Japoncy z dapamohaj 3D-druku pabudavali dom ź ziamli, a nie bietonu
Asnoŭnymi kampanientami dla budaŭnictva stali hleba, vapna i pryrodnyja vałokny. Paśla taho, jak budynak adsłužyć svajo, jaho možna razabrać i viarnuć u pryrodu biez škody dla navakolnaha asiarodździa.
Jak piša New Atlas, u japonskaj prefiektury Kumamota, u horadzie Jamaha, uźviedzieny niezvyčajny dom, jaki atrymaŭ nazvu Lib Earth House Model B.
Heta adnapaviarchovaja pabudova płoščaj 100 kvadratnych mietraŭ, stvoranaja z vykarystańniem 3D-druku, ale zamiest tradycyjnaha bietonu tut vykarystanaja ziemlanaja sumieś.
Prajekt realizavany kampanijami Lib Work Co., Arup i italjanskim startapam WASP, jaki śpiecyjalizujecca na technałohijach druku z naturalnych materyjałaŭ.
Jak paviedamlajecca, asnoŭnymi kampanientami dla budaŭnictva stali hleba, vapna i pryrodnyja vałokny — dastupnyja, adnaŭlalnyja i ekałahična biaśpiečnyja materyjały.
U Lib Work adznačajuć, što raspracavali asablivuju technałohiju źmiešvańnia, jakaja dazvalaje dasiahnuć tryvałaści i funkcyjanalnaści, nieabchodnych dla budaŭničych kanstrukcyj. A hałoŭnaje — paśla zakančeńnia terminu słužby dom možna razabrać, a bolšuju častku jaho kanstrukcyi viarnuć u hlebu, što značna skaracić kolkaść adchodaŭ.
Dla ŭźviadzieńnia ścien vykarystoŭvaŭsia 3D-pryntar ad WASP, jaki farmavaŭ ścieny płastami, pavodle elektronnaj madeli. Paśla zakančeńnia druku rabočyja dadali ašklanieńnie, dźviery, dach i inšyja nieabchodnyja elemienty, kab pieraŭtvaryć kanstrukcyju ŭ paŭnavartasnaje žyllo.
Źniešnie dom vyhladaje sučasna i ŭtulna: prostyja formy, prastornyja pamiaškańni, šmat śviatła. Ryflenyja ścieny i płoski dach vydajuć technałohiju 3D-druku, jakaja lažyć u asnovie prajekta.
Dom nie padklučany da haradskich kamunikacyj: jon pracuje aŭtanomna, dziakujučy soniečnym panelam i sistemie akamulatarnych batarej Tesla Powerwall. Usie inžyniernyja sistemy — aciapleńnie, aśviatleńnie, navat vanna — kirujucca praz smartfon abo śpiecyjalny pult.
Unutry taksama ŭstalavanyja datčyki i sensary, jakija dazvalajuć analizavać uzrovień kandensacyi, ciepłaizalacyju i inšyja paramietry, važnyja dla doŭhaterminovaj ekspłuatacyi.
Lib Work abviaściła, što z žniŭnia pačynaje prymać papiarednija zakazy na Lib Earth House Model B. Kampanija maryć naładzić vytvorčaść da 10 000 takich damoŭ da 2040 hoda i całkam aŭtamatyzavać budaŭnictva, uklučna z etapami, jakija pakul vykonvajucca ludźmi.
Pakul što damy dastupnyja tolki ŭ Japonii, ale raspracoŭščyki spadziajucca, što im zacikaviacca i ŭ inšych krainach. Praŭda, košt doma pakul nie nazyvajecca.
Ciapier čytajuć
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ105
Kamientary