Minenierha Ukrainy zajaviła, što Rasija adnaviła ŭdary pa infrastruktury. Zialenski kaža, što metanakiravanych udaraŭ nie było
Rasija znoŭ pačała metanakiravana źniščać enierhietyčnuju sistemu Ukrainy, spyniŭšy karotki pieryjad adnosnaha spakoju. Pavodle źviestak Minenierha Ukrainy na 2 lutaha, paśla čarhovych atak bieź śviatła zastalisia žychary Charkaŭskaj, Sumskaj, Dnieprapiatroŭskaj i Čarkaskaj abłaściej, a ŭ Kijevie i vobłaści praz deficyt mahutnaści vymušanyja viarnucca da avaryjnych adklučeńniaŭ.
Paśla pieryjadu adnosnaha zacišša Rasija znoŭ pačała metanakiravana atakavać ukrainskuju enierhietyčnuju infrastrukturu, što pryviało da surjoznych razbureńniaŭ i čałaviečych achviar. Pavodle zajavy Minenierha Ukrainy, pad udaram apynulisia abjekty ŭ Charkaŭskaj, Sumskaj, Dnieprapiatroŭskaj i Čarkaskaj abłaściach, dzie spažyŭcy zastalisia biez elektryčnaści.
Najbolš trahičnaje zdareńnie adbyłosia ŭ Paŭłahradskim rajonie: rasijskija drony atakavali słužbovy aŭtobus z šachciorami, u vyniku čaho 12 rabotnikaŭ zahinuli na miescy, a jašče siemiarych špitalizavali z ranieńniami.
Situacyja ŭ staličnym rehijonie zastajecca składanaj. Praz vostry deficyt mahutnaści ŭ Kijevie i vobłaści vymušana admovilisia ad prahnazavanych hrafikaŭ i pierajšli da ekstrannych avaryjnych adklučeńniaŭ. Enierhietyki zajaŭlajuć, što viarnucca da stabilnaj pastaŭki śviatła atrymajecca tolki paśla poŭnaj stabilizacyi sistemy.
Stanovišča paharšajecca i niespryjalnym nadvorjem: z-za škvalistaha vietru i apadkaŭ bolš za 160 nasielenych punktaŭ na poŭdni i ŭ centry krainy abiastočanyja. Ciapier ramontnyja bryhady pa ŭsioj krainie pracujuć u kruhłasutačnym režymie, sprabujučy adnavić paškodžanyja linii i viarnuć śviatło ŭ damy.
Prezident Ukrainy Zialenski zajaviŭ, što niahledziačy na toje, što za apošnija sutki byli novyja rasijskija abstreły abjektaŭ enierhietyki ŭ pryfrantavych i pamiežnych rajonach, «metanakiravanych udaraŭ rasijskich rakiet i «šachiedaŭ» pa enierhietyčnaj infrastruktury nie było».
«Rasijskaja armija, jak i ŭ papiarednija dni, zasiarodžana na terory suprać našaj łahistyki, pierš za ŭsio čyhunačnaj», — dadaŭ Zialenski.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary