Alesiu Bialackamu siońnia spoŭniłasia 63 hady. Piaty raz paśla apošniaha aryštu i suda nad im Bialacki sustrakaje dzień narodzinaŭ za kratami.
Jak stała viadoma Radyjo Svaboda, źniavolenaha nobieleŭskaha łaŭreata hetym letam vazili na apieracyju ŭ turemny špital u Kaladzičach pad Minskam.
«Viedajem, što apieracyja była na nahach, ale jakaja dakładna — nieviadoma. I nibyta apieracyja prajšła narmalna, inakš by jaho nie viartali ŭ kałoniju hetak chutka. A jaho viarnuli, jon znoŭ u atradzie. Ale ci znoŭ pracuje Aleś na drevaapracoŭcy, ci dzie ŭ inšym miescy, nieviadoma», — raskazała pra Bialackaha krynica, jakaja prasiła zachavać ananimnaść.
Łaŭreat Nobieleŭskaj premii miru, pravaabaronca Aleś Bialacki ŭ źniavoleńni ź lipienia 2021 hoda, jon adbyvaje pakarańnie ŭ kałonii № 9 u Horkach Mahiloŭskaj vobłaści. Aleś asudžany na 10 hadoŭ źniavoleńnia. Heta ŭžo druhi praciahły termin źniavoleńnia pravaabaroncy, nie ličačy šmatlikich administracyjnych aryštaŭ.
Padčas adbyćcia pakarańnia ŭ babrujskaj kałonii z 2011 pa 2014 hod, jak kazali siabry Alesia Bialackaha, u jaho nie było vialikich prablemaŭ sa zdaroŭjem. Tady ŭ kałonii Bialacki pracavaŭ na šyćci palčatak, mieŭ spatkańni z svajakami i atrymlivaŭ pasyłki z domu. Hetym razam adrazu paśla źmiaščeńnia ŭ horackuju kałoniju pravaabaroncu nakiravali pracavać na ciažkuju vytvorčaść — na drevaapracoŭku, i nieŭzabavie ŭ jaho ŭźnikli prablemy sa zdaroŭjem.
Pra ŭmovy, u jakich žyvie i pracuje Aleś Bialacki ŭ kałonii, źviestak niašmat, bo kantakty ź im administracyja kałonii maksimalna abmiažoŭvaje.
Pavodle krynicy «Svabody», sa śniežnia 2024 hoda ad Alesia Bialackaha niama listoŭ, a apošniuju paštoŭku ad jaho atrymali ŭ kancy hoda.
«U mianie ŭsio narmalna, nie chvalujciesia», — napisaŭ Aleś Bialacki. Pra svaje prablemy sa zdaroŭjem tady jon ničoha nie paviedamiŭ.
Stanoŭčaj navinoj krynica nazyvaje toje, što ŭdałosia pieradać charčovuju pieradaču dla Alesia Bialackaha.
«Dobra, što sioleta ŭdałosia pieradać Alesiu praduktovuju pieradaču. Takich pieradač jon byŭ pazbaŭleny papiarednija dva hady, a heta vielmi ciažka — žyć u kałonii biez padtrymki. Svajaki spadziajucca, što pieradača dajšła całkam i Aleś zastaŭsia zadavoleny», — skazała krynica.
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1414
Kamientary