Centralnym mierapryjemstvam 1 vieraśnia ŭ Homielskaj vobłaści było adkryćcio basiejna pry himnazii ŭ Chojnikach. Kab hučna zajavić pra čarhovy «padarunak» uładaŭ miascovym žycharam, u rajcentr prybyli staršynia abłvykankama Ivan Krupko i namieśnik premjer-ministra Natalla Piatkievič. DziaržSMI pakazali jarkuju karcinku ź pierarazańniem stužačak, radasnymi dziećmi, zadavolenymi čynoŭnikami, tancami, čyrvona-zialonymi ściažkami i pafasnymi słovami. Ale žychary Chojnikaŭ raskazali praŭdu ŭ kamientarach da naviny ŭ sacsietkach, piša «Fłahštok».
Akazałasia, što basiejn zakryli adrazu ž paśla adkryćcia, tamu što abjekt jašče nie dabudavany.
«Adkryli na adzin dzień, kab pryhoža dać spravazdaču, a potym — pa damach. Na 1 vieraśnia — stužački, muzyka, uśmieški… A potym — zakryta, nie dabudavana. Navošta było davać nadzieju, kali ŭsio heta tolki na adzin dzień? Sumna, što pakazucha važniejšaja za realny vynik», — napisaŭ u sacsietcy adzin z karystalnikaŭ.
«Jon zakryty, i rabočyja vyvieźli meblu pryviezienuju», — paćvierdziŭ inšy miascovy žychar.
«Fłahštok» prahledzieŭ dziaržzakupki pa basiejnie ŭ Chojnikach i vyśvietliŭ, što budaŭnictvam abjekta zajmałasia UKB Rečyckaha rajona. U techzadańni, prymacavanym da dakumientacyi, paznačany termin zakančeńnia rabot — 24 vieraśnia. Hetaja ž data staić u tendary pa vykanańni rabot u ramkach 4-ha etapu prajektavańnia.
Vychodzić, što ŭłady, zahadzia dakładna viedajučy pra toje, što abjekt nie budzie hatovy da 1 vieraśnia, usio adno zapłanavali šou z adkryćciom basiejna. Vierahodna, patrabavali ad budaŭnikoŭ iści z apiaredžańniem hrafika — ale nie vyjšła. Tamu kamientary miascovych žycharoŭ pra pakazuchu dakładna acharaktaryzavali situacyju.
Budaŭnictva finansavałasia z respublikanskaha biudžetu. Kali padsumavać usie zakupki, to ahulnaja suma (pačynajučy ad tendara pa raspracoŭcy dakumientacyi) pieravysiła 15 miljonaŭ 800 tysiač rubloŭ — amal 5,3 miljona dalaraŭ.
Što ŭ Chojnikach havorać pra realnyja terminy adkryćcia abjekta — i jakija vykazvajuć mierkavańni, — «Fłahštok» sabraŭ prykłady:
«Adkryćcio ŭ kancy kastryčnika. Pieršaha vieraśnia jaho adkryli dla pakazuchi. Paśla pakazuchi rabočyja praciahvajuć tam pracu. A staršynia rajona skazaŭ ekanomić vadu. Pakazuchu zrabili, kab premiju atrymać».
«Jaho zakryli adrazu paśla ŭračystaha adkryćcia, bo nie hatovy jašče, praź miesiac-dva pa fakcie adkryjuć».
Adzin z karystalnikaŭ śćviardžaje, što naviedvalnikaŭ u basiejn puściać tolki ŭ śniežni, i patłumačyŭ:
«Unutry ničoha nie zroblena. Aficyjna budzie pracavać tolki sa śniežnia».
«Fłahštok» pasprabavaŭ vyśvietlić datu adkryćcia basiejna, ale akazałasia, što ni ŭ himnazii, ni ŭ rajvykankamie jaje nie viedajuć. Na zvanok ad imia miascovaha žychara tam nie dali kankretnych adkazaŭ na pytańni, ale pryznali, što basiejn sapraŭdy nie pracuje.
Pad Minskam pradajecca pałac z dvuma basiejnami, SPA-kompleksam i lustraj rostam z čałavieka
«Takoje — paŭsiudna». Videa z karovami ŭ hrazi ŭ Dobrušskim rajonie stała virusnym u sacsietkach
Kiraŭnik Biełaaziorska raskazaŭ pra padrychtoŭku da «Dažynak», a ludzi zachejcili ŭ kamientarach
«Alimavič! U nas Pulva!» Mer biełaruskaha horada pierabłytaŭ nazvu adzinaj raki, jakaja praź jaho ciače
Ciapier čytajuć
Tramp zajaviŭ, što viadzie z Łukašenkam pieramovy pra vyzvaleńnie častki z 1400 palitviaźniaŭ35
Kamientary