Źmiena padychodu da ŭmacavańnia miažy pradyktavana ustupleńniem Finlandyi ŭ NATA.
Namieśnik staršyni Rady biaśpieki Rasii Dźmitryj Miadźviedzieŭ padčas rabočaj pajezdki ŭ Leninhradskuju vobłaść zajaviŭ, što Uładzimir Pucin daŭ daručeńni pa ŭmacavańni miažy ź Finlandyjaj. Na pasiadžeńni ź miascovymi čynoŭnikami były prezident anansavaŭ budaŭnictva fartyfikacyjnych zbudavańniaŭ u pryhraničnych rehijonach, piša The Moscow Times.
«My tolki što byli na miažy ź Finlandyjaj. Tam, kali nie vajennaja aktyŭnaść, to na ŭsiu moc budujucca ŭsiakija ścieny, zaharadžalnyja zbudavańni. Nam nieabchodna pavysić nadziejnaść abarony dziaržmiažy, zabiaśpiečyć fartyfikacyjnaje abstalavańnie na terytoryjach rehijonaŭ», — zajaviŭ Miadźviedzieŭ.
Pa słovach namieśnika staršyni Rady biaśpieki, źmiena padychodu da ŭmacavańnia miažy pradyktavana ustupleńniem Finlandyi ŭ NATA. «My nie možam ihnaravać toj fakt, što Finlandyja ŭ ciapierašni momant źjaŭlajecca ŭdzielnikam Paŭnočnaatłantyčnaha aljansu. A heta pradvyznačaje źmianieńnie našych vajennych padychodaŭ da ŭładkavańnia miažy i da adlustravańnia mahčymych niedružalubnych aktaŭ», — skazaŭ jon. Miadźviedzieŭ taksama źviarnuŭ uvahu na rost vajskovaj aktyŭnaści kala rasijskaj miažy, zhadaŭšy krainy Bałtyi, Polšču i Narviehiju.
Akramia taho, jon prakamientavaŭ praviedzienuju ŭ Paryžy naradu «kaalicyi achvotnych», jakaja tyčyłasia pytańniaŭ harantavańnia biaśpieki dla Ukrainy. Pryniatyja ŭ chodzie samitu rašeńni Miadźviedzieŭ nazva «łuchtoj sabačaj» (abo bullshit, jak jon udakładniŭ na anhlijskaj).
«Jany sami sabie niešta tam prydumlajuć, vyciahvajuć z roznych miescaŭ, potym pradjaŭlajuć heta ŭ jakaści harantyj. Nijakich nastupstvaŭ heta mieć nie budzie», — zapeŭniŭ eks-prezident.
Z 1 vieraśnia ŭ finskim horadzie Mikieli, raźmieščanym usiaho za 140 kiłamietraŭ ad rasiejskaj miažy, pačaŭ pracu štab rehijanalnaha kamandavańnia Suchaputnych vojskaŭ NATO. Na pieršym etapie tam buduć pracavać kala dziesiaci aficeraŭ z nastupnym pavieličeńniem da 50 čałaviek.
Novaja struktura pad kiraŭnictvam kamandavańnia NATO «Norfałk» (ZŠA) budzie zajmacca kiravańniem suchaputnymi siłami aljansu ŭ paŭnočnym rehijonie, kaardynacyjaj dziejańniaŭ nacyjanalnych armij, a taksama sumiesnym płanavańniem vučeńniaŭ i apieracyj.
Finlandyja ŭstupiła ŭ NATA viasnoj 2023 hoda, admoviŭšysia ad dziesiacihodździaŭ vajennaha niejtralitetu paśla poŭnamaštabnaha ŭvarvańnia Rasii va Ukrainu. Za joj paśledavała Šviecyja, jakaja zaviaršyła praces dałučeńnia viasnoj 2024 hoda. Heta pavialičyła praciahłaść miažy NATO z Rasijaj udvaja — bolš čym na 1300 kiłamietraŭ.
Uładzimir Pucin pieršapačatkova tłumačyŭ napad na Ukrainu nieabchodnaściu nie dapuścić pašyreńnia NATO, adnak paśla padačy zajavak Finlandyjaj i Šviecyjaj zajaviŭ, što ich ustupleńnie ŭ aljans Maskva «nie razhladaje jak surjoznuju pahrozu». «Chočacca im — kali łaska», — kazaŭ jon.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna23
Pamiatajecie minčuka, jaki ŭ 2017‑m vyratavaŭ ściah z-pad noh amapaŭcaŭ — koštam svajoj svabody? Ciapier jamu, byłomu palitviaźniu, patrebnaja dapamoha1414
Kamientary
[Zredahavana]