Biełarus nyrnuŭ biez ryštunku na hłybiniu 30 mietraŭ u Mieksicy. I ŭsio dziela šykoŭnych fota
Hatovyja zanurycca na 30 mietraŭ, kab zrabić padvodny kadr u pramianiach sonca? U biełarusa Ułada jość realny dośvied. U kancy minułaha hoda jon adpraviŭsia ŭ Mieksiku — kaža, što mienavita siudy imknucca trapić fanaty frydajvinhu. Heta tyja samyja śmielčaki, jakija apuskajucca na dziasiatki mietraŭ biez kisłarodnych bałonaŭ ci luboha inšaha abstalavańnia, raźličvajučy ŭ asnoŭnym na mahčymaści svajho cieła. Akazvajecca, na takich hłybiniach ludzi padymajuć hanteli i navat karystajucca taksi. Bonusam, darečy, iduć kadry, jakija chiejtary nazavuć vynikami pracy ŠI, piša «Anłajnier».
«Kožny čałaviek moža zatrymać dychańnie na 5 chvilin. Astatniaje — psichasamatyka»
Uładzisłavu 31 hod. U svoj čas chłopiec skončyŭ Homielski miedycynski ŭniviersitet, ale pa śpiecyjalnaści — doktar-terapieŭt — nie pracavaŭ. Zatoje adrazu paśla vypusku adpraviŭsia skarać modnyja podyumy ŭ Kitai, Karei, Małajzii i na Filipinach.
Ale hetaja historyja chutka skončyłasia, raskazvaje surazmoŭca. Pryčynami tamu stali kankurencyja, adsutnaść pierśpiektyŭ i niestabilny zarobak. Dalej — navučańnie na prahramista, a ciapier u biełarusa svaja miedyjakampanija ŭ Hruzii. Biznes adkryŭ Uładu mahčymaść padarožžaŭ — u śpisie naviedanych užo značacca plus-minus 40 krain.
«U mianie niama mety naviedać usie krainy — u niekatorych asabliva niama čaho rabić, a jechać tudy dla ptušački niejak dziŭna. Tamu ja jedu tudy, dzie jość štości cikavaje, unikalnaje. Naprykład, bačyš u Instagram ryłs z pryhožaha miesca, jakoje vyhladaje jak kazka, — voś, heta dla mianie».
Top-5 samych pryhožych miescaŭ, na dumku Ułada:
-
Namibija. Šmat kamu zdajecca, što tam tolki pustynia. Nasamreč hetaja kraina vyhladaje jak inšaja płanieta ź niezvyčajnymi krajavidami.
-
Madejra. Viečnaja viasna: miakki klimat kruhły hod, hornyja vidy, levady i fantastyčny les u abłokach — jak byccam trapiŭ u kazku.
-
Japonija. Kantrast tradycyj i budučyni: cichija chramy i sady, nieonavyja harady, sakura — estetyka na kožnym kroku.
-
Kiejptaŭn. Unikalnyja panaramy, pinhviny, dobry klimat. Idealnaje miesca dla zaniatkaŭ sportam: siorfinh, viełaprahułki, chajkinh i hetak dalej.
-
Mieksika. Jarkaja i žyvaja: fantastyčnyja biruzovyja sienoty, džunhli i ruiny maja.
Praz adno pryhožaje videa ŭ Instagram va Ułada i źjaviłasia zachapleńnie, jakoje stała nahodaj dla hetaha intervju, — frydajvinh. Pa sutnaści, heta padvodnaje płavańnie z zatrymkaj dychańnia — samo saboj, nijakaje abstalavańnie pry hetym nie vykarystoŭvajecca.
«Ja ŭbačyŭ ryłs z supierpryhožymi kadrami pad vadoj na Bali: ludzi, karały, ryby i zatanuły karabiel. Vyrašyŭ, što taksama chaču nyrnuć, i napisaŭ škole frydajvinhu, na staroncy jakoj byŭ apublikavany rolik. Pryčym frydajvinham zajmacca ja nie chacieŭ, tolki zrabić takija ž kadry», — uśmichajecca chłopiec.
Ale akazałasia, što tolki adnaho žadańnia pafatahrafavacca na hłybini niedastatkova. Treba było prajści kurs i stać frydajvieram pieršaha ŭzroŭniu. Navučańnie koštam prykładna $300 prachodziła ŭ ekspres-farmacie — usiaho 2—3 dni.
«Paśla zakančeńnia kursa ja atrymaŭ mižnarodny siertyfikat PADI frydajviera pieršaha ŭzroŭniu. Jon ža davaŭ prava apuskacca na 20 mietraŭ. Kali jość žadańnie nyrcavać na bolšuju hłybiniu, to pa-dobramu treba praciahnuć navučańnie. Praz hod ja atrymaŭ užo druhi ŭzrovień i zdoleŭ nyrnuć na 27 mietraŭ — heta byŭ asabisty rekord».
Što samaje składanaje ŭ frydajvinhu? Na dumku Ułada, kali havorka idzie pra nyrańnie na hłybiniu da 20 mietraŭ, to ciažej za ŭsio spravicca ź psichałahičnym faktaram. Chłopiec tłumačyć tak: u hety momant treba zdoleć sabracca i nie panikavać, a ŭ cełym praces niečym padobny da miedytacyi.
«Na kursach nam kazali, što biez pahružeńnia ŭ vadu kožny čałaviek moža zatrymlivać dychańnie na 5 chvilin — heta pry ŭmovie adklučeńnia psichasamatyki. Hałoŭnaje, što mnie dali zaniatki (ja i da hetaha dobra nyrcavaŭ), — heta vypraŭleńnie pamyłak».
Viedańnie techniki «praduvańnia vušej» (abo praściej — pazbaŭleńnia ad zakładzienaści), praviłaŭ dychańnia da i paśla zanureńnia dazvolili Uładu nyrcavać hłybiej. A zaadno — pieraadoleć toj samy «ŭnutrany» strach pierad vialikaj hłybinioj.
Krychu paźniej u kampanii inšych frydajvieraŭ Uład adpraviŭsia na Radža-Ampat — archipiełah u Indaniezii.
«Niekranutaja pryroda, ty adzin na dzikim vostravie — nibyta trapiŭ u vypusk Discovery!»
Hanteli na hłybini 12 mietraŭ? I heta nie žart
U kancy minułaha hoda Uład adpraviŭsia ŭ Mieksiku — metaj padarožža ŭ tym liku byli pahružeńni ŭ sienotach. Pa sutnaści, heta pryrodnyja pravały ŭ ziamli (jość lehienda, što jany źjavilisia paśla padzieńnia mietearytaŭ), jakija ŭtvarajucca z-za abvalvańnia sklapieńnia vapniakovaj piačory, dzie ciakuć padziemnyja vody. Mienavita heta i robić mieksikanski horad Tułum pryvabnym dla frydajvieraŭ z usiaho śvietu.
Darečy, tam ža, raskazvaje Uład, možna sustreć dziejnaha čempijona śvietu ŭ frydajvinhu Alaksieja Małčanava. Časta jon apuskajecca ŭ Tułumie razam z papularnym (bolš za 5 miljonaŭ padpisčykaŭ) frydajvieram Tavi Kastra.
«Vyśvietliłasia, što my ź imi ŭ adzin čas nyrali ŭ adnych i tych žie sienotach!» — z zachapleńniem kaža Uład.
Na movie maja ts'onot (čytajecca prykładna jak «conat») aznačaje «kałodziež» — sienoty vykarystoŭvalisia ŭ tym liku jak krynica presnaj vady. Jašče maja ličyli sienoty «bramaj u carstva miortvych», a ich vody — śviaščennymi.
«Samyja pryhožyja kadry z pahružeńnia byli zroblenyja mienavita ŭ Mieksicy. Spačatku ŭ łahunie Kaan-Łuum, jakaja vyhladaje jak voziera — navat nahadała biełaruskuju miascovaść. Unutry znachodzicca vializnaja dzirka, kudy ŭsie nyrajuć, — na videa vyhladaje epična, niby biezdań!
Pieršy płast mutny, z-za hetaha nie bačna, što adbyvajecca ŭnizie. Ale paśla pahružeńnia na 5—10 mietraŭ vada stanovicca idealna prazrystaj i atrymlivajecca ŭbačyć usiu pryhažość. Potym, kali ŭdajecca dasiahnuć hłybini 25—27 mietraŭ, pačynajecca druhoje padvodnaje vobłaka — u jaho taksama možna pahruzicca. Heta nievierahodna pryhoža!»
Ale hałoŭnaja razynka hetaha miesca, raskazvaje Uład, — skała, jakaja znachodzicca na hłybini 12—13 mietraŭ. Dla efiektnaha kadra tam navat možna stać na nohi — praŭda, usio ŭpirajecca ŭ navyki nyralščyka.
«Heta nie vielmi składana, ale ŭsio zaležyć ad hłybini i punkta płavučaści — kali ty albo ŭspłyvaješ, albo tonieš, albo adčuvaješ siabie niejtralna, niby ŭ biazvažkaści. Mnie na 12 mietrach hłybini stać było lohka. Tam ža, darečy, ja navat źniaŭ videa z hantelami. Ich dziela prykołu pakinuŭ znakamity frydajvier Kastra, jaki vykarystoŭvaje vobraz Akvamiena.
Hanteli lažać tam uvieś čas, tak što kožny moža nyrnuć i zrabić ź imi fota. Ale treba być aściarožnym — jany davoli ciažkija. Kali ja ŭpieršyniu ŭziaŭ ich u ruki, byŭ prosta ŭ šoku, nakolki tam ślizka — u niejki momant pačaŭ «jechać» z hetaj skały ŭniz. Ale samy vialiki strach — upuścić hanteli ŭ biezdań. Usio ž jany nie maje, tak što nie chaciełasia ich stracić», — śmiajecca Uład.
Darečy, a jak zdymajucca ŭsie hetyja fota i videa pad vadoj? Kantent, tłumačyć surazmoŭca, robiać albo inšyja frydajviery (jany ž mohuć być naniatyja ŭ jakaści instruktaraŭ), albo śpiecyjalnyja apieratary. Dla maksimalnaj jakaści zdymajuć usio na dobruju techniku — na toj ža ekšen-kamiery, zapeŭnivaje Uład, takoha efiektu nie dasiahnuć.
«Druhaja sienota, kudy ja adpraviŭsia, — Maraviła, znachodzicca kala horada Płaja-del-Karmien. Jaje ŭnikalnaść u cudoŭnych vidach na hłybini pry śviatle sonca. Jašče adna asablivaść — hłybinia kala 70 mietraŭ, a ŭ asobnyja baki pad ziamloj jana raspaŭsiudžvajecca da socień mietraŭ, choć źvierchu dyjamietr usiaho 6—7 mietraŭ.
Mnie ŭdałosia tam pazdymać šmat pryhožych kadraŭ, ale heta kaštavała surjoznych namahańniaŭ. Pa-pieršaje, pavinna pašancavać z nadvorjem, pa-druhoje, hetuju sienotu treba braniravać, bo jana ličycca adnoj z samych pryhožych u śviecie, tamu vielmi papularnaja».
Pavodle słoŭ Ułada, usie sienoty ŭ Mieksicy pryvatnyja i naležać kankretnym ludziam. Ich možna vykupić jak dačny ŭčastak albo arandavać na čas u ciapierašnich uładalnikaŭ. Ceny vahajucca — siaredni prajs kala $20—50. Časam ich arandujuć na ceły dzień, a papularnuju Maraviłu realna zareziervavać usiaho na paru hadzin.
«Hetaha času dastatkova, kab pahruzicca i paśpieć źmierznuć, — uśmichajecca Uład. — U siarednim tempieratura vady +26…+28 hradusaŭ, što hučyć davoli kamfortna. Ale dziela kadraŭ ja nyraŭ biez hidrakaściuma, tamu zamiarzaŭ imhnienna».
Dla pahružeńnia ŭ Maraviłu Uład naniaŭ instruktarku, jakaja sačyła za tym, što adbyvajecca. A razam z chłopcam apuskaŭsia apieratar — taksama frydajvier, jaki zrabiŭ šmat uražlivych kadraŭ.
«My nyrali na hłybiniu 12 mietraŭ — heta punkt majoj płyvučaści, pry jakoj ja nie tanuŭ i nie ŭspłyvaŭ. U vyniku atrymlivałasia niby łunać u biazvažkaści — heta dziŭnyja i ni na što nie padobnyja adčuvańni. Ty litaralna ničoha nie adčuvaješ, vakoł — adna ciemra, adziny aryjencir — pramieńni adniekul źvierchu».
«Pieršaja sproba pahruzicca na 30 mietraŭ pravaliłasia»
Instruktar, darečy, heta padstrachoŭka na vypadak nadzvyčajnaha zdareńnia. Tak, kali sił u nyrcavalnika ŭžo nie chapaje, to instruktar vyciahnie na bierah.
«Treciaja sienota ŭ Mieksicy, dzie ja nyraŭ, — Anchielita, jana vyhladaje jak biełaje padvodnaje voziera. Pieršapačatkova pahružacca tudy ja nie płanavaŭ, bo samaja pryhažość znachodzicca na hłybini 30 mietraŭ, maim ža rekordam byli 27 mietraŭ. Vyrašyŭ pajechać na treniroŭku ź instruktaram i pasprabavać dasiahnuć 30 mietraŭ. Važna było zrazumieć, nakolki na takoj hłybini mnie budzie kamfortna. Bo treba było nie tolki pahruzicca, ale i pravieści na hłybini niejki čas, zrabić kadry i ŭspłyć».
Na treniroŭcy nyrnuć na 30 mietraŭ atrymałasia, ale z papraŭkaj: Uład byŭ u hidrakaściumie, a značyć, nie źmiorz. U vyniku chłopiec usio ž vyrašyŭ ryzyknuć i adpraviŭsia ŭ Anchielitu.
«Heta supierpryhožaje miesca — adno ź niamnohich, nie kranutych čałaviekam. Hetym razam sa mnoj była apieratarka z kłuba skuba-dajvieraŭ — jana apuskałasia z kisłarodnymi bałonami, dapłyvała da 30‑mietrovaj hłybini i čakała mianie tam. Kab usio vyhladała pryhoža na fota i videa, ja, jak zvyčajna, nyraŭ u štanach i kašuli, i tut pačalisia prablemy. Vada była chaładniejšaja, čym u inšych miescach, mianie prosta tresła! U takija momanty składaniej zatrymlivać dychańnie: cieła nie moža rassłabicca i tracić bolš kisłarodu».
Plus, tłumačyć chłopiec, byŭ abmiežavany čas, a ź im i kolkaść sprob — usiaho 6 razoŭ. Varyjant paskorycca taksama nie padychodziŭ: pavodle pravił frydajvinhu paśla kožnaha nyrcavańnia treba minimum 5 chvilin pabyć na pavierchni. Heta nie prosta patrabavańnie, a miera zaściarohi ad kiesonnaj chvaroby. Heta niebiaśpiečny stan, jaki ŭźnikaje pry chutkim źnižeńni vonkavaha cisku, kali rastvorany ŭ kryvi azot utvaraje burbałki, niby ŭśpieńvaje kroŭ i błakuje sasudy. U redkich vypadkach usio moža skončycca navat śmierciu.
«Jak nyrcujuć frydajviery: jość buj, jaki biareš z saboj, staviš u vadu, a zatym ź jaho źvisaje tros. Dalej pryšpilvaješsia — heta treba, kab nie zhubicca na hłybini, albo možna apuskacca ci ŭspłyvać navierch jak pa kanacie, — tłumačyć Uład. — Spačatku ja pasprabavaŭ pahruzicca na hłybiniu 30 mietraŭ pa trosie, zadača była dapłyć da pryhožaj haliny dreva. Ale ŭžo ŭ pracesie zrazumieŭ, što nie mahu nie dychać i nie dapłyvu, i padniaŭsia navierch.
Tady my ź instruktarkaj vyrašyli dziejničać inakš: jana ŭziała z saboj padvodny skutar (za jaho trymaješsia, a jon vozić ciabie pad vadoj) i zładziła «padvodnaje taksi». Ja apuskaŭsia da 10 mietraŭ, dalej jana mianie padchoplivała, ja čaplaŭsia za jaje nahu, i my dapłyvali na hłybiniu 30 mietraŭ. Dla mianie heta było poŭnaje varjactva!
Mientalna taksama było niaprosta: kali niechta ciabie ciahnie na takuju hłybiniu, a tam jašče treba pravieści niejki čas… Padklučyŭsia i strach: a raptam ja nie zmahu samastojna ŭspłyć? Heta vielmi dziŭnyja adčuvańni».
Maksimalny čas, jaki Uład pravodziŭ na hłybini, — 2 chviliny. Pry hetym pahružeńnie na 30 mietraŭ jon nazyvaje sapraŭdnym vyklikam i sprobaj pieraadoleńnia siabie. Darečy, dziela čaho ŭsio heta?
«U maim vypadku pryčyny dźvie: pieršaja — mnie vielmi padabajecca zdymać pryhožyja kadry, druhaja — žadańnie acanić svaje mahčymaści, zrazumieć, na što ja zdolny. Kali hladziš videa z takich miescaŭ, to zadumvaješsia: a čym ja horšy? Atrymlivajecca, što heta svajho rodu čelendž».
Instruktar tłumačyć, jak mahła adbycca trahiedyja ź biełaruskaj, jakuju źniesła płyńniu pad Murmanskam
Chłopiec patanuŭ padčas dajvinhu ŭ Hielendžyku, bo instruktary zabylisia zapoŭnić bałon
Słova «Unavatuna» značyć «raj». Dzie na Šry-Łancy adpačyvała Mielnikava
Biełaruska pracuje ŭ Dubai rusałkaj, kab addać doŭh 20 tysiač dalaraŭ
«Źmirałasia z takoj niedarečnaj śmierciu». Minskaja madel ledź nie zahinuła, katajučysia na vadzie na hidrafojle
Ciapier čytajuć
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB28
Biełarus, jaki vajavaŭ za Ukrainu, raspavioŭ, čym jaho začaravała kachanka Ina Kardaš, ahientka KDB
«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ66
Kamientary
A ci skočyć chto z duba, z samaj vieršaliny ? Napišycie...