Hrosmajstar Naradzicki, jaki raptoŭna pamior u 29 hadoŭ, pierad śmierciu ciažka pieražyvaŭ abvinavačańni z boku Kramnika

50‑hadovy Kramnik na praciahu hoda abvinavačvaŭ Naradzickaha ŭ niesumlennaj hulni. Napiaredadni śmierci Naradzicki pryznaŭsia, što ciažka pieražyvaje hetyja abvinavačańni. Mnohija viadomyja šachmatysty asudzili pavodziny Kramnika i patrabujuć jaho pakarać.

Kramnik, jaki abvinavačvaje mnohich šachmatystaŭ u niesumlennaj anłajn-hulni, upieršyniu namiaknuŭ na «čycierstva» Naradzickaha jašče minułaha hoda. Na praciahu hoda jon rehularna publikavaŭ pasty pra amierykanskaha hrosmajstra i patrabavaŭ rasśledavańnia.

Kramnik demanstravaŭ videazapisy anłajn-hulniaŭ Naradzickaha, śćviardžajučy, što toj padhladvaŭ na inšy ekran, na jakim chady raźličvała kampjutarnaja prahrama.

Naradzicki rašuča adkidaŭ hetyja abvinavačańni. 29‑hadovaha šachmatysta i papularnaha strymiera taksama nikoli nie abvinavačvali ŭ niesumlennaj hulni inšyja hulcy.

Kramnik skazaŭ Reuters, što nie choča kamientavać zajavu hiendyrektara FIDE Emila Sutoŭskaha, dadaŭšy, što chacieŭ by «raskazać usiu historyju całkam».

«Niama sumnievaŭ, što hetuju trahiedyju pavinna rasśledavać palicyja. Zanadta šmat finansavych intaresaŭ zamiešana, kab być upeŭnienym, što heta prosta vypadkovaść. Ja hatovy pradstavić usiu nieabchodnuju infarmacyju», — napisaŭ rasijski hrosmajstar u svaim akaŭncie Ch. U sacyjalnaj sietcy X Kramnik zajaviŭ, što maje namier padać u sud na «ŭsich, chto iłžyva abvinavačvaje» jaho.

Jon nazvaŭ śmierć Naradzickaha «trahiedyjaj», jakuju, na jaho dumku, pavinny rasśledavać pravaachoŭnyja orhany, i padkreśliŭ, što «hatovy pieradać usiu nieabchodnuju infarmacyju».

Daniela Naradzickaha znajšli nieprytomnym u jaho domie 19 kastryčnika, za dzień da taho, jak pra jaho śmierć abviaścili publična.

Naradzicki pachodziŭ ź siamji jaŭrejskich imihrantaŭ z SSSR. Jaho baćka, Uładzimir, pierajechaŭ u ZŠA z Ukrainy, a maci Alena — z Azierbajdžana.

Kłub Naradzickaha, Šarłocki šachmatny centr, zajaviŭ pra «raptoŭnuju» śmierć šachmatnaj zorki 20 kastryčnika, apublikavaŭšy zajavu jaho siamji ŭ sacsietcy X. Padčas strymu na šachmatnaj płatformie Twitch, jaki staŭ dla jaho apošnim, Daniel Naradzicki pryznaŭsia, što kanflikt surjozna paŭpłyvaŭ na jaho psichałahičny stan.

Na videa, jakoje z taho času vydalili ź sietki, jon vyhladaŭ hłyboka zasmučanym, znoŭ i znoŭ abmiarkoŭvaŭ abvinavačańni Kramnika i niekalki razoŭ zasynaŭ, paviedamlała vydańnie El Pais.

Paśla abviaščeńnia pra śmierć Naradzickaha Kramnik napisaŭ u sietcy X «Nie ŭžyvajcie narkotykaŭ», uzhadaŭšy taksama «dziŭny niadaŭni strym» amierykanskaj zorki.

Chałodnaja reakcyja Kramnika vyklikała hnieŭ u šachmatnaj supolnaści.

Z krytykaj na jaho adras vystupili niekalki aŭtarytetnych pradstaŭnikoŭ šachmatnaha śvietu, u tym liku amierykaniec Chikaru Nakamura, jaki zajmaje druhoje miesca ŭ suśvietnym šachmatnym rejtynhu, eks-čempijon śvietu Mahnus Karłsen i indyjski hrosmajstar Nichał Saryn.

U svaim strymie Karłsen zajaviŭ, što adnosiny Kramnika z Naradzickim byli «žachlivymi».

Saryn napisaŭ u sietcy X, što Kramnik «pavinien adkazać za toje, što jon robić», dadaŭšy, što Naradzicki znachodziŭsia pad «vializnym ciskam» praz abvinavačańni eks-čempijona śvietu. «Biaskoncyja, nieabhruntavanyja abvinavačańni i publičnyja dapytvańni, ź jakimi jon sutykaŭsia apošnija miesiacy, akazvali na jaho vielizarny cisk i pryčyniali jamu bol», — napisaŭ Saryn.

«Kali pačalisia hetyja napadki, Denieł pierastaŭ uśmichacca. My ŭsio heta bačyli. Šachmatny śviet straciŭ adnu sa svaich najiarčejšych zorak — čałavieka, jaki zrabiŭ našu hulniu dastupnaj dla miljonaŭ», — dadaŭ Saryn.

Čempijonka Vialikabrytanii pa šachmatach Jovanka Hoŭska padtrymała rašeńnie FIDE pačać rasśledavańnie.

«Nielha dazvalać ludziam prosta tak abvinavačvać inšych u machlarstvie i nie nieści za heta nijakaj adkaznaści. Heta nie pavinna pieratvaracca ŭ sud sacyjalnych sietak, jak heta ŭžo zdarałasia», — skazała jana ŭ intervju VVS.

A kanadskaja šachmatystka i strymierka Nema Čžou nazvała toje, što adbyvajecca, «nieprymalnym» i zaklikała FIDE ŭmiašacca.

Čžou zaklikała vyklučyć Uładzimira Kramnika z aficyjnych rejestraŭ FIDE i pryznać niesapraŭdnym jaho zvańnie čempijona śvietu.

Fiederacyja vykazała spačuvańnie siamji Naradzickaha, zajaviŭšy, što ŭznaharodzić jaho śpiecyjalnaj premijaj.

«My hłyboka zaniepakojeny tym, jak Kramnik vykazvaje svaje pohlady — heta nanosić surjoznuju škodu šachmatnaj supolnaści, — havorycca ŭ zajavie na sajcie arhanizacyi. — Spadar Kramnik pavinien razumieć, što havorka idzie nie prosta pra jaho mierkavańnie, a pra sfarmavanuju pazicyju, jakaja, uličvajučy, što jon eks-čempijon śvietu, moža źniščyć karjeru i dabrabyt asobnych hulcoŭ».

Pavialičyć

Rasijanin Uładzimir Kramnik staŭ čempijonam śvietu ŭ 2000 hodzie, pasunuŭšy na šachmatnym pjedestale Hary Kasparava. Jon zachoŭvaŭ hety tytuł z 2000 pa 2007 hod.

U apošnija hady jon nie raz staviŭ pad sumnieŭ sumlennaść inšych hulcoŭ. Ale sam nastojvaŭ, što nikoha nie abvinavačvaje i što prosta pryvodzić fakty, naprykład, prykmietnaje pavyšeńnie ŭ rejtynhu. Jon zajaŭlaŭ, što choča ačyścić šachmatnuju hulniu ad machlaroŭ, ale mnohija ludzi adznačali, što jon časta abvinavačvaje biazdokazna.

FIDE zaklikała Kramnika adklikać sudovy pazoŭ suprać češskaha hrosmajstra Davida Navary. Kramnik abvinavaciŭ Navaru ŭ paklopie ŭ červieni 2025 hoda paśla taho, jak češski šachmatyst apublikavaŭ adkryty list, jaki apisvaje, jak abvinavačańni rasijanina ŭ niesumlennaj hulni paŭpłyvali na jaho psichałahičnaje zdaroŭje.

Pavialičyć

Denieł Naradzicki, čempijon śvietu siarod junijoraŭ da 12 hadoŭ i syn jaŭrejskich imihrantaŭ z SSSR, zaniaŭ dziaviataje miesca na minułym čempijanacie śvietu pa blicu.

Jon byŭ viadomym šachmatnym strymieram i błohieram, viadučym papularnaha YouTube-kanała, dzie publikavaŭ navučalnyja videa i vioŭ žyvyja tranślacyi partyj z supiernikami, jakija natchniali sotni tysiač ludziej va ŭsim śviecie.

Jaho kanał na YouTube maje amal paŭmiljona padpisčykaŭ, a akaŭnt u Twitch — 340 tysiač fałovieraŭ.

Prychilniki canili jaho hłybokaje razumieńnie hulni i zachapleńnie joju, a FIDE paśla jaho śmierci zajaviła, što jon adyhraŭ važnuju rolu ŭ papularyzacyi šachmat u internecie.

• 0
• 0
• 1
• 4
• 0
• 7
• 1
• 0