U noč na 21 žniŭnia rasijanie nanieśli maštabny ŭdar pa terytoryi Ukrainy z vykarystańniem roznych typaŭ uzbrajeńnia, uklučajučy hipierhukavyja rakiety i bieśpiłotniki. Pra heta paviedamlajuć rasijskija vajenkary i ŭkrainskija aficyjnyja krynicy.
U Paŭłahradzie (Dnieprapiatroŭskaja vobłaść) paciarpieła hazaraźmierkavalnaja stancyja — mierkavana, udar byŭ naniesieny «šachiedami».
Rasijskija pabliki paviedamlajuć pra vykarystańnie ŭ Sumach hipierhukavoj rakiety «Cyrkon», jakaja była zapuščana z akvatoryi Čornaha mora.
U Mukačava vybuchi hučali ŭ rajonach, dzie znachodziacca aeradrom i zavod elektroniki. Pavodle miascovych uładaŭ, dziesiać čałaviek tam špitalizavany, jašče dvoje źviarnulisia da lekaraŭ samastojna.
U Zaparožžy vybuchami paškodžany niekalki abjektaŭ pramysłovaj infrastruktury, vybity vokny ŭ žyłych damach, ale paciarpiełych niama, paviedamlaje miascovaja administracyja.
Charkaŭskaja vobłaść: źniščany abjekt hazavaj infrastruktury — paviedamlajuć jak z ukrainskaha, tak i z rasijskaha boku.
Lvoŭ rasijnie atakavali rakietami i «šachiedami». «Papiarednie jość paciarpiełyja. Vybuchnoj chvalaj paškodžany dziasiatki damoŭ: vokny i dachi. Usie słužby pracujuć na miescy», — napisaŭ mer horada Andrej Sadavy.
Čarkaskaja i Kijeŭskaja vobłaści — tam hučali mocnyja vybuchi, nastupstvy nieviadomyja.
Pavodle paviedamleńniaŭ z ukrainskich pablikaŭ, mahčyma, paškodžany abjekt krytyčnaj infrastruktury ŭ Dnieprapiatroŭskaj vobłaści.
Na fonie atak u šerahu rehijonaŭ uźnikli pažary.
Pavodle rasijskich pablikaŭ, rasijanie puścili dziasiatki rakiet: Ch-101, «Kalibr», «Kinžał» i bieśpiłotniki.
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary