Maładaja dziaŭčyna ŭ Kitai nijak nie moža spynić arhazmy

Kitajskija daktary ŭ navukovym časopisie AME Case Reports apisali vypadak maładoj 20-hadovaj dziaŭčyny, jakaja pastajanna pa niekalki razoŭ u dzień adčuvaje arhazm, jaki ŭźnikaje raptoŭna i biez kantrolu ź jaje boku.

Jak pišuć aŭtary, u 12 hadoŭ u dziaŭčyny pačalisia epileptyčnyja prypadki — jana hublała prytomnaść na 10 chvilin dvojčy-trojčy na dzień. Abśledavańnie paćvierdziła epilepsiju, i jana šeść hadoŭ prymała preparat dla kantrolu prypadkaŭ. Paśla spynieńnia lačeńnia simptomy nie viarnulisia.

U 14 hadoŭ u dziaŭčyny prajaviŭsia psichičny razład — jana stała padazronaj, ličyła, što inšyja viedajuć jaje dumki, i pahruziłasia ŭ depresiju, praz što kinuła vučobu. U 15 hadoŭ jaje špitalizavali ŭ psichijatryčnaje adździaleńnie, dzie pryznačyli preparat suprać depresii i preparat dla źnižeńnia psichatyčnych simptomaŭ.

Pa słovach samoj pacyjentki, nieŭzabavie ŭ jaje źjavilisia adčuvańni, jakija nahadvajuć prachodžańnie elektryčnaha impulsu ad nižniaj častki žyvata ŭvierch i supravadžajucca mižvolnymi spazmami matki abo tazavych ciahlic. Jany doŭžylisia niekalki siekund, nahadvali arhazm, źjaŭlalisia niekalki razoŭ na dzień i nie paddavalisia kantrolu. Dziaŭčyna pačała dumać, što jaje «prystupami» niechta kiruje zvonku.

U 18 hadoŭ jana źviarnułasia da daktaroŭ. Jak pišuć aŭtary, padčas pieršaj razmovy z doktaram u jaje adbylisia značnyja i častyja prypadki, što pryviało da pierapynieńnia intervju.

Praciahły manitorynh pracy mozhu, mahnitna-rezanansnaja tamahrafija, ultrahukavoje daśledavańnie orhanaŭ małoha taza nie vyjavili ni epilepsii, ni strukturnych anamalij. U toj ža čas pastupovaje pavieličeńnie dozy antypsichatyčnych preparataŭ pryviało da źnižeńnia kolkaści i intensiŭnaści epizodaŭ, i śpiecyjalisty pastavili dyjahnaz —

pastajanny sindrom hienitalnaha ŭzbudžeńnia (PGAD).

Heta redkaje zachvorvańnie ŭpieršyniu apisali ŭ 2001 hodzie. Jano charaktaryzujecca praciahłym abo paŭtornym uzbudžeńniem u vobłaści pałavych orhanaŭ, jakoje nie źviazana z žadańniem abo seksualnaj stymulacyjaj. PGAD moža prajaŭlacca pakołvańniem, śvierbam, bolem, a taksama mižvolnymi arhazmami, časta šmatkroć za dzień. Pa acenkach śpiecyjalistaŭ, hety sindrom moža sustrakacca ŭ ad 0,6 da 3% nasielnictva.

Pryčyny PGAD da kanca nie vyśvietleny. Jaho źviazvajuć z parušeńniami ŭ pracy niervaŭ abo krovazvarotu ŭ vobłaści taza, z nastupstvami traŭmaŭ ci zachvorvańniaŭ pazvanočnika, z uździejańniem niekatorych lekaŭ (asabliva antydepresantaŭ), a taksama z dysbałansam dafaminu — niejramiedyjatara, jaki ŭdzielničaje ŭ farmiravańni seksualnaha ŭzbudžeńnia. Psichałahičnyja faktary, naprykład, tryvožnaść i stres, taksama mohuć paharšać stan.

U vypadku kitajskaj pacyjentki lačeńnie antypsichatyčnymi srodkami dało vyrazny efiekt: prystupy stali radziejšymi i mienš intensiŭnymi, a praź niekalki tydniaŭ amal źnikli. Dziaŭčyna zmahła viarnucca da pracy i sacyjalnaha žyćcia.

Praź niekalki miesiacaŭ jana samastojna spyniła pryjom lekaŭ. Praz tydzień usio viarnułasia, ale paśla adnaŭleńnia lačeńnia na praciahu miesiaca jaje stan palepšyŭsia, choć peŭnaja padazronaść zastałasia.

Jak adznačajuć aŭtary, dla padtrymańnia stabilnaha psichičnaha i fizičnaha stanu pacyjentcy nieabchodny praciahły pryjom lekaŭ i psichałahičnaja padtrymka.

• 4
• 0
• 0
• 0
• 7
• 6
• 0
• 0