Biełarusu ŭ Polščy vydalili puchlinu z mozhu — ciapier jon adnaŭlajecca paśla spynieńnia serca. Siamja prosić dapamohi

Dapamahčy Uładzimiru možna tut.

Siamja Uładzimira — muž, žonka i darosłyja dzieci — apynułasia ŭ Polščy ŭ 2022-m. Da hetaha jany žyli ŭ Minsku, dzie baćka, Uładzimir, pradavaŭ zapčastki na aŭtarynku, a jahonaja žonka pracavała ŭ adnoj z handlovych sietak.

Paśla pierajezda siamja pasialiłasia pad Varšavaj. Jany zmahli nabyć u kredyt kvateru, a voś z pracaj było składana. Iznoŭ pracavać z zapčastkami va Uładzimira nie atrymałasia: nie chapiła viedańnia polskaj movy — i daviałosia šukać fizičnuju pracu.

Apošnim miescam, dzie ŭ mužčyny atrymałasia papracavać, było varšaŭskaje mietro — tam jon prybiraŭ stancyi. Syn mužčyny znajšoŭ pracu bortpravadnika, dačka pajšła vučycca va ŭniviersitet, a žonka Uładzimira pracuje ŭ adnoj z polskich kram.

Praź niekalki hadoŭ u Polščy ŭ siamji źjavilisia prablemy. 

«U siaredzinie 2025‑ha ŭ baćki pačalisia hałaŭnyja boli. Jon spačatku kazaŭ, što, moža, heta z-za pracy, moža, z-za ŭzrostu. Baćka pracavaŭ napružana: kala 14 hadzin u dzień», — uspaminaje syn Andrej.

Pavodle słoŭ Andreja, baćka sprabavaŭ zahłušyć boli tabletkami, ale ŭsio viartałasia, i tady žonka ŭhavaryła mužčynu źviarnucca da miedykaŭ. Pieršy vizit skončyŭsia ničym, adnak na paźniejšym MRT hałaŭnoha mozhu, u kancy 2025-ha, va Uładzimira znajšli ŭ hałavie puchlinu i terminova nakiravali jaho ŭ balnicu, kab vydalić jaje.

«7 studzienia 2026 hoda jaho špitalizavali ŭ varšaŭskuju balnicu. Daktary kansultavalisia ź inšymi balnicami, jak jaho apieryravać, kab minimizavać ryzyki. I 12 studzienia jamu siem hadzin rabili apieracyju», — kaža Andrej.

Puchlina akazałasia dabrajakasnaj, jaje vyrazali całkam. Spačatku ŭsio było dobra, uspaminaje chłopiec:

«Pieršaje, što zapytali ŭ jaho daktary paśla apieracyi — ci razumieje jon, chto jon i dzie znachodzicca. Na ŭsie łahičnyja pytańni baćka całkam adkazvaŭ, ź nievialikaj dapamohaj zmoh ustać z łožka.

Ranicaj 14 studzienia ja pryjechaŭ da jaho, my parazmaŭlali i ja pabačyŭ, što treba iści, tamu što da jaho pryjšli daktary. Pajechaŭ dachaty. Apoŭdni da jaho pryjechała maja siastra, i potym jana mnie pazvaniła i skazała, što ŭ baćki spyniłasia serca».

Pavialičyć

Heta adbyłosia, kali mužčynie sprabavali pastavić nazahastralny zond. Miljonam ludziej staviać takija zondy paśla apieracyj, kali jany nie mohuć sami hłytać i treba dastavić u ich arhanizm ježu ci leki. Heta zvyčajnaja pracedura, ale ŭ vypadku z Uładzimiram jana dała ŭskładnieńnie, i serca mužčyny spyniłasia. Jano nie biłasia čatyry chviliny, i ŭvieś hety čas mozh Uładzimira byŭ biez kisłarodu. Praz heta jon mocna paciarpieŭ.

«Baćku adrazu ŭviali ŭ miedykamientozny son, kab spynić paškodžańnie mozha. Niejki čas baćka byŭ biez prytomnaści, potym jon pačaŭ krychu reahavać, raspluščvać vočy, ale kamunikacyi było vielmi mała. Naprykład, jamu niešta kazali, a jon i nie zaŭždy reahavaŭ», — tłumačyć Andrej.

Polskija miedyki prapanoŭvali nakiravać Uładzimira ŭ chośpis. Ale paščaściła — reabilitołah z toj kliniki, dzie znachodziŭsia mužčyna, pabačyŭ, jak biełarus kamunikuje z žonkaj pociskam dałoni, i zrabiŭ vysnovu, što Uładzimir maje patencyjał da adnaŭleńnia. Daktary paraili chutka znajści miesca dla reabilitacyi, bo kali ŭ takoj situacyi zhubić čas, vyniku moža i nie być.

Rodnyja znajšli dla Uładzimira kliniku, dzie jon z sakavika prachodzić reabilitacyju za košt polskaj dziaržaŭnaj strachoŭki. Taja strachoŭka pakryvaje tolki hod adnaŭleńnia, ale niama sumnievaŭ, što pry takich traŭmach adnaŭlacca treba budzie daŭžej.

Tamu siamja zapuściła zbor, kab ź jaho dapamohaj apłačvać dalejšuju reabilitacyju. Padtrymka dla ich važnaja jašče i tamu, što zarobak Uładzimira byŭ asnoŭnym u biudžecie siamji — ciapier siamja zastałasia bieź jaho, a treba i kredyt za kvateru płacić, i niejak žyć, i dahladać baćku.

Pavialičyć

«Ciapier stan baćki lepšy, čym kali jon byŭ u zvyčajnaj balnicy. Ale jon jašče nie moža razmaŭlać, nie moža samastojna ŭstavać i jeści. Tamu treba dalejšaja reabilitacyja, moža, jašče na niekalki hadoŭ», — miarkuje Andrej.

Jašče ŭ pieršyja dni paśla spynieńnia serca rodnyja Uładzimira pytalisia ŭ daktaroŭ, jakija ich prahnozy. Tyja adkazvajuć aściarožna — budziem nazirać, ničoha nie možam skazać.

Andrej tłumačyć, čamu, na jaho dumku, daktary tak siabie pavodziać:

«Jany aścierahajucca niešta kankretnaje kazać, bo stan zaŭždy moža źmianicca. I pakolki baćku rabili apieracyju na mozhu, dy jašče i mozh paciarpieŭ potym dadatkova, to jasna, čamu daktary padychodziać da hetaha piesimistyčna. Škada, ale navukoŭcy jašče šmat čaho nie viedajuć pra mozh.

Šmat zaležyć ad reabilitacyi, ad taho, jak baćku dahladajuć, i ad taho, jak chutka my budziem ładzić reabilitacyju. Bo kali niešta prypynicca, to ŭsio zroblenaje nie budzie mieć sensu».

Na zapyt rodnych Uładzimira ab dapamozie ludzi adhuknulisia — ciapier sabrana ŭžo bolš za $15 tysiač. Andrej dziakuje ŭsim, chto dapamahaje:

«Dla nas było šokam, kali my adkryli zbor i ludzi chutka nam šmat achviaravali. My z mamaj dumali, što, mahčyma, ničoha nie atrymajecca, kamu heta cikava.

My nikoli ničoha nie prasili ŭ žyćci, a ciapier tak atrymałasia, što vielmi patrebnaja dapamoha. Byvaje, zdarajecca strašnaja situacyja i siamja zastajecca ź joj sam-nasam, a tut ludzi dapamahajuć, i heta vielmi važna».

Dapamahčy Uładzimiru možna tut.

• 0
• 0
• 0
• 0
• 0
• 7
• 0
• 0