«Piensijanieram dzieci pieraškadžajuć!» U Breście nie pieršy miesiac iduć sprečki nakont miesca dla budaŭnictva dziciačaha sada
Moładź aburajecca, što dziaciej treba vazić praz pałovu horada ŭ dziciačy sadok, a ludzi stałaha ŭzrostu patrabujuć cišyni i chvalujucca za drevy.
Sioleta ŭłady Bresta paviedamili, što źbirajucca pabudavać novy dziciačy sadok na 190 dziaciej u mikrarajonie Paŭdniovy. Na rendarach usio vyhladaje šykoŭna: sučasnyja dziciačyja placoŭki, utulnyja hrupy ź vielizarnymi voknami i navat basiejn. Bonusam abiacali ŭładkavać terytoryju pobač.
Hramadskaje abmierkavańnie pravodzili z 19 maja pa 2 červienia 2025 hoda. Potym aficyjna paviedamlałasia: 1838 hramadzian padtrymali ideju budaŭnictva novaha dziciačaha sada, suprać vystupili 454 čałavieki.
Ale za suchimi ličbami chavajecca kanflikt pakaleńniaŭ, jaki nie ścichaje ŭžo niekalki miesiacaŭ.
«Kali niama mašyny, to pieramiaščeńni ź dziciom pa horadzie zajmajuć da troch hadzin u dzień!»
Ułady arhumientavali nieabchodnaść sada tym, što ŭ mikrarajonach Paŭdniovy i Vulka aktyŭna budujecca žyllo — u tym liku dla šmatdzietnych siamiej i siemjaŭ vajskoŭcaŭ (bo pobač 38‑ia Bresckaja desantna-šturmavaja bryhada). A tyja sadki, jakija jość, pierapoŭnienyja.
Toje, što prablema sapraŭdy aktualnaja, možna pabačyć pa kamientaryjach u tyktoku. Ludzi aburajucca, što im prychodzicca vazić dziaciej praz pałovu horada.
Voś adzin z krykaŭ dušy ad maładoj maci:
«Uvieś Paŭdniovy Zachad, Vulka i Paŭdniovy pakutujuć ad niedachopu miescaŭ u dziciačych sadkach. Kali dzicia naradziłasia nie ŭ vieraśni-śniežni, — usio, ty asudžany vazić jaho ŭ sad u lepšym vypadku ŭ centr, a viasnovych i letnich dziaciej — na ŭschod! A kali niama mašyny, to hetyja pieramiaščeńni zajmajuć da troch hadzin u dzień.
I voś źjaŭlajecca chacia b niejki varyjant vyrašeńnia hłabalnaj prablemy, dyk nie, piensijanieram dzieci zaminajuć! Adkul hetaja tendencyja źjaviłasia za apošnija hadoŭ piać, što dzieci raptam pačali ŭsim pieraškadžać?! U transparcie burčać, u kafe aburajucca, u kramie z vazočkam baišsia zrabić lišni ruch, a ciapier, akazvajecca, i samo isnavańnie dziciaci ŭ niepasrednaj blizkaści z darosłymi — taksama złačynstva! Śviet zvarjacieŭ!»
«U asnoŭnym u hetych damach žyvuć piensijaniery, jakim patrebny cišynia, spakoj»
Praciŭniki budaŭnictva ličać, što hramadskaje abmierkavańnie pryznačyli ŭžo paśla taho, jak ułady sami ŭsio vyrašyli. Bo jašče 27 lutaha «UKB horada Bresta» zapłaciła 32 500 rubloŭ za tendar na inžyniernyja pasłuhi pa kiravańni budaŭnictvam i vykanańni funkcyj zakazčyka pry prajektavańni dziciačaha sadka na 190 miescaŭ z basiejnam na vulicy Žukava ŭ Breście.
Na telekanale «Biełaruś 4. Brest» raspaviali, što staršyni Bresckaha harvykankama Siarhieju Łabadzinskamu patelefanavała šmat aburanych ludziej.
Žurnalisty śćviardžajuć, što ŭ asnoŭnym heta ludzi stałaha ŭzrostu. Jany parazmaŭlali ź piensijanierami, jakija kateharyčna suprać sada, i voś jakija arhumienty pačuli.
«U nas błokavyja damy, čutnaść stopracentnaja, voś u nas pamiž damami zrabili jak by nie dziciačuju placoŭku, a prosta areli i piasočnicu. I dzieci kryčać, heta ž dzieci, ich nie ŭtajmavać, i biez taho šumna, i ŭvohule my kateharyčna suprać», — raspaviała piensijanierka Śviatłana.
«U asnoŭnym u hetych damach žyvuć piensijaniery, jakim patrebny cišynia, spakoj. Potym ža heta budzie vialiki patok transpartu, heta taksama niespakoj, my suprać, i ŭsie maje susiedzi suprać hetaha. U Paŭdniovym šmat inšych miescaŭ, dzie možna spakojna biez usialakich niazručnaściaŭ dla žycharoŭ znajści miesca dla hetaha sadka»,
— ličyć Uładzimir, jaki žyvie ŭ Paŭdniovym 40 hadoŭ.
Jašče adzin važny niuans: pad budaŭnictva dziciačaha sadka addajuć miesca, dzie byŭ mini-rynak.
Pradavačka adnoj z kram dzialiłasia mierkavańniem u siužecie na dziaržaŭnym telebačańni.
«Hety rajon, voś hetyja najbližejšyja damy — pažyłych ludziej, jany chodziać z pałačkami, tam prystupki, padniacca im ciažka. Dźvie sardelki, dźvie kaŭbaski tam maleńkija kupić. Jość cyrulnia, viełasipiedy, niechta jeździć z pažyłych na daču, ramont jość. «Sad-aharod», «Pierfiekt», šavieckaja, harodnina i pradukty. Ja nie suprać sadka, ale ŭ inšym miescy. Niaŭžo nidzie nie znajšłosia miesca, kab heta zrabić? Voś i ŭsiaho tolki», — zajaŭlała Natalla.
Finansavać budaŭnictva dziciačaha sada budzie inviestar, dziakujučy čamu biudžet zekanomić vialikuju sumu. Praz heta pačali hučać mierkavańni, što mienavita inviestar vybiraŭ placoŭku.
Čynoŭniki ž zapeŭnivajuć: heta miesca na hienpłanie i praduhledžvałasia dla sadka. A miesca dla mini-rynku abiacajuć znajści niedzie nie vielmi daloka.
Idzie ŭžo šosty miesiac kanfliktu
«Brescki vieśnik» apublikavaŭ u tyktoku videa z čarhovaj sustrečy z čynoŭnikami, na jakoj sabralisia prychilniki i praciŭniki budaŭnictva dziciačaha sada. Miarkujučy pa roliku, rašeńnie, jakoje b zadavoliła ŭsich, dahetul nie znojdziena.
Žurnalisty aburajucca, što miascovyja žychary pratestujuć nie suprać kazino, zavoda ci zapraŭki, a suprać dziciačaha sadka.
«My nie chočam», «Budujcie nie tut», «Panaradžali dziaciej — sami i raźbirajciesia», — takija arhumienty pryvodziacca ŭ apisańni rolika. Abmierkavańnie vyhladaje napružanym.
U samim videa hučać nastupnyja tezisy: płošča budučaha sadka zojmie 40% ad dvarovaj terytoryi, na astatniaj płoščy abiacajuć uładkavać miescy dla adpačynku, a taksama pasadzić na 50% bolš drevaŭ, čym vyrubiać u pracesie budaŭnictva.
Padčas adnoj z papiarednich sustreč deputat Andrej Krupieńkin aburaŭsia:
«Stvarajecca ŭražańnie, što mierkavańnie praciŭnikaŭ budaŭnictva sfarmavana niekalkimi manipulatarami. Ułady pryvodziać arhumientavanyja dovady «za» dziciačy sad, a praciŭniki budaŭnictva supraćpastaŭlajuć tolki emocyi».
Mienš čym za sutki rolik z apošniaha abmierkavańnia nabraŭ 29 tysiač prahladaŭ. U kamientaryjach haračaja dyskusija praciahvajecca. Niechta ličyć, što piensijaniery pieraškadžajuć žyć moładzi, inšyja pišuć, što niepatrebny sadok u rajonie, dzie adny piensijaniery.
Maci nie zachacieła skidvacca na pyłasos u dziciačy sadok — jaje papraknuli ŭ skvapnaści
Minskim nastaŭnikam i vychavacielkam dziciačych sadkoŭ prapanujuć niedarahija kvatery ŭ Smalavičach
Bondarava dakałupałasia da vierša «Vaviorka» ŭ prahramie dziciačych sadkoŭ. Što ź im nie tak?
Dziciačy sadok u Tałačynskim rajonie zakryvać nie buduć. Baćki źviartalisia da Łukašenki, i jon ich vyrašyŭ pačuć
«Piensijanieram dzieci pieraškadžajuć!» U Breście nie pieršy miesiac iduć sprečki nakont miesca dla budaŭnictva dziciačaha sada5
Kamientary
a chto zabiaśpiečvaje vam piensii, piensijaniery, vy nie dumali?