«Apošnimi dziećmi, jakich błasłaviŭ Papa Francišak, byli maje». Biełaruski biznesoviec raspavioŭ, jak chryściŭ synoŭ u Vatykanie
U pačatku krasavika zasnavalnik sietki klinik «Novy zrok» Aleh Kaŭryhin, jakoha ŭ Biełarusi asudzili pa palityčna matyvavanaj spravie, vyrašyŭ achryścić svaich synoŭ Ota i Lavona. Pakolki žonka i dzieci pradprymalnika žyvuć na Malcie, u katalickim asiarodździ, jon vyrašyŭ, što tyja prymuć katalicyzm. U siamji źjaviłasia ideja daviedacca ŭ Papy Franciška, ci moža jon achryścić chłopčykaŭ. 10 krasavika, za 11 dzion da svajoj śmierci, pantyfik daŭ zhodu, piša «Lusterka».
— U mianie daŭnija znajomstvy ŭ Vatykanie. Nie z Papam — ja asabista ź im znajomy nie byŭ, my bačylisia tolki raz mimachodam. A ź vielmi mnohimi sakratarami i kardynałami, ź niekatorymi my majem kantakt dziesiacihodździami. U nas isnuje duchoŭnaja, siabroŭskaja suviaź, jakaja vyrasła z uzajemadziejańnia «pacyjent — doktar», — raspaviadaje Aleh Kaŭryhin. — I ja prosta spytaŭ u svajho dobraha znajomaha, jaki źjaŭlajecca značnym kardynałam u Vatykanie, ci mahčyma, kab Papa Rymski achryściŭ maich dziaciej. Praź niejki čas jon spytaŭ u jaho, i toj adkazaŭ: «A čamu b i nie».
Zhoda Papy pravieści chrost — davoli redkaja źjava. Pavodle słoŭ Kaŭryhina, za hod pantyfik chryścić usiaho niekalki dziasiatkaŭ dziaciej. Čamu Francišak vybraŭ synoŭ biełaruskaha biznesoŭca, u Aleha adkazu niama.
— Ja nie viedaju, pa jakich kryteryjach adbyvajecca adbor, — raspaviadaje surazmoŭca. — Słužba biaśpieki, viadoma, u žart spytała pra mianie: maŭlaŭ, vy ž z «hrachami» ekanamičnymi — majučy na ŭvazie tyja kryminalnyja spravy, što na mianie zaviali ŭ Biełarusi. Ja adkazaŭ, što heta nahavory. «My tak i padumali», — skazali jany. I ŭsio. Heta značyć, što heta nie było za niejkija nievierahodnyja zasłuhi pierad Vatykanam. Heta byŭ prosta niejki Božy provid. Tak skłalisia abstaviny.
Biznesoviec dadaje, što nijakich hrošaj za chrost u jaho nie prasili i pra heta pytańniaŭ nie zadavali. — Navat i havorki nie išło. Viadoma, my rabili niejkija achviaravańni katalickamu kaściołu (heta, u tym liku, byli i biaspłatnyja apieracyi dla śviataroŭ). Ale heta nijak nie było źviazana z chrostam dziaciej, — śćviardžaje jon.
Kancylaryja Papy padrychtavała ŭsie nieabchodnyja dakumienty i aformiła jaho błasłavieńnie 10 krasavika.
— Jaho ŭručnuju afarmlaje mastak na śpiecyjalnym pierhamientnym liście. Taksama stavicca piačatka sakrataryjata Papy, — tłumačyć Kaŭryhin. — Hetyja pierhamientnyja listy ŭručajucca dzieciam na chroście. A taksama vydajecca asobny dakumient na śpiecyjalnym błanku.
Cyrymoniju pryznačyli na 22 krasavika. Čatyrochhadovaha Ota i dvuchhadovaha Lavona pavinny byli achryścić u hałoŭnym chramie Vatykana — sabory Śviatoha Piatra.
— U asobnaj zale dla karanacyj, — kaža Aleh. — Heta vielmi redkaje miesca, tudy prosta tak niemahčyma trapić. Sam chrost pavinien byŭ pravodzić kardynał — davieranaja asoba Papy Franciška, a jon sam — padyści da dziaciej, pahładzić pa hałavie i skazać niešta. Ja jašče pytaŭ u sakrataryjata, ci nie budzie heta zanadta ciažka dla jaho. Mnie adkazali, što kali pantyfik zmoža, to abaviazkova padydzie. Takoje ŭ jaho žadańnie.
21 krasavika siamja Aleha Kaŭryhina vylecieła z Malty, dzie jany žyvuć. Taksama ź Vilni vypravilisia i inšyja svajaki pradprymalnika. Sam jon trapić u Vatykan nie zmoh, bo znachodzicca ŭ bazie vyšuku Interpała praź biełaruskija ŭłady.
— Pierad vyletam usio było hatova. U ich byli padpisanyja propuski, kab pryjechać u Vatykan, — kaža Kaŭryhin. — Pakul žonka ź dziećmi lacieła ŭ samalocie, pryjšła navina, što Francišak pamior. Naturalna, ja dumaŭ, što ŭsio pieranosicca na paźniejšy čas. Ja patelefanavaŭ u sakrataryjat Vatykana. Tam adkazali: «Pačakajcie, my zaraz raźbiaremsia, bo, bačycie, situacyja vielmi nieardynarnaja». Užo ŭviečary pieratelefanavali i skazali, što chrost adbudziecca. Maŭlaŭ, heta mierkavańnie ŭsiaho sakrataryjata, jaki zastajecca da prychodu novaha pantyfika. I skazali: raz Papa pastaviŭ svaju piačatku, to ŭsio adbudziecca.
Cyrymonija chrostu doŭžyłasia kala 40 chvilin. Pavodle słoŭ Kaŭryhina, kardynał, jaki jaje pravodziŭ, navat raspłakaŭsia.
— Jon kazaŭ, što, niahledziačy na toje, što Papa Francišak pamior, jon zaraz niabačna z nami. Što śmierć i žyćcio iduć pobač. I my pavinny pra heta pamiatać i razumieć, što žyviom u viečnaści. Vielmi pryhožyja słovy. Skazaŭ, što błahasłavieńnie maich dziaciej na chrost — sapraŭdy apošni taki dakumient, jaki jon padpisaŭ, — apisvaje surazmoŭca. — Potym syny hulali i biehali pa zale. A praz paru dzion u joj razmaŭlali Donald Tramp i Uładzimir Zialenski. Chto b moh padumać, što my staniem śviedkami takich histaryčnych padziej.
Kamientary
Mabyć, nie za kankretnuju pasłuhu, a tak, "kredytam" za mahčymaść pryjarytetna vyrašać niekatoryja pytańni.