Kiraŭnik Administracyi Łukašenki Dźmitryj Kruty zajaviŭ, što ŭłady nastrojenyja stvaryć u krainie vytvorčaść cyvilnych samalotaŭ. Pry hetym jon pryznaŭ, što pa stanie na ciapierašni momant u Biełarusi faktyčna niama ŭłasnaj avijabudaŭničaj bazy.
Tamu zroblena staŭka na kaapieracyju z rasijskimi vytvorcami, jakija sami sutykajucca ź ciažkaściami pry realizacyi płanaŭ pa stvareńni i zapusku vytvorčaści rasijskich pasažyrskich samalotaŭ.
Pa słovach Krutoha, ciapier naładžanyja kantakty z asnoŭnymi avijacyjnymi zavodami Rasii, što robiać biełaruskija pradpryjemstvy ŭ Baranavičach, Minsku i Oršy.
Čynoŭnik adznačyŭ, što ŭ Biełarusi ciapier budujucca niekalki vytvorčych karpusoŭ — ad farbavalnych cechaŭ da płoščaŭ dla vypusku składanych, u tym liku daŭhamiernych detalaŭ dla samalotaŭ. Heta robicca ŭ miežach sumiesnaj prahramy impartazamiaščeńnia z Rasijaj, ale pakul heta razavyja zakazy.
Pa słovach Krutoha, ułady chočuć stvaryć u Biełarusi ŭłasnuju škołu avijabudavańnia i prykładna ŭ 2029—2030 hadach pačać vypusk samalotaŭ.
«Viaršyniaj našaha «avijacyjnaha płana» stanie stvareńnie paŭnavartasnaha cyvilnaha samalota ŭ Biełarusi dzieści da 2029—2030 hoda. Pakul terminy takija», — skazaŭ jon.
Raniej Baranavicki avijacyjny ramontny zavod pakazaŭ prajekt samalota, jaki płanujecca vypuskać razam z Uralskim zavodam cyvilnaj avijacyi. Praŭda, pakul nieviadoma, mieŭ na ŭvazie Kruty mienavita hetuju madel ci całkam biełaruski samalot.
Jašče ŭ 2023 hodzie tahačasny premjer-ministr Raman Hałoŭčanka abviaščaŭ pra sumiesny z Rasijaj prajekt sieryjnaj vytvorčaści dvuchmatornaha lohkaha samalota. Tady jon kazaŭ, što pieršy taki bort pavinien uźlacieć da 2028 hoda.
Ciapier čytajuć
Kryk dušy Biaspałava pra Cichanoŭskaha: Jon pieratvarajecca ŭ Łukašenku 2.0, heta trajanski koń82
Kamientary