U Izraili vykryli mižnarodnuju sietku, jakaja zajmałasia handlem žančynami. Dapamahła ahientka ź Biełarusi
U Izraili i Biełarusi pravodziłasia sumiesnaja apieracyja suprać mižnarodnaj sietki, jakaja zajmałasia handlem žančynami. Dziakujučy supracoŭnictvu siłavikoŭ dźviuch krain i pracy tajnaj ahientki ź Biełarusi ŭdałosia vykryć i aryštavać troch padazravanych — žycharoŭ centralnaj i paŭnočnaj častki Izraila, piša vydańnie Maariv.
Pavodle materyjałaŭ śledstva, złačyncy zajmalisia tym, što pryvozili žančyn z-za miažy (u asnoŭnym z krain byłoha Savieckaha Sajuza) i prymušali ich pracavać u seks-industryi, atrymlivajučy prybytak u dziasiatki tysiač šekielaŭ štomiesiac.
4 žniŭnia 2025 hoda ahientka ź Biełarusi prybyła ŭ Izrail pad prykryćciom, sabrała dokazy i dapamahła palicyi zatrymać arhanizataraŭ sietki. Na nastupny dzień byli aryštavanyja dva padazravanyja — mužčyna z poŭnačy krainy i žančyna z centra. Padčas pieratrusaŭ palicyja znajšła kvatery, jakija vykarystoŭvalisia jak miescy dla akazańnia seksualnych pasłuh, i apytała žančyn, što tam znachodzilisia.
Paźniej, 12 žniŭnia, była zatrymanaja jašče adna žančyna, jakaja taksama ŭdzielničała ŭ hetaj złačynnaj dziejnaści. Padazravanych abvinavačvajuć u handli ludźmi, prymusie da zaniatku prastytucyjaj, arhanizacyi pryjezdu žančyn z-za miažy dla seksualnaj ekspłuatacyi i inšych ciažkich złačynstvach. Taksama ŭźnikła padazreńnie, što adna z achviar stała žyvoj mišeńniu dla zhvałtavańnia.
Sud u Tel-Avivie ŭžo niekalki razoŭ padaŭžaŭ aryšt padazravanych, a ŭ najbližejšy čas im budzie vystaŭleny aficyjny abvinavaŭčy akt i chadajnictva ab utrymańni pad vartaj da zaviaršeńnia pracesu.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach25
Kamientary