Iran pačynaje «pasieŭ abłokaŭ», kab zmahacca z nastupstvami samaj suchoj vosieni za apošnija 50 hadoŭ
Na fonie samaj suchoj vosieni za apošnija 50 hadoŭ ułady Irana pačali apieracyi pa tak zvanym «pasievie abłokaŭ», kab štučna vyklikać apadki i źmiakčyć nastupstvy žorstkaha vodnaha kryzisu.
Jak paviedamlaje CNN sa spasyłkaj na Nacyjanalny centr prahnazavańnia nadvorja Irana, kolkaść apadkaŭ pa ŭsioj krainie skaraciłasia na 89% u paraŭnańni sa šmathadovymi siarednimi pakazčykami. Dla Irana heta ŭžo piaty hod zasuchi zapar, a klučavyja vadaschoviščy imkliva mialejuć.
Pieršyja apieracyi pa «pasievie abłokaŭ» byli praviedzieny ŭ basiejnie voziera Urmija na paŭnočnym zachadzie krainy. Samaloty raspylajuć u abłokach chimičnyja rečyvy, jakija stymulujuć vypadzieńnie daždžu. Hetaja technałohija vykarystoŭvajecca ŭ Iranie ŭžo nie pieršy hod.
Nastupstvy zasuchi asabliva vidavočnyja na prykładzie voziera Urmija. Jašče dva dziesiacihodździ tamu jano było najbujniejšym na Blizkim Uschodzie, pryciahvała turystaŭ i padtrymlivała miascovuju ekanomiku. Siońnia ž na jaho miescy ŭtvarajecca salanaja raŭnina, a na bierazie stajać iržavyja, nieruchomyja łodki.
Vostry deficyt vady ŭžo vyklikaŭ tryvohu nakont zabieśpiačeńnia pitnoj vadoj bujnych haradoŭ, uklučajučy stalicu Tehieran. Ułady sprabujuć skaracić spažyvańnie vady, a žychary adčajna jaje ekanomiać, kab paźbiehnuć katastrofy. Ekśpierty adznačajuć, što źmieny klimatu značna paharšajuć i biez taho składanuju situacyju.
Kiraŭnik Nacyjanalnaha daśledčaha centra pa «pasievie abłokaŭ» Machamad Miechdzi Džavadzijan-Zade zajaviŭ, što apieracyi z vykarystańniem samalotaŭ i bieśpiłotnikaŭ praciahnucca da siaredziny maja. Jon padkreśliŭ, što ŭ zasušlivych umovach Irana hety mietad vykarystoŭvajecca, kab pavialičyć kolkaść apadkaŭ u vadazbornych basiejnach.
«Pra jaki sajuz možna havaryć?» Łukašenka ŭ Astanie raskrytykavaŭ Rasiju za naviazvańnie utylzboraŭ15
Kamientary