Jon budzie raźmieščany ŭ Nacyjanalnaj biblijatecy.
Siejm u čaćvier ratyfikavaŭ pahadnieńnie ab supracoŭnictvie pry stvareńni ŭ Vilni infarmacyjnaha punkta Rady Jeŭropy (RIE) dla žycharoŭ Biełarusi. Za zakon, jaki heta praduhledžvaje, adnahałosna prahałasavali 96 členaŭ Siejma, paviedamlaje LRT.
U punkcie biełarusam budzie prapanujuć infarmacyju ab pracy i kaštoŭnaściach RIE, a taksama ab mierapryjemstvach, što ładziacca ŭ Litvie dla padtrymki hramadzianskaj supolnaści Biełarusi.
«Biełaruś nie źjaŭlajecca členam Rady Jeŭropy, RIE nie maje pradstaŭnictva abo kantaktnaha ofisa ŭ Biełarusi, a supracoŭnictva, jakoje raniej isnavała, było spyniena z-za ŭdziełu hetaj krainy ŭ rasijskaj ahresii suprać Ukrainy. Adnak Kamitet ministraŭ RIE, uličvajučy rolu Rady Jeŭropy ŭ prasoŭvańni pravoŭ čałavieka, demakratyi i pavahi da pryncypaŭ pravavoj dziaržavy ŭ Jeŭropie, imkniecca padtrymlivać i ŭmacoŭvać adnosiny ź biełaruskaj hramadzianskaj supolnaściu i z hetaj metaj stvaryć infarmacyjny punkt u Vilni», — havorycca ŭ tłumačalnaj zapiscy aŭtaraŭ inicyjatyvy.
Litva i RIE ŭzhadnili supracoŭnictva pa stvareńni hetaha punkta ŭ Vilni letaś u listapadzie. Pahadnieńnie ŭ Strasburhu padpisali tahačasny ministr zamiežnych spraŭ Habryelus Łandśbierhis i namieśnik Hienieralnaha sakratara RIE Bjorn Bierhie.
Ministerstva zamiežnych spraŭ prapanuje raźmiaścić centr u Nacyjanalnaj biblijatecy i takim čynam vyzvalić punkt ad arendnaj płaty.
Urad taksama abaviazvajecca vyzvalać ofis ad vypłaty akcyzaŭ i inšych padatkaŭ albo kampiensavać sumy ŭ tych vypadkach, kali jon nabyvaje tavary abo pasłuhi dla aficyjnaha vykarystańnia i ich košt uklučaje takija płaciažy, u adpaviednaści z zakonami Litvy.
Sa svajho boku, Rada Jeŭropy abaviazvajecca pakryvać raschody na abstalavańnie i absłuhoŭvańnie pamiaškańniaŭ, piersanał i ŭsie inšyja vydatki, źviazanyja ź jaho dziejnaściu.
Kamientary