Na składach najbujniejšych suśvietnych vytvorcaŭ nazapasiłasia rekordnaja kolkaść ałkaholu
Najbujniejšyja suśvietnyja vytvorcy mocnaha ałkaholu sutyknulisia z rezkim padzieńniem popytu, u vyniku čaho na ich składach nazapasilisia nierealizavanyja zapasy śpirtnoha na sumu kala 22 miljardaŭ dalaraŭ. Jak piša Financial Times, heta samy vysoki ŭzrovień składskich zapasaŭ amal za apošnija dziesiać hadoŭ.
Liški ałkaholu nazapasilisia ŭ takich kampanij, jak Diageo, Pernod Ricard, Campari, Brown Forman i Rémy Cointreau. Naprykład, u francuzskaha vytvorcy kańjaku Rémy Cointreau zapasy aceńvajucca prykładna na 1,8 miljarda jeŭra — heta amal udvaja bolš za hadavuju vyručku kampanii i suma, blizkaja da jaje rynkavaj kapitalizacyi.
Z-za pierapoŭnienych składoŭ kampanii vymušanyja skaračać vytvorčaść i navat časova zakryvać zavody. Japonskaja hrupa Suntory, naprykład, spyniła pracu svajho asnoŭnaha zavoda pa vytvorčaści burbonu Jim Beam u amierykanskim štacie Kientuki jak minimum na hod. Kampanija Diageo prypyniła vypusk viski na pradpryjemstvach u Techasie i Teniesi da leta.
Kab raspradać zapasy, vytvorcy taksama źnižajuć ceny. Tak, u pieryjad pandemii butelka kańjaku Hennessy u ZŠA kaštavała da 45 dalaraŭ, a ciapier cana źniziłasia prykładna da 35 dalaraŭ.
Analityki adznačajuć, što prablema ŭźnikła paśla rezkaha naroščvańnia vytvorčaści padčas pandemii COVID-19, kali popyt na ałkahol istotna vyras. Adnak u 2021—2022 hadach stała zrazumieła, što hety rost nie budzie doŭhaterminovym, i popyt pačaŭ padać.
Siarod asnoŭnych pryčyn — inflacyja, skaračeńnie dachodaŭ nasielnictva, a taksama źmieny ŭ hramadskich zvyčkach. Usio bolš ludziej admaŭlajecca ad mocnaha ałkaholu na karyść zdarovaha ładu žyćcia, u tym liku pad upłyvam papularnaści srodkaŭ dla źnižeńnia vahi, takich jak Ozempic.
Ciapier čytajuć
Ci zakryjuć Jeŭropu dla biełarusaŭ? Daradca Cichanoŭskaj raspavioŭ, pra što damoviŭsia ŭ Bierlinie5
Kamientary