Słova «Unavatuna» značyć «raj». Dzie na Šry-Łancy adpačyvała Mielnikava
Biezdakornyja plažy, pyšnyja kakosavyja hai i cudoŭnyja akijanskija krajavidy. Tak siabie rekłamuje piacizorkavy spa-centr Araliya Beach Resort, dzie siem dzion paśla tajamničaha źniknieńnia praviała byłaja śpikierka Kaardynacyjnaj rady Anžalika Mielnikava. My pahladzieli, na što jana mahła raźličvać padčas adpačynku. Siarod inšaha, u hateli jość ułasny ryf, a na plažy haściam padajuć tunca.
Araliya Beach Resort & Spa — heta pieršy piacizorkavy hatel u šry-łankijskaj miascovaści Unavatuna, adnoj z hałoŭnych turystyčnych piarlinaŭ hetaha vostrava ŭ Indyjskim akijanie. Haścinicy ŭsiaho piać hadoŭ.
U staražytnaindyjskim epasie «Ramajana» raj apisvaŭsia mienavita słovam «unavatuna». Mielnikava ź dźviuma dočkami zasialilisia ŭ Araliya Beach Resort & Spa 28 lutaha i praviała tam tydzień, pisałasia ŭ rasśledavańni Polityka.
Studzień-sakavik na Šry-Łancy ličycca najlepšym siezonam dla adpačynku.
Pierad hetym Anžalika była tamsama ŭ studzieni 2024 hoda. Jak vynikaje sa słoŭ ananimnaj siabroŭki žančyny, tady jana adpačyvała ŭ kampanii biełarusa spartyŭnaha vyhladu.
Ad studzienia da sakavika na vostravie soniečna i sucha, niama viatroŭ. Tamu možna mierkavać, što Anžalicy Mielnikavaj jak tady, tak i ciapier pašancavała z adpačynkam. Hetamu spryjała nie tolki nadvorje, ale i ŭmovy haścinicy, dzie jana z dočkami spyniłasia.
Araliya Beach Resort & Spa ličycca adnym z najlepšych hatelaŭ Šry-Łanki. Jon adnosicca da kłasa luxury.
Mienavita adsiul Anžalika Mielnikava telefanavała kaleham i raskazvała, što jana chvareje, tamu nie moža pryjści na rabotu.
Kolki kaštuje pražyvańnie ŭ takoj haścinicy? My pravieryli tyja samyja daty na nastupny hod. Samy tanny pakoj dla adnaho darosłaha i dvaich dziaciej kaštuje pryblizna $1500. Varyjant sa śniadankam — čarhovyja $300 na ŭsich za tydzień. Razam — $1800. Jość varyjanty z abiedami i viačerami, abo varyjant all inclusive. Heta kaštuje niekalki tysiač dalaraŭ za tydzień. U jakich umovach žyła byłaja śpikierka Kaardynacyjnaj rady — nieviadoma, ale ŭličvajučy abiedy i viačery, navat kali jany byli pa-za hatelem, hetaja suma nie mienšaja za $3000. Tolki 100 hramaŭ łobstara ŭ restaranie hatela kaštuje $5.
Jość u hateli i varyjant kłasu Premier. Taki pakoj kaštuje kala $4000 za tydzień, a apartamienty ź dźviuma spalniami — amal $9000.
U Araliya Beach Resort&Spa pracuje ažno 12 restaranaŭ i baraŭ.
Jość stravy roznych kultur — ad mižnarodnych da tradycyjnych straŭ Šry-Łanki. Taksama prapanujecca kuchnia fjužn i bahatyja šviedskija stały sa stravami z usiaho śvietu. Uvieś tydzień možna charčavacca ŭ roznych restaranach, nie vychodziačy za miežy hatelnaha kompleksu.
Akurat ceły tydzień, kali tam znachodziłasia Mielnikava, u hateli śviatkavali Dzień žančyn. U dzień jaje zajezdu, u piatnicu 28 lutaha, u načnym kłubie hatela hrymieła viečarynka-dyskateka ź biaspłatnymi ružovymi kaktejlami dla kabiet.
U suboty ŭ plažnym kłubie hatela pracuje šviedski stoł. U im padajuć «vytančanyja prysmaki» z usiaho śvietu. Anžalika mieła mahčymaść trapić na jaho adnojčy, na druhi dzień pryjezdu. Cana takoj radaści — 10 jeŭra na čałavieka.
Na papularnym turystyčnym sajcie Tripadviser klijenty hatela, jakija žyli tam u toj ža čas, što i Mielnikava, pakinuli bahata vodhukaŭ. Ich zachapiŭ achoŭvany plaž, dzie a 12:00 haściam padajuć tunca.
Plaž Unavatuny ź bieleńkim piasočkam i šyrokaj bierahavoj linijaj pryznany, darečy, najlepšym na vostravie. Z hatela da jaho ŭsiaho 50 mietraŭ.
U hateli svaja škoła siorfinhu i dajvinhu. Pavodle haściej hatela, u tyja dni, kali tam žyła Mielnikava, akijan byŭ biez chvalaŭ.
Na terytoryi kala atela hości ŭ tyja dni sustrakali miłych paŭlinaŭ, kačak, burundukoŭ, małpačak.
Jość u hatela i svaja ŭłasnaja juvielirnaja krama.
Nie adychodziačy daloka ad hatela, možna zajmacca snorkielinham. Heta taki vid płavańnia pad pavierchniaj vady z maskaj i dychalnaj trubkaj, i zvyčajna z łastami. U Araliya Beach Resort&Spa jość ułasny chatni ryf.
Na 12-m paviersie atela haściam dastupny Sky Desk — naziralnaja placoŭka z basiejnam z panaramnym vidam na akijan.
U hateli hości mohuć zajmacca johaj, miedytacyjaj i fitnesam. Viadoma, što ŭ Varšavie ŭ Mielnikavaj była svaja piersanalnaja trenierka pa fitnesie, a apošnim časam jana pačała zajmacca kikboksinham. Śpikierka navat źniała parkoŭku pobač ź fitnes-centram. Na Šry-Łancy trapić tudy možna było liftam.
U spa-centry hatela haściam abiacajuć pracedury ad usich chvarobaŭ. A pamiž pracedurami klijentaŭ častujuć na miescy roznymi stravami, «jakija dapamohuć ačyścić arhanizm i paskoryć praces adnaŭleńnia». Usio adbyvajecca ŭ mini-vioscy na terytoryi kompleksu.
Hatel prapanuje haściam šerah ekskursij. Možna pajechać na safary ŭ nacyjanalny park Minieryja i pahladzieć na statki słanoŭ abo leapardaŭ. Abo ŭ nievialikuju rybackuju viosku Chabaraduva, kab ubačyć redkich marskich čarapach.
Niadaŭna kalehi Mielnikavaj adnavili kantrol nad kiravanym joj fondam Białoruś Liberty. Jany vyjavili, što žančyna vyvieła z rachunka na asabistyja patreby bolš za 150 tysiač dalaraŭ hramadskich hrošaj. Samyja vialikija pieravody byli zroblenyja 5 i 18 sakavika. 5 sakavika jana jašče znachodziłasia ŭ Araliya Beach Resort & Spa.
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy18
Kamientary
[Zredahavana]
Ili homielskij vojenkom.