Vystava «Michaś Sieŭruk. Idylija» da 120‑hodździa z dnia naradžeńnia biełaruskaha mastaka, žyvapisca, hrafika, aŭtara žanravych kampazicyj, partretaŭ i piejzažaŭ pradstaŭlena ŭ Nacyjanalnym mastackim muziei (NMM), paviedamlaje BiełTA.
Pavodle słoŭ viadučaha navukovaha supracoŭnika Nacyjanalnaha mastackaha muzieja Julii Lisaj, upieršyniu za apošnija 45 hadoŭ pradstaŭlena maštabnaja panarama prac Michasia Sieŭruka, jakaja adlustroŭvaje ŭsie pieryjady tvorčaści. U ekspazicyju ŭvajšli tvory, jakija raniej nie ekspanavalisia, pradstaŭleny novyja navukovyja adkryćci ŭ halinie vyvučeńnia tvorčaści i bijahrafii mastaka, a taksama novyja atrybucyi jaho tvoraŭ.
Prajekt padrychtavany sumiesna ź Niaśvižskim histaryka-krajaznaŭčym muziejem, jaki źjaŭlajecca ŭładalnikam samaj bujnoj kalekcyi tvoraŭ Michasia Sieŭruka. U fondach hetaha muzieja zachoŭvajecca kala 1,3 tys. pradmietaŭ: heta vializnaja kolkaść hrafiki i žyvapisu. U Niaśvižy taksama adkryta kvatera-muziej mastaka.
Na vystavie ŭ NMM pradstaŭleny pracy taksama z fondaŭ Biełaruskaha sajuza mastakoŭ, pryvatnych kalekcyj. Hledačy mohuć ubačyć bolš za 120 tvoraŭ žyvapisu i hrafiki.
«Padčas padrychtoŭki da prajekta byli zrobleny navukovyja adkryćci. Niekatoryja pracy nabyli nazvy, dakładnyja datavańni. Heta značyć, praviedziena dastatkova vialikaja navukovaja praca, — adznačyła Julija Lisaj. — My supracoŭničali ź Biełaruskim dziaržaŭnym archivam — muziejem litaratury i mastactva, u kalekcyi jakoha majucca rarytetnyja fatahrafii. Ja hanarusia tym, što ŭklučyła fatahrafii roznych pieryjadaŭ žyćcia Sieŭruka ŭ našu ekspazicyju».
Kažučy pra praviedzienuju pracu, viadučy navukovy supracoŭnik dadała, što joj udałosia dziakujučy fatahrafijam i ałoŭkavym eskizam ustanavić imiony dziaciej, adlustravanych na adnym z partretaŭ. Vyśvietliłasia, što heta čatyry plamieńniki Sieŭruka. Jana źviazałasia ź dziećmi adnaho ź plamieńnikaŭ, jakija pražyvajuć u Maskvie. I akazałasia, što hetyja ludzi zachoŭvajuć doma vydatnyja archivy.
Vystava praciahniecca da 14 studzienia 2026 hoda. U hety pieryjad u NMM projdzie dastatkova vialikaja kolkaść lekcyj i kuratarskich ekskursij, pryśviečanych tvorčaści Sieŭruka.
Michaś Sieŭruk (1905—1979) viadomy ŭ asnoŭnym jak mastak, šmat pracavaŭ z temaj biełaruskaha sialanskaha žyćcia, jakuju jon traktavaŭ u idyličnym klučy, źmiaščajučy ŭ kampazicyjnyja i kalarovyja formuły epochi Reniesansu.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary