Čały nazvaŭ, što atrymaŭ Łukašenka ad amierykancaŭ uzamien za vyzvaleńnie Cichanoŭskaha i inšych palitviaźniaŭ
Na pieršy pohlad zdajecca, što Łukašenka nie atrymaŭ ničoha ad vyzvaleńnia palitviaźniaŭ, ale analityk Siarhiej Čały ličyć inakš.
Analityk Siarhiej Čały padzialiŭsia svajoj viersijaj taho, jak sankcyj ZŠA paźbieh ci nie hałoŭny mižnarodny kašalok kiraŭnika Biełarusi, pierakazvaje «Salidarnaść».
Na kanale BRC Čały źviarnuŭ uvahu: vystupajučy niadaŭna pierad pradstaŭnikami dziaržaŭnych ŚMI, Alaksandr Łukašenka zajaviŭ, što vyzvaleńnie 16 palitviaźniaŭ na čale ź Siarhiejem Cichanoŭskim było zroblena pa prapanovie ZŠA — heta byŭ varyjant amierykanskaj ździełki «ty mnie heta, ja tabie toje».
— I samaje cikavaje — što Łukašenka atrymaŭ uzamien ad amierykancaŭ. Na pieršy, niaŭvažlivy pohlad, Biełaruś nie atrymała ničoha. Łukašenka śpiecyjalna ŭdakładniaje: «Ja navat nie kazaŭ pra sankcyi, klanusia vam. Rybakovu ja zabaraniŭ prasić».
I dalej ździŭlenaj publicy ŭ asobie svaich žurnalistaŭ jon tłumačyć, čamu. Bo dla takich prośbaŭ niama asablivych padstaŭ. Choć sankcyi i majuć niehatyŭny ŭpłyŭ na žyćcio našaj krainy, ale Biełaruś užo prystasavałasia…
Ale na druhi, daśviedčany pohlad, vyśvietliłasia, dziakujučy rasśledavańniu Biełaruskaha rasśledavalnickaha centra, što
ŭ dzień sustrečy z Kitam Kiełaham na Kipry była likvidavana kampanija Dana Holdings, a praz dva miesiacy jana i jaje były ŭładalnik Niebojša Karyč byli vyklučany sa śpisu sankcyj ZŠA.
Dziakujučy takomu niachitramu jurydyčnamu truku sankcyj paźbieh ledź nie hałoŭny mižnarodny kašalok Łukašenki.
Kašalok u druhim pakaleńni. Jon — syn Bahaluba Karyča, jaki vykonvaŭ hetuju funkcyju jašče dla Miłošaviča.
Ciapier čytajuć
Palitviazień Kim Samusienka paraŭnaŭ śviet na momanty jaho pasadki i vyzvaleńnia: Usio niadrenna dla jeŭrapiejskaj cyvilizacyi, a značyć, i dla biełarusaŭ2323
Kamientary