Polskaja sietka miedycynskich łabaratoryj Laboratoria Medyczne Optimed z 20‑hadovym dośviedam pracy 3 maja paciarpieła ad ataki chakieraŭ ź Biełarusi, u vyniku jakoj asabistyja dadzienyja i miedycynskaja infarmacyja klijentaŭ mahła patrapić da złačyncaŭ, piša «Biełsat».
«Paviedamlajem ab parušeńni piersanalnych danych, jakoje moža nieści vysokuju ryzyku dla pravoŭ i svabod asob, danyja jakich my apracoŭvajem», — napisała na svaim sajcie łabaratoryja Optimed.
Pavodle infarmacyi łabaratoryi, kibierataku zładziła hrupa kibierzłačyncaŭ ź Biełarusi.
«Papiaredni analiz pakazaŭ, što arhanizavanaja hrupa kibierzłačyncaŭ ź Biełarusi atrymała dostup da sistemy — nielha vyklučać, što nieŭpaŭnavažanyja asoby mahli atrymać dostup da dadzienych, jakija tam zachoŭvalisia», — piša łabaratoryja.
Kibierzłačyncy mahli atrymać dostup da vielmi važnaj piersanalnaj infarmacyi — numara PESEL, imia i proźvišča, adrasa, miedycynskich źviestak (u tym liku vynikaŭ analizaŭ i stanu zdaroŭja).
Paśla vyjaŭleńnia incydentu zakranutyja sistemy izalavali i ŭkaranili dadatkovyja miery biaśpieki. Tym, chto karystaŭsia pasłuhami łabaratoryi, rekamiendujuć «nieadkładna zabłakavać numar PESEL» i vielmi ŭvažliva stavicca da elektronnych listoŭ i zvankoŭ sa sprobami atrymać dadatkovuju infarmacyju ad vas.
Kamientary