«Banhkok lepšy za Łondan». Jak biełaruska pierajechała ŭ Tajłand i buduje tam biznes

«Zaraz ja raźvivaju ŭłasny prajekt, dobra siabie adčuvaju ŭ Tajłandzie i ŭsio čaściej dumaju, što paśla Łondana Banhkok — najlepšy horad dla mianie. Raskazvaju, jak uładkavana majo žyćcio ŭ stalicy Tajłanda: kolki jano kaštuje, jak tut pracujuć i za što ja tak palubiła Banhkok», — piša jana.

Kolki kaštuje žyćcio ŭ Tajłandzie

• Žyllo. Možna znajści biudžetnyja varyjanty ŭ rajonie $300—400, ale heta budzie davoli ścipłaje žyllo. Kamfortny kandaminium z basiejnam, spartzałaj i parkoŭkaj budzie kaštavać kala $600—800 u miesiac. A ad $1,000 — jašče bolš prastornyja i kamfortnyja apartamienty.
• Strachoŭka. U Tajłandzie vielmi dobraja miedycyna. Ale davoli darahaja. U siarednim strachoŭka z pakryćciom niaščasnych vypadkaŭ, śmierci i stacyjanaram abychodzicca prykładna ŭ $400—500 u miesiac. Niekatoryja žyvuć biez strachoŭki, ale heta ŭžo pytańnie asabistaj hatoŭnaści da ryzyk.
• Ježa. Charčavacca možna vielmi pa-roznamu: ad dastatkova biudžetnaha varyjantu da rehularnych restaranaŭ ci dastaŭki na dom. U siarednim ja b zakładvała prykładna $500—1,000 u miesiac.
• Astatnija vydatki — kamunałka, bytavyja traty, šopinh, masažy i inšyja drobiazi — mohuć pačynacca prykładna ad $500 u miesiac. Kali patrebna mašyna ŭ doŭhaterminovuju arendu, heta jašče kala $500—600 źvierchu. Kupić aŭtamabil u Tajłandzie z sałona možna ad $10,000 z dobraj rasterminoŭkaj.

Pavialičyć

Tak što dla ekanomnaha žyćcia na adnaho čałavieka možna raźličvać ad $1,500 u miesiac. Dla kamfortnaha ŭzroŭniu ja b aryjentavałasia na $2,000—2,500. Kali chočacca žyć užo zusim dobra — z kłasnym žyllom, mašynaj, restaranami, spa i inšymi pryjemnymi rečami — lepš zakładvać $3,000—4,000 u miesiac. A dalej užo ŭsio zaležyć ad asabistych zapytaŭ.

Praca i vizy

Zaraz dla tych, chto choča pažyć u Tajłandzie i pracavać vydalena, stała bolš varyjantaŭ, čym raniej.

Adzin ź ich — DTV Visa (viza dla ličbavych kačeŭnikaŭ). Treba pakazać, što ty aficyjna pracuješ dystancyjna, i heta pavinna być prapisana ŭ kantrakcie i mieć prykładna $15 tysiač na rachunku. Takaja viza dajecca na piać hadoŭ, i možna vyjazdžać z krainy. Pracavać unutry krainy na tajskaha pracadaŭcu aficyjna pa hetym typie vizy nielha.

Inšy varyjant — šukać pracu ŭžo na miescy. Farmalna možna pryjechać turystkaj, chadzić na sumoŭi, atrymać ofier. Ale kali kampanija vyrašyć naniać vas, to treba budzie rabić dakumienty pa-za Tajłandam. Naprykład, u susiednich Małajzii ci Vjetnamie.

Pracu šukajuć praz łakalnyja partały nakštałt JobsDB, LinkedIn i nietvorkinh. Na łakalnym rynku časta chočuć, kab čałaviek havaryŭ i pa-tajsku, i pa-anhlijsku. Ale zamiežnikaŭ taksama biaruć, kali ŭ ciabie mocny dośvied. U asnoŭnym zarobki nižejšyja, čym u jeŭrapiejskich kampanijach, ale na tym ža ŭzroŭni ci navat vyšej dla top-mieniedžaraŭ, bo ŭ Banhkoku šmat ofisaŭ mižnarodnych kampanij.

Banhkok — najlepšy dla mianie horad

Kaliści da Tajłanda ja niekalki hadoŭ pražyła ŭ Łondanie. I zaraz dakładna mahu skazać, što Banhkok dla mianie — najlepšy horad. Tut taksama jość viečaryny, restarany, znajomstvy, mižnarodnaje asiarodździe, vialikija kampanii, dziełavoje žyćcio.

Ale ŭładkavana inakš, bolš padładžvajucca pad pracujučych ludziej. Naprykład, fiestyvali ci ivienty pačynajucca ŭ 7—8 viečara i zakančvajucca apoŭnačy. Chočaš praciahvać — idzi ŭ kłub. Nie chočaš — spakojna jedzieš dadomu i na nastupny dzień pracuješ. Dla mianie heta narmalny life-work balance.

I tut vielmi dobry dostup da adpačynku. U kandaminiumach, u jakich žyvuć ekspaty, prama ŭ budynku mohuć być basiejn, sauna, spa-zona, zimovy sad. Unizie abaviazkova 7‑Eleven (papularnaja sietka kramaŭ la doma), masažny sałon, kafe. Nu i ceny vielmi pryjemnyja. U Łondanie masaž siaredniaj jakaści budzie kaštavać $150, tady jak u Banhkoku ty addasi $10. I heta budzie vydatna.

Pavialičyć

A jašče Banhkok vielmi biaśpiečny horad. U Łondanie mnie byvała strašna iści pa niekatorych rajonach navat dniom. A ŭ Banhkoku ja amal zabyłasia, što takoje pastajanna napružvacca. Ja mahu prajści pa vulicy ŭ šortach i topie, mahu apynucca ŭ nie samym pryhožym rajonie, i nie adčuvać pahrozy. Tajcy — budysty, i ŭ ich kultury nielha kraści ci rabić drenna inšamu čałavieku.

Spačatku śpiakota vymotvaje, potym arhanizm pierabudoŭvajecca

Klimat — asobnaja historyja. U Tajłandzie stabilna horača, prykładna 30 hradusaŭ navat uviečary. U pieršy čas heta moža być źniasilvajuča. Ale praz paŭhoda ja aklimatyzavałasia, navat pierastała tak mocna pacieć. Našmat bolš času pravodžu ŭ zakrytych prastorach, hulaju tolki pa viečarach.

I heta bolš pryjemna, tamu što ŭ Minsku mnie treba było zaŭsiody hladzieć prahnoz nadvorja, i rezkija pierapady tempieratur drenna adbivalisia na zdaroŭi. Tut ža ŭsio vielmi stabilna, i na moj pohlad, heta navat lepš.

Vielmi dapamahaje toje, što ŭ horadzie pastajanna jość vada pobač z taboj: basiejn u domie, mora nie biaskonca daloka, spa, łaźni. Ja, darečy, tolki ŭ Tajłandzie navučyłasia chadzić u łaźniu. Vychodziš rasparenaja, skačaš u prachałodny basiejn — i tabie nie choładna.

Za try hady ŭ mianie navat imunitet pamianiaŭsia. Ja stała mienš chvareć, ale pry hetym pačała mierznuć. Raniej była zahartavanaja, a ciapier pry +15 mnie ŭžo choładna, chočacca apranucca ciaplej.

Ja ŭsio roŭna čužaja

Kultura ŭ Tajłandzie mocna adroźnivajecca ad biełaruskaj. Ja nie mahu skazać, što całkam razumieju tajcaŭ. Časam mnie zdajecca, što jany krychu padobnyja da nas: spakojnyja, miakkija, uśmichajucca, nie lubiać pramych kanfliktaŭ.

I ŭ pracy, naprykład, treba być našmat miakčejšaj. Mnie kaliści dali dobruju paradu: kali chočaš patłumačyć štości składanaje džunu ci midłu, ujavi, što pierad taboj piacihadovaje dzicia. To bok treba ŭsio spraščać, nie cisnuć, tłumačyć maksimalna jasna. I z tajcami važna budavać sacyjalnaje ŭzajemadziejańnie. Jany lubiać, kali jość kantakt, kali bos ci partnior nie prosta razdaŭ zadačy, a vyjšaŭ z kamandaj, pahavaryŭ, pravioŭ čas razam.

Ale tut vielmi pryjaznyja ludzi, tamu ja atrymlivaju šmat ciapła. Dy i tut vielmi šmat zamiežnikaŭ z roznych kancoŭ śvietu. U hetym sensie Banhkok padobny da Łondana. Časam navat stamlaješsia sacyjalizavacca.

Ale ŭ vialikaha horada jość i advarotny bok. Suviazi časta kropkavyja. Kab ubačycca, treba doŭha jechać, zahadzia płanavać, padładžvacca pad hrafiki. Heta nie Varšava, dzie šmat biełarusaŭ i možna chutka sabrać blizkaje koła.

Ja adna pierajazdžała i, kaniešnie, mnie było składana, choć kampanija i dapamahała, ale adzinota časam prynosiła pakuty. Byli momanty takoj tuhi pa domie, pa siamji, lubimych, rodnych. Tamu što heta vielmi daloka. Lubaja pajezdka dadomu — heta minimum kala $2 tysiač tudy-nazad i amal sutki ŭ darozie. Tamu pakul što ja ź ciažkaściu, ale testuju pajezdki ŭ Minsk/Varšavu i nazad.

• 2
• 0
• 0
• 1
• 0
• 1
• 0
• 0