Hladzicie, jak kazačna ŭpryhožyli da navahodnich śviat handlovy centr Galleria ŭ Minsku
Adzin z hałoŭnych handlovych centraŭ stalicy prezientavaŭ svajo śviatočnaje afarmleńnie. Sioleta Galleria Minsk zrabiła staŭku na maštab i kłasiku dziciačaj litaratury — uvieś atryum zaniała hihanckaja instalacyja pa matyvach kazki pra Śniežnuju karalevu.
Centralnym abjektam kampazicyi stała fihura samoj uładarki zimy, jakaja siadzić na ledzianym tronie. Śniežnaja karaleva ŭzvyšajecca nad naviedvalnikami, pranizvajučy prastoru handlovaha centra praź niekalki pavierchaŭ.
Vyšynia kanstrukcyi ŭražvaje — 23 mietry, što supastaŭna z vyšynioj šmatpaviarchovaha doma. Vobraz choładu i zimovaha carstva dapaŭniajuć masiŭnyja dekaratyŭnyja ledziašy, jakija pahroźliva źvisajuć z parapietaŭ halerej handlovaha centra.
Instalacyja maje mnostva detalaŭ, jakija nahadvajuć pra siužet kazki. Prosta pierad tvaram hihanckaj karalevy, na tonkaj prazrystaj ildzinie, siadzić maleńki Kaj.
Chłopčyk zasiarodžana sprabuje skłaści z vostrych ledzianych askiepkaŭ słova «Viečnaść». Pavodle kazki, mienavita hetaje zadańnie jon musić vykanać, kab atrymać abiacanuju ŭznaharodu — svabodu, uvieś śviet i paru novych kańkoŭ.
Dalej za im visić vialikaje raźbitaje lusterka, askiepki jakoha skažali pryhažość i chaładzili sercy. Praź jaho na paŭnočnym aleni lacić advažnaja Hierda, jakaja śpiašajecca na dapamohu nazvanamu bratu.
Stylistyka vobrazaŭ adsyłaje da znakamitaha savieckaha multfilma 1957 hoda, jaki ličycca adnoj z najlepšych ekranizacyj tvora Chansa Kryścijana Andersana. Heta historyja pra adviečnaje supraćstajańnie ledzianoj viečnaści i chałodnaj abyjakavaści, uvasoblenaj u chałodnaj pryhažuni, i žyvych ciepłyni i mužnaści, jakija niasie maleńkaja dziaŭčynka.
Ciapier minčuki čakajuć, čym adkaža handlovy centr Dana Mall na Uschodzie, jaki viadomy svaimi jarkimi i bujnymi śviatočnymi dekaracyjami.
«Naša Niva» — bastyjon biełaruščyny
PADTRYMAĆ
Kamientary
Śniehuročka dołžna byť! ))