Šparhałki na vuściłkach i ŭ batonie — vykładčyk sabraŭ kalekcyju najlepšych studenckich šparhałak i vystaviŭ jaje ŭ vuzie
Bolš za 15 hadoŭ vykładčyk vyšejšaj matematyki Alaksandr Halmak kalekcyjaniravaŭ šparhałki, kanfiskavanyja ŭ studentaŭ. I ciapier jaho ŭnikalnaja kalekcyja stała publičnaj. U muziei Biełaruskaha dziaržaŭnaha ŭniviersiteta charčovych i chimičnych technałohij adkryłasia jaho vystava.
Svaju pieršuju šparhałku Alaksandr Halmak kanfiskavaŭ u studenta jašče ŭ 80-ch. Małady i pryncypovy piedahoh byŭ biaźlitasny: znachodka aŭtamatyčna aznačała «niezdavalniajuča». Hetym praviłam Alaksandr Michajłavič kirujecca i siońnia, raspaviadaje STB.
«Apošnim časam ja zaŭsiody papiaredžvaju. Vy majecie prava rabić šparhałki, ale ja maju prava, jak vykładčyk, złavić. Ale tady — usio, «dvojka», — kaža vykładčyk Biełaruskaha dziaržaŭnaha ŭniviersiteta charčovych i chimičnych technałohij.
Za 45 hadoŭ pracy va ŭniviersitecie jon vyjaviŭ sotni šparhałak. Ad banalnych «harmošak» da sapraŭdnych inžyniernych tvoraŭ, jakija navat ruka nie padymałasia vykinuć. Hetyja ŭzory studenckaj vynachodlivaści jon pačaŭ kalekcyjaniravać. Sakrety niekatorych chitramudrych prystasavańniaŭ davodziłasia raskryvać razam ź ich aŭtarami.
Kudy tolki nie chavali padkazki studenty: u butelki z vadoj, futlary dla akularaŭ, zalikovyja knižki i navat va ŭpakoŭki ad lekaŭ.
Formułami raśpisvali vuściłki, sprabavali pranieści šparhałki navat u batonie ci ŭ šakaładcy. Ale daśviedčanaje voka vykładčyka było pilnym. Asablivuju ŭvahu piedahoha pryciahvali idealna napisanyja raboty. Heta byŭ peŭny sihnał: padkazka niedzie pobač. Tak, padčas pandemii była vykryta miedycynskaja maska z formułami.
Alaksandr Michajłavič upeŭnieny: z raźvićciom technałohij fantazija studentaŭ pačała źnikać. Śpisać z telefona ci «razumnaha» hadzińnika — samaje prostaje i, na jaho dumku, asudžanaje na pravał rašeńnie.
Foty z Maskvy dajuć pabačyć Pucina i Łukašenku biez hrymu15
Kamientary