U dački zasnavalnika «Novaha zroku» pa spravie baćki adabrali dom, jaki toj padaryŭ joj 14 hod tamu

Zasnavalnika «Novaha zroku» Aleha Kaŭryhina ŭ Biełarusi sudzili zavočna, u tym liku i pa palityčna matyvavanych artykułach. Jaho prysudzili da 12 hadoŭ pazbaŭleńnia voli i štrafu ŭ 400 tysiač rubloŭ, a taksama vyrašyli spahnać amal 4 miljony rubloŭ u dachod dziaržavy. Sam Kaŭryhin u kamientaryi kazaŭ, što nie razumieje, pra jakija hrošy havorka, bo ni ich, ni majomaści ŭ Biełarusi ŭ jaho niama. Paźniej biźniesmien zrazumieŭ, jak ułady chacieli zabrać hetyja hrošy: jany adniali dom u jaho dački ad pieršaha šlubu. Hetuju nieruchomaść joj padaryŭ baćka jašče ŭ 2011 hodzie, adnak sud pryznaŭ ździełku niesapraŭdnaj. «Lusterka» raspaviadaje padrabiaznaści.

Dom u vioscy Tarasava pad Minskam Aleh Kaŭryhin pabudavaŭ u 2010 hodzie. Kaža, admysłova miesca tam nie vybiraŭ.

— U mianie prosta byŭ siabar, jakoha ja biaźmierna pavažaju, ciapier užo niabožčyk, heta Jaŭhien Šyhałaŭ, zasnavalnik kampanii «Ždanovičy». I jon chacieŭ mieć pobač čałavieka, ź jakim možna kamunikavać, — raspavioŭ biznesmien. — Ja nie šukaŭ i nie dumaŭ pra svoj dom u pryncypie — u mianie była kvatera ŭ Minsku. Dyk voś jon mnie pradaŭ vielmi tanna ŭčastak u Tarasavie z fundamientam. Ja pabudavaŭ sabie dom davoli chutka, za paŭtara hoda. I tak apynuŭsia ŭ kampanii susiedziaŭ, jakich nie vybiraŭ: z adnaho boku ad doma žyvie Viktar Šejman, z druhoha — Alena Skrypiel, jakaja vałodaje djuci-fry «Chielena i Valery». Ale i ŭ cełym pasiołak sam pa sabie viadomy.

Kaŭryhin kaža, što paśla pabudovy doma ŭ im praktyčna nie žyŭ. Z žonkaj Natallaj jany raźvialisia, a ŭ 2011 hodzie biźniesmien užo źbiraŭsia pierajazdžać u Litvu kančatkova. Jon pradaŭ aŭto, zakryŭ spravy, atrymaŭ pašpart sieryi PP i ŭ lipieni 2011 hoda vyrašyŭ padaryć dom dačcy Złacie.

Dziaŭčyncy na toj momant było čatyry hady.

— Tady ja nie viedaŭ, dzie budzie žyć maja byłaja žonka z dačkoj, dy i chacieŭ svajmu dziciaci zabiaśpiečyć budučyniu, — tłumačyć Kaŭryhin. — My pajšli da nataryusa, i ja aformiŭ daroŭnuju.

Zakryŭšy spravy ŭ Biełarusi, mužčyna źjechaŭ u Litvu. Praź piać hadoŭ Złata z maci zdali žyllo ŭ arendu i pierabralisia ŭ Ispaniju. Aleh kaža, što ŭ płanach dački było viarnucca ŭ Biełaruś i pastupić va ŭniviersitet u Minsku. Žyć jana płanavała ŭ tym samym domie.

Prajšło 11 hadoŭ. U lutym 2023 hoda ŭ sietku miedcentraŭ «Novy zrok» pryjšli siłaviki. Śledčy kamitet aryštavaŭ majomaść kampanii. Tady ž jon nakłaŭ aryšt i na dom dački Kaŭryhina, choć Złata nie mieła nijakaha dačynieńnia da kryminalnaj spravy.

U listapadzie 2024 hoda sud zavočna prysudziŭ Aleha Kaŭryhina da 12 hadoŭ pazbaŭleńnia voli. Dalej Hienprakuratura padała hramadzianski pazoŭ, kab spahnać škodu, jakuju jon nibyta nanios dziaržavie. U vyniku doŭh vyras da 3,82 miljona rubloŭ.

Sud Minskaha rajona nie zadavoliŭ pazoŭ ab źniaćci aryštu z doma dački Kaŭryhina. Bolš za toje, jon pryznaŭ i samu damovu dareńnia niesapraŭdnaj. Pazicyja prakurora Natalli Maciejka palahała ŭ tym, što damova była zaklučana z metaj paźbiehnuć spahnańnia na majomaść, bo Kaŭryhin nibyta ŭžo tady płanavaŭ «złačynnuju dziejnaść».

Sudździa Hieorhij Krasucki pahadziŭsia z hetymi dovadami i pryznaŭ nikčemnaj damovu dareńnia ad 2011 hoda. Pa sutnaści, pravy na ŭčastak i dom viarnulisia da Aleha Kaŭryhina, i ciapier nieruchomaść mohuć prymusova pradać. Sam zasnavalnik «Novaha zroku» nazyvaje heta absurdam:

— Nibyta ja ŭ 2011 hodzie płanavaŭ niejkuju złačynnuju dziejnaść u 2023-m? Maryjarci niervova kuryć u baku. Abvinavačvańni takija absurdnyja, tupyja. Ja razumieju, što dom niechta pryhledzieŭ, tamu i takoje rašeńnie suda. Jano čysta palityčnaje. A toj, chto pasprabuje kupić hety dom, pavinien razumieć, što pa sutnaści jon — kradzieny.

• 0
• 0
• 1
• 5
• 3
• 2
• 13
• 0