jaho kampanij. Mahčyma, Alaksandr moh pieradać jamu važnuju infarmacyju, ale, vidać, usio ž raźličvaŭ papravicca i nie paśpieŭ hetaha zrabić.
Paśla śmierci cieła pieravieźli ŭ Biełaruś, a škoła pačała adnaŭlać dakumienty. Vyśvietliłasia, što damovy z vučniami zachoŭvalisia tolki ŭ zasnavalnika, tamu supracoŭnikam daviałosia apytvać ludziej, kab adnavić śpisy i raźliki. Ciapier paćvierdžana nie mienš za 50 dziejnych damoŭ.
Dadatkovaj prablemaj stała arenda pamiaškańnia na vulicy Šviedskaj (Szwedzka). Jano naležyć pryvatnamu Miedycynskamu ŭniviersitetu imia Maryi Składoŭskaj-Kiury. U śniežni arendadaŭca nakiravaŭ apaviaščeńni ab apłacie, ale Alaksandr užo nie paśpieŭ ich atrymać.
Pakul u sudovym rejestry nie byli aformlenyja źmieny ŭ kiraŭnictvie, pradstaŭniki škoły nie mahli aficyjna atrymać infarmacyju. Paśla ŭniasieńnia źmienaŭ vyśvietliłasia, što damova ŭžo skasavanaja, a pamiaškańnie pieradadziena novamu arandataru. Pa słovach pradstaŭnikoŭ škoły, heta zroblena z parušeńniem umoŭ, bo damovu možna było skasavać tolki praz šeść miesiacaŭ paśla paviedamleńnia.
Vyzvalić pamiaškańnie škole zahadali 12 lutaha 2026 hoda — u dzień, kali Alaksandru spoŭniłasia b 40 hadoŭ. Pa słovach pradstaŭnicy škoły, arendadaŭca admaŭlajecca ad asabistych sustreč i kamunikuje tolki pa elektronnaj pošcie. U pamiaškańni ŭžo zamianili zamki i paškodzili dźviery, tamu była vyklikana palicyja, a materyjały pieradadzienyja ŭ prakuraturu.
Vučni škoły padrychtavali pietycyju z patrabavańniem naładzić adkryty dyjałoh z arendadaŭcam, urehulavać finansavyja pytańni, zabiaśpiečyć pierachodny pieryjad dla vykanańnia dziejnych damovaŭ i dazvolić škole praciahnuć pracu. U tekście pietycyi adznačajecca, što raptoŭnaje skasavańnie damovy biez abmierkavańnia i času na pierajezd razburaje sfarmavanuju supolnaść, jaje tradycyi i kulturnuju misiju.
Vilenski biełaruski muziej imia Ivana Łuckieviča vyjhraŭ tendar na prava arendy raniejšaha budynka
Na biełaruskaj himnazii ŭ Vilni napisali «Ruki preč ad Skarynaŭki». Kirylica dałasia ciažka
Mer Vilni patłumačyŭ, što źmienicca dla biełaruskaj himnazii paśla ŭviadzieńnia abaviazku dzieciam inšaziemcaŭ chadzić u litoŭskamoŭnyja škoły
U Vilni małyja dzieci zamiežnikaŭ buduć chadzić tolki ŭ litoŭskamoŭnyja škoły. Ale dla biełaruskamoŭnaj himnazii zrobiać vyklučeńnie
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny24
Kamientary
hetych ślimakoú ?