«Ustańcie, ser Devid» — Bekchem atrymaŭ rycarskaje zvańnie. Na ŭračystaści jon byŭ u harnitury, jaki sšyła žonka

50‑hadovy Devid Bekchem atrymaŭ rycarskaje zvańnie ad karala padčas cyrymonii ŭ Bierkšyry ŭ aŭtorak.

«Ludzi viedajuć, nakolki ja patryjatyčny — ja lublu svaju krainu. Ja zaŭsiody kazaŭ, nakolki važnaja manarchija dla majoj siamji. Mnie pašancavała padarožničać pa ŭsim śviecie, i ŭsie ludzi chočuć sa mnoj havaryć pra našu manarchiju. Ja hanarusia hetym», — skazaŭ jon učora.

Bekchema supravadžali jaho žonka Viktoryja i jaho baćki Sandra i Devid.

Viktoryja, jakaja atrymała orden Brytanskaj impieryi (OBE) u 2017 hodzie za zasłuhi pierad industryjaj mody, sprajektavała i pašyła harnitur, u jaki byŭ apranuty jejny muž dla cyrymonii ŭ zamku.

«Karol Karł byŭ davoli ŭražany maim kaściumam», — skazaŭ Bekchem.

«Jon samy elehantna apranuty mužčyna, jakoha ja viedaju, tamu jon natchniŭ niekalki maich vobrazaŭ za hetyja hady i, biezumoŭna, natchniŭ hety vyhlad. Heta była reč, jakuju zrabiła dla mianie maja žonka. Ja pahladzieŭ staryja zdymki jaho, kali jon byŭ jašče maładym, u ranišnich kaściumach, i padumaŭ: «Dobra, voś što ja chaču nasić», — tamu ja addaŭ heta žoncy, i jana zrabiła heta», — dadaŭ futbalist.

Bekchem zhulaŭ 115 razoŭ za svaju krainu i byŭ kapitanam zbornaj «Troch lvoŭ» na praciahu šaści hadoŭ — z 2000 pa 2006. Były paŭabaronca «Mančester Junajted» i «Reała» zhulaŭ u troch čempijanatach śvietu za Anhliju, a taksama ŭ dvuch čempijanatach Jeŭropy.

Bekchem vyjšaŭ z akademii «Junajted» u 1992 hodzie i pravioŭ 11 hadoŭ u asnoŭnaj kamandzie, pierš čym u 2003 hodzie pierajści ŭ «Reał» za £25 miljonaŭ. Taksama hulaŭ u «Łos-Andželes Hałaksi», «Miłanie» i PSŽ.

Ale ŭpłyŭ Bekchema vychodzić daloka za miežy futbolnaha pola.

Jon naradziŭsia va ŭschodnim Łondanie i syhraŭ rolu ŭ tym, što Łondan atrymaŭ prava na praviadzieńnie Alimpijskich hulniaŭ 2012 hoda.

Devid supracoŭničaje z humanitarnaj arhanizacyjaj Unicef z 2005 hoda, a ŭ 2015 hodzie byŭ stvorany fond, nazvany ŭ jaho honar, kab adznačyć dziesiacihadovaje partniorstva pamiž imi.

Bekchem, jaki atrymaŭ orden Brytanskaj impieryi (OBE) ad Lizaviety II u 2003 hodzie, stajaŭ u čarzie bolš za 12 hadzin, kab raźvitacca z karalevaj vosieńniu 2022 hoda.

«Asablivaje pačućcio być tut, sumavać i słuchać roznyja historyi, jakija majuć ludzi», — skazaŭ paśla hetaha Bekchem.

Bekchem staŭ pasłom Fondu Karala ŭ 2024 hodzie, padtrymlivajučy adukacyjnuju prahramu karala Karła i namahańni, skiravanyja na toje, kab maładyja ludzi lepš razumieli pryrodu.

• 2
• 0
• 0
• 0
• 0
• 0
• 0
• 0