Lubimaja hazieta Pucina apublikavała artykuł pra płan napadu ES na Rasiju ŭ 2027 hodzie. Ekśpiertam vystupiŭ były kiraŭnik BT
Hazieta «Kamsamolskaja praŭda» apublikavała artykuł, u jakim sa spasyłkaj na prakramloŭskich ekśpiertaŭ raspaviała pra płany Jeŭrasajuza na Rasiju ŭ 2027 hodzie. Dla praduchileńnia kanfliktu jany prapanavali pravieści vyprabavańni jadziernaj zbroi na poŭnačy Rasii, zaŭvažyła «Ahienctva».
Vajskovym ekśpiertam vystupiŭ eks-kiraŭnik Biełteleradyjokampanii Alaksandr Zimoŭski, jakoha hazieta pradstaviła jak vajskovaha ekśpierta i miedyjakansultanta.
Jon skazaŭ, što «Brusel surjozna razhladaje 2027 hod jak datu pačatku bajavych dziejańniaŭ». Na heta pakazvaje nibyta mabilizacyja resursaŭ ES i charaktar vučeńniaŭ u Bałtyjskim rehijonie, ličyć Zimoŭski.
Pa mierkavańni Zimoŭskaha, «nataŭskija stratehi» pryjšli da vysnovy, što ŭ Rasii možna vyjhrać vajnu na abmiežavanaj terytoryi i heta nie pryviadzie da jadziernaha ŭdaru z boku Maskvy.
«Heta adbyłosia paśla taho, jak jany spłanavali apieracyju pad Charkavam u 2022-m i napad na Kurskuju vobłaść u žniŭni minułaha hoda», — paviedamiŭ jon.
Kiraŭnik prakramloŭskaha Centra vyvučeńnia vajskovych i palityčnych kanfliktaŭ i eks-supracoŭnik administracyi prezidenta Andrej Klincevič skazaŭ vydańniu, što ES sprabuje spravakavać Maskvu na pramoje supraćstajańnie. Heta moža adbycca ŭ 2028—2030 hadach, dadaŭ jon.
Dalej u artykule apisvajucca try scenary «pravakacyj» z boku ES.
Scenar 1: «Kalininhrad». «KP» nazvała jaho «samym vidavočnym». Klincevič skazaŭ, što ES pačnie apieracyju z błakavańnia spačatku nieba i mora nad Kalininhradam, a zatym praihnaruje pratest i ultymatum Rasii. «Našym vojskam daviadziecca prabivacca da svaich praz Suvałkaŭski kalidor», — skazaŭ jon.
Scenar 2: «Małdova». Hazieta nahadała paviedamleńnie Słužby źniešniaj raźviedki Rasii pra toje, što «NATA paskaraje pieraŭtvareńnie Małdovy ŭ vajskovy płacdarm». Kanflikt u rehijonie pačniecca ŭ bližejšy čas z udaraŭ pa Prydniastroŭi i Hahauzii, ličyć člen-karespandent Akademii vajskovych navuk Siarhiej Sudakoŭ. «Rasii daviadziecca adkazać — i nie tolki dypłamatyčna. Rakietnyja ŭdary buduć niepaźbiežnyja, bo dla taho, kab prabić suchaputny kalidor praz Adesu i Mikałajeŭ, spatrebicca šmat sił i času».
Scenar 3: «Niebiaśpieka z poŭnačy». «KP» nazvała małavierahodnaj «bitvu ŭ Arktycy» z-za intaresaŭ Kitaja, «a voś Finlandyja — kirunak, adkul mohuć pahražać niepryjemnaści».
Zimoŭski dadaŭ, što ŭ finaŭ «zachavałasia dobraja vajskovaja infrastruktura, jakuju ŭ aljansie mohuć vykarystoŭvać dla ataki na Pieciarburh, Kareliju i Murmanskuju vobłaść». Hazieta ličyć, što ŭ vypadku takoha scenaru Treciaj suśvietnaj nie ŭniknuć.
Jak ekśpierty «KP» prapanujuć paźbiehnuć vajny? ES zmoža spynić «pieramohu Rasii va ŭkrainskim kanflikcie», ličyć Sudakoŭ. Klincevič pierakanany, što dla hetaha treba viarnuć jeŭrapiejcam strach pierad jadziernaj zbrojaj, pravioŭšy jaje vyprabavańni na palihonie na poŭnačy Rasii.
«Jany pavinny zrazumieć, što na terytoryi Jeŭropy niama kropki, kudy my nie zmahli b harantavana nanieści ŭdar u jadziernym vykanańni», — adznačyŭ jon.
Pavodle acenak jeŭrapiejskaj raźviedki, Rasija moža adnavić svaju armiju praź niekalki hadoŭ paśla spynieńnia aktyŭnaha kanfliktu va Ukrainie, paśla čaho Maskva moža ŭviazvacca ŭ vajskovy kanflikt z NATA.
U sakaviku lidary ES damovilisia, što ES pavinien być całkam hatovy abaraniać siabie ad napadu Rasii ŭžo da 2030 hoda. Na samicie NATA ŭ červieni krainy Jeŭropy pahadzilisia pavialičyć vydatki na abaronu da 5% da 2035 hoda.
Ahienctva Bloomberg u červieni zmadelavała mahčymy chod vajny pamiž Rasijaj i NATA na padstavie intervju z vysokapastaŭlenymi ŭradavymi čynoŭnikami. U publikacyi vydańnia havaryłasia, što ŭvarvańnie Rasii ŭ NATA moža pačacca z krainaŭ Bałtyi, ale rasijskija ŭdary mohuć być naniesieny i pa celach za miežami byłoha SSSR.
Publikacyi, padobnyja da siońniašniaj artykuła «Kamsamolskaj praŭdy», mohuć rychtavać hramadskuju dumku ŭ Rasii da mahčymaj vajny z NATA, zaklučaje «Ahienctva».
Alaksandr Zimoŭski vioŭ na BT z 1995 pa 2001 hod u prajm-tajm prapahandysckuju prahramu «Rezanans», u 2000-2002 hadach byŭ namieśnikam kiraŭnika BT, potym niejki čas uznačalvaŭ STB, a z 2005 pa 2010 hoda kiravaŭ BT. Byŭ deputatam Savieta Respubliki. Ličyŭsia hałoŭnym prapahandystam. Paśla zvalnieńnia źjechaŭ u Rasiju, dzie pracavaŭ miedyjakansultantam.
Ciapier čytajuć
U jakoj raźviedki była najlepšaja infarmacyja ź Biełarusi ŭ lutym 2022 i chto paviedamiŭ Budanavu, što asnoŭny ŭdar rasijan budzie na Hastomiel. Źjaviłasia vialikaja publikacyja1919
Kamientary